హైదరాబాద్లోని శాలిబండ పోలీస్ స్టేషన్‌కు జాతీయ స్థాయి గుర్తింపు లభించింది. కేసుల పరిష్కారం, ఇతర అంశాల ఆధారంగా దేశంలోని 8వ ఉత్తమ పోలీస్ స్టేషన్గా శాలిబండ పీఎస్ను కేంద్ర హోం శాఖ ఎంపిక చేసింది. భువనేశ్వర్‌లో నిర్వహించిన ప్రతిష్టాత్మక డీజీపీఐజీపీ కాన్ఫరెన్స్‌లో శుక్రవారం (నవంబర్ 29) ఈ విషయాన్ని ప్రకటించారు. శాలిబండ పోలీస్ స్టేషన్‌కు జాతీయ స్థాయిలో గుర్తింపు రావడంపై తెలంగాణ డీజీపీ జితేందర్ హర్షం వ్యక్తం చేశారు.
కేంద్ర హోం మంత్రిత్వ శాఖ నివేదిక ప్రకారం శాలిబండ పోలీస్ స్టేషన్ దేశంలోని 8వ ఉత్తమ పీఎస్గా ఎంపికైందని తెలిపారు. తెలంగాణ పోలీస్ వ్యవస్థకు ఈ గుర్తింపు మరింత ప్రతిష్టను తీసుకొచ్చిందన్నారు. ఈ సందర్భంగా హైదరాబాద్ పోలీస్ కమిషనర్ సీవీ ఆనంద్, శాలిబండ పోలీస్ స్టేషన్ బృందానికి డీజీపీ జితేందర్ హృదయపూర్వక అభినందనలు తెలిపారు.
