దీపావళి నోముల గురించి అందరికీ తెలుసుంటది. కానీ కొన్ని జిల్లాల్లో సంక్రాంతికి కూడా నోములు నోచుకుంటారనే విషయం తెలియకపోవచ్చు. కన్నె నోము, పెళ్లి నోము, పొట్ట గరిజెలు, బాలింత కుండలు అంటూ రకరకాలుగా ఉంటాయి. ఈ నోముల్ని పుట్టింటి వాళ్లు పట్టిస్తారు. కొన్ని చోట్ల అత్తింటివాళ్లకు ఉన్నా నోచుకుంటారు. ఈ నోమును మకర సంక్రాంతి రోజు నోచుకుంటారు.
- కన్నె నోములో.. చిన్న పిల్లల చేత పదమూడు బొమ్మలు, అద్దం, బొట్టు దగ్గరి నుంచి పెన్సిళ్ల వరకు చాలావాటితో నోము చేయిస్తారు. పూజ అయ్యాక వాటిని పదమూడు మంది ముత్తైదువులకు ఇచ్చి పంపుతారు.
- అలాగే పెళ్లి నోములో.. మంచం మీద బియ్యం పోసి, దంపతులతో పదమూడు గురుగులకు పూజ చేయిస్తారు.
- ఇక పొట్ట గరిజెలు అంటే.. గర్భిణుల చేత చేయించే నోము. ప్రసవం హాయిగా జరగాలని, తల్లీబిడ్డలిద్దరూ ఆరోగ్యంగా ఉండాలని గౌరమ్మను కోరుకుంటారు. 13 జతల గరిజెలతో పూజ చేసి వాయినం ఇస్తారు.
- ఇక ప్రసవం తరువాత బాలింత కడవలు అనే నోము చేయిస్తారు. దీనికి ఐదుకుండలు (లేదా బిందెలు) గౌరమ్మ ముందు పెట్టి పూజ చేస్తారు.
