తమిళ్ ప్రముఖ హీరో శివకార్తికేయన్ ఎప్పుడూ విభిన్న కథనాలు ఎంచుకుంటూ ప్రేక్షకులను అలరిస్తుంటాడు. కాగా ప్రస్తుతం తమిళ్ లో అమరన్ అనే చిత్రంలో నటిస్తున్న విషయం తెలిసిందే. దివంగత ఆర్మీ లెఫ్టనెంట్ ముకుంద్ వరదరాజన్ జీవితగాథ ఆధారంగా ఈ చిత్రాన్ని తెరకెక్కిస్తున్నారు. దీంతో అమరన్ చిత్రంలో శివకార్తికేయన్ పవర్ఫుల్ ఆర్మీ ఆఫిసర్ పాత్రలో కనిపించనున్నాడు. కాగా ఇప్పటికే శివకార్తికేయన్ పాత్రకి సంబంధించిన పలు గ్లింప్స్ విడుదల కాగా మంచి రెస్పాన్న్ వచ్చింది.
అయితే ఈ చిత్రానికి ప్రముఖ తమిళ్ దర్శకుడు రాజ్ కుమార్ పెరిసామి దర్శకత్వం వహిస్తుండగా ప్రముఖ హీరో కమల్ హాసన్ మరియు సినీ నిర్మాణ సంస్థ సోనీ పిక్చర్స్ కలసి సంయుక్తంగా నిర్మిస్తున్నారు. ప్రముఖ మ్యూజిక్ డైరెక్టర్ జీ.వి ప్రకాష్ కుమార్ సంగీతం అందిస్తున్నాడు.
ఈ చిత్రంలో ముకుంద్ వరదరాజన్ భార్య ఇందు రెబెకా వర్గీస్ పాత్రలో నటించిన సాయి పల్లవికి సంబంధించిన ఇంట్రో వీడియో ని చిత్ర యూనిట్ యూట్యూబ్ లో విడుదల చేశారు. ఈ ఇంట్రోలో నటి సాయి పల్లవి ఇందు రెబెకా వర్గీస్ పాత్రలో చక్కగా ఒదిగిపోయింది. అలాగే ఇన్నోసెంట్ ఇల్లాలిగా కనిపిస్తూ చివర్లో తన భర్త మరణాంతరం రాష్ట్రపతి చేతుల మీదుగా అశోక్ చక్ర అవార్డు అందుకుంటున్న సన్నివేశాలు ప్రోమోకి హైలెట్ గా నిలిచాయి.
ఈ విషయం ఇలా ఉండగా అమరన్ చిత్రం తమిళ్ తోపాటు తెలుగు, హిందీ, మలయాళం తదితర భాషలలో అక్టోబర్ 31 న దీపావళి పండుగ కానుకగా విడుదల చేసేందుకు చిత్ర యూనిట్ సన్నాహాలు చేస్తున్నారు.
