- నారాయణపేటలో రోడ్లపైనే వ్యాపారుల అమ్మకాలు
- అవగాహన కల్పించడంపై దృష్టి పెట్టని ఆఫీసర్లు
నారాయణపేట, వెలుగు: నారాయణపేట జిల్లా కేంద్రంలో ప్రభుత్వం రూ.8 కోట్లు ఖర్చు చేసి కట్టిన ఇంటిగ్రేటెడ్ మార్కెట్ 7 నెలలుగా అమ్మకాలు లేక వెలవెలబోతుంది. అక్కడ కేవలం ఇద్దరు వ్యాపారులు మాత్రమే అమ్మకాలు చేస్తున్నారు. దీంతో 102 ఓపెన్ దుకాణాలు, 10 షటర్లు నిరుపయోగంగా మారాయి. పట్టణంలో రోడ్ల విస్తరణ తరువాత ట్రాఫిక్కు ఇబ్బంది కావడంతో చిరువ్యాపారులు, కూరగాయలు అమ్మేవారి కోసం రూ. 6 కోట్ల టీయూఎఫ్ఐడీసీ ఫండ్స్ తో ఇంటిగ్రేటెడ్ మార్కెట్ నిర్మించాలని నిర్ణయించారు. 2021 జూన్ 10న మంత్రి కేటీఆర్ శంకుస్థాపన చేశారు. దీని నిర్మాణానికి నిధులు సరిపోవని మరో రూ.2 కోట్లు కేటాయించారు. మోడల్ మార్కెట్ కావడంతో ఏడాదిన్నరలోనే కంప్లీట్ చేశారు. 2023 జనవరి 24న మంత్రి కేటీఆర్ దీనిని ప్రారంభించారు. ఇంటిగ్రేటెడ్ మార్కెట్ అద్భుతంగా ఉందని కేటీఆర్తో పాటు బడ్జెట్ సమావేశాల్లో సీఎం కేసీఆర్ ఎమ్మెల్యేను అభినందించారు.
ఇద్దరే అమ్ముతున్రు..
ఇంటిగ్రేటెడ్ మార్కెట్ కోసం బస్టాండ్దగ్గరలో ఉన్న స్థలాన్ని సేకరించి 102 ఓపెన్ దుకాణాలు, 10 షటర్స్ను నిర్మించారు. ఓపెన్ దుకాణాలను కేటాయించే అధికారం మున్సిపాలిటీ ఆఫీసర్లకు కేటాయించారు. షటర్స్ టెండర్ ద్వారా కేటాయించాలని నిర్ణయించారు. అయితే మార్కెట్లో అమ్మకాలు చేసేందుకు వ్యాపారులు ముందుకు రాలేదు. మొదట కొంత మంది వ్యాపారులు వచ్చినా, గిరాకీ సరిగా లేకపోవడంతో వారు తిరిగి రోడ్లపైనే అమ్మకాలు చేస్తున్నారు. ప్రస్తుతం ఇద్దరు మాత్రమే అది కూడా గేటు దగ్గర సరుకులు పెట్టి వ్యాపారం చేస్తున్నారు.
మార్కెట్లు ఫుల్..
నారాయణపేట మున్సిపాలిటీలో మార్కెట్లు ఎక్కువయ్యాయి. జిల్లా ఆసుపత్రి ఎదుట కూరగాయల మార్కెట్ మున్సిపల్ షాప్స్లో కొనసాగుతోంది. అదే స్థలంలో మటన్ మార్కెట్ ఉంది. దీనికి దగ్గరలోనే రైతు బజార్, బయట షాపింగ్ కాంప్లెక్స్ నిర్మించారు. ఇక మాడ్రన్ నాన్వెజ్ మార్కెట్ నుజిల్లా ఆసుపత్రి పక్కన ఏర్పాటు చేశారు. ఇన్ని మార్కెట్లు ఉండగానే, కోట్లు ఖర్చు పెట్టి ఇంటిగ్రేటెడ్ మార్కెట్ను నిర్మించారు. ఇందులో అమ్మకాలు జరగకపోవడంతో వెలవెలబోతోంది. ఇక ఇంటిగ్రేటెడ్ మార్కెట్కు వినియోగదారులు రావడం లేదని చెబుతున్న చిరు వ్యాపారులు ప్రధాన రోడ్డుకు ఇరువైపులా అమ్మకాలు కొనసాగిస్తున్నారు. దీంతో పార్కింగ్కు సరైన స్థలం లేక ఇబ్బందిగా మారింది.
గిరాకీ అయితలేదు..
బస్టాండ్ ఎదురుగా నిర్మించిన మార్కెట్లో గిరాకీ అయితలేదు. రోడ్లపైనే అన్ని దుకాణాలు ఉండడంతో అక్కడే కొంటున్నారు. ఇంటిగ్రేటెడ్ మార్కెట్ కు ప్రజలు వస్తే అక్కడికే పోతాం.
ఇస్మాయిల్, పూల వ్యాపారి
మార్కెట్కు షిఫ్ట్ చేస్తాం..
ఇంటిగ్రేటెడ్ మార్కెట్లో వ్యాపారం చేసుకోవాలని చెప్పినా, కొంత మంది సహకరించడం లేదు. వ్యాపారులు, ప్రజలకు అవగాహన కల్పించి మార్కెట్కు చిరు వ్యాపారులను షిఫ్ట్ చేస్తాం. త్వరలో అక్కడ వ్యాపారాలు షురూ అవుతాయి.
సునీత, మున్సిపల్ కమిషనర్
