స్వామిశరణం అంటూ శబరి గిరులు మారుమోగాయి. మండల దీక్ష .. మండల పూజల అనంతరం.. శబరిమల ఆలయాన్ని ట్రావెన్ కోర్ అధికారులు.. ప్రధాన తంత్రి ఆధ్వర్యంలో మూసివేశారు. తిరిగి మకర విళక్కు పూజల కోసం డిసెంబరు 30న సాయంత్రం 5 గంటలకు ఆలయాన్ని తెరుస్తారు.
ప్రధాన తంత్రి కందరరావు రాజీవరు కుమారుడు కందరారు బ్రహ్మదత్తుడు, మేల్‌శాంతి అరుణ్‌కుమార్‌ నంబూద్రీల ఆధ్వర్యంలో మండల పూజలు వైభవంగా నిర్వహించారు. మండల పూజాకాలంలో ( డిసెంబర్ 26 వరకు) శబరిమల అయ్యప్ప స్వామిని ... దాదాపు 32.50 లక్షల మంది భక్తులు దర్శించుకున్నారు. అయ్యప్ప స్వామి ఆశీస్సులు పొందడానికి దేశంలోని వివిధ ప్రాంతాల నుంచి భక్తులు భారీగా తరలివచ్చారు.
డిసెంబర్ 30 సాయంత్రం 5 గంటలకు మకరవిళక్కు ఉత్సవాల కోసం ఆలయం తెరవబడుతుంది. జనవరి 14న మకరవిళక్కు నిర్వహిస్తారు. జనవరి 20న ఆలయాన్ని మూసివేస్తారు.జనవరి 14న శబరిమల కొండపై భక్తులు మకరజ్యోతిని దర్శించుకోనున్నారు. ఈ ప్రత్యేక ఘట్టానికి దేశవ్యాప్తంగా నుంచే కాకుండా విదేశాల నుంచి కూడా భక్తులు హాజరవుతారు. మకరజ్యోతి దర్శనం అయ్యప్ప స్వామి భక్తులందరికీ ఆధ్యాత్మిక అనుభవాన్ని అందిస్తుంది.
ఇక జనవరి 20న పడిపూజతో శబరిమల యాత్ర ముగియనుంది. ఈ పూజతో కలిసి అయ్యప్ప స్వామి భక్తులు తాము తీసుకున్న దీక్షను ముగించుకుంటారు. సంప్రదాయబద్ధంగా నిర్వహించే ఈ పూజతో యాత్రకు పూర్తి స్థాయి ముగింపు కలుగుతుంది.
