- 11 రోజులుగా సమ్మెలో సమగ్ర శిక్ష అభియాన్ ఉద్యోగులు
- కేజీబీవీ, యూఆర్ఎస్ లో కుంటుపడుతున్న విద్యాబోధన
- పదో తరగతి పరీక్షలు సమీపిస్తుండడంతో స్టూడెంట్స్, పేరెంట్స్ ఆందోళన
- ఎమ్మార్సీలు, డీఈఓ ఆఫీస్లలో స్థంభించిన పనులు
మెదక్, చిన్నశంకరంపేట, వెలుగు: తమ డిమాండ్ల సాధన కోసం సమగ్ర శిక్ష అభియాన్ (ఎస్ ఎస్ ఏ) ఉద్యోగులు గత 11 రోజులుగా నిరవధిక సమ్మె చేస్తుండటం విద్యారంగంపై తీవ్ర ప్రభావం చూపుతోంది. జిల్లాలో ఎంఈఓ ఆఫీస్లలో పనిచేసే 48 మంది, కాంప్లెక్స్ స్థాయిలో పనిచేసే 66 మంది, స్కూళ్లలో పనిచేసే 78 మంది, కేజీబీవీలు, అర్బన్ రెసిడెన్షియల్ స్కూళ్లలో పనిచేసే 364 మంది, భవిత సెంటర్ లలో పనిచేసే 29 మంది, డీఈఓ ఆఫీస్లో పనిచేసే 7 గురు కలిపి మొత్తం 585 మంది ఎస్ ఎస్ ఏ ఉద్యోగులు సమ్మె చేస్తున్నారు.
పలు స్కూళ్లలో విద్యా బోధనకు ఆటంకం ఏర్పడి సిలబస్ జరగక విద్యార్థులు నష్టపోతున్నారు. మండల వనరుల కేంద్రాలు (ఎమ్మార్సీ), జిల్లా విద్యాశాఖ కార్యాలయం (డీఈఓ)లలో పనులు ఆగిపోయాయి. విద్యాభివృద్ధి, స్కూళ్లలో వసతుల మెరుగుదలకు, టీచర్స్ మెడికల్ బిల్స్, ఇంక్రిమెంట్స్కు సబంధించి ఫైల్స్ పెండింగ్ లో పడిపోతున్నాయి.
జిల్లాలోని 20 కస్తూర్భాగాంధీ బాలికల విద్యాలయాలు (కేజీబీవీ)ల్లో పనిచేసే కాంట్రాక్ట్ రెసిడెన్షియల్ టీచర్స్ (సీఆర్టీ) సమ్మె చేస్తుండటంతో సిలబస్ ఆగిపోయింది. దీంతో పదో తరగతి పరీక్షలు సమీపిస్తుండటంతో స్టూడెంట్స్, పేరెంట్స్ ఆందోళన చెందుతున్నారు. స్పెషల్ ఆఫీసర్లు కూడా సమ్మెలో పాల్గొంటుండటంతో కేజీబీవీల నిర్వహణ దెబ్బతిన్నది. కంప్యూటర్ ఆపరేటర్లు విధులకు హాజరుకాకపోవడంతో విద్యార్థులకు సంబంధించిన వివరాల ఆన్లైన్, ఉన్నతాధికారులకు రిపోర్టులు పంపడం నిలిచిపోయింది. హైస్కూళ్లలో పనిచేసే పార్ట్ టైం ఇన్స్ట్రక్టర్ లు సమ్మె చేస్తుండటంతో కంప్యూటర్, ఆర్ట్ , ఫిజికల్ ఎడ్యుకేషన్ నిలిచిపోయింది. క్లస్టర్ రీసోర్స్ పర్సన్ (సీఆర్పీ)లు సమ్మెలో పాల్గొంటుండటంతో స్కూల్ల పర్యవేక్షణ కొరవడింది. ఐఆర్సీల సమ్మెతో భవిత సెంటర్ లు పనిచేయక దివ్యాంగ విద్యార్థులు ఇబ్బందులు ఎదుర్కొంటున్నారు.
ఆఫీస్లలో పనులు జరగక...
ఎమ్మార్సీలలో పనిచేసే ఎంఐఎస్ కోఆర్డినేటర్లు, కంప్యూటర్ ఆపరేటర్లు విధులు బహిష్కరించడంతో టీచర్లకు సంబంధించిన మెడికల్ బిల్లులు, లీవ్ లకు సంబంధించిన పలు ప్రొసీడింగ్ లు, ఇంక్రిమెంట్ ప్రొసీడింగ్ లు ఆగిపోయాయి. స్కూల్ లకు చేరాల్సిన మధ్యాహ్న భోజన బియ్యం ఆలస్యం అవుతోంది. స్టూడెంట్స్ యూనిఫాంల డిక్లరేషన్లు సమయానికి అందకపోవడం వల్ల కుట్టడం ఆలస్యం అవుతోంది. స్కూల్లకు సంబంధించిన ఇన్ఫ్రాస్ట్రక్చర్, ఇతర వసతుల వివరాలు ఆన్లైన్ నమోదు, స్టూడెంట్స్ బయోమెట్రిక్ హాజరు, మార్కులు ఆన్లైన్ చేయడం, అమ్మ ఆదర్శ పాఠశాలకు, మన ఊరు మన బడి స్కీంలకు సంబంధించిన రిపోర్టులు, ఎస్ ఎస్ సీ పరీక్షల నామినల్ రోల్స్ ఉన్నతాధికారులకు పంపడం ఆలస్యం అవుతోంది. అలాగే బడి బయట పిల్లలకు సంబంధించిన సర్వే నిలిచిపోయింది.
డీఈఓ ఆఫీస్లో పనిచేసే ఎస్ ఎస్ ఏ ఉద్యోగులు సైతం సమ్మెలో ఉండటంతో ప్రభుత్వం నుంచి వచ్చే ఉత్తర్వులు, ఆదేశాలు మండలాలకు పంపడం, జిల్లా నుంచి ఉన్నతాధికారులకు రిపోర్ట్లు పంపడానికి ఆవరోధం ఏర్పడింది.
