రామడుగు, వెలుగు: కరీంనగర్ జిల్లా రామడుగు మండలంలోని గోపాల్రావుపేటలో గ్రామసభ నిర్వహించకుండానే ఇండ్ల స్థలాలకు లబ్ధిదారులను ఎంపిక చేసినందుకు నిరసనగా సర్పంచ్ కర్ర సత్యప్రసన్నరెడ్డి, పాలకవర్గ సభ్యులు గ్రామపంచాయతీ ముందు నిరసన తెలిపారు. ఈ సందర్భంగా సర్పంచ్ మాట్లాడుతూ.. గ్రామంలో చాలా మంది నిరుపేదలు ఉన్నారని, ఇండ్ల స్థలాలు ఇవ్వడానికి గ్రామసభ ద్వారా అర్హులను ఎంపిక చేయాలని ఆఫీసర్లను డిమాండ్ చేశారు. గ్రామంలో గుంటకు రూ.15లక్షల విలువ ఉందని, ఇంత ఖరీదైన భూమిని గ్రామసభ పెట్టకుండా లబ్ధిదారులను ఎంపిక చేయడం కరెక్ట్ కాదన్నారు. ఈ విషయంపై తహసీల్దార్ను ఫోన్ ద్వారా వివరణ కోరితే పాలకవర్గానికి చెప్పాలని ఏమీ లేదని సమాధానం ఇచ్చారన్నారు. స్థల కేటాయింపు, స్థలాలు ఎవరెవరికి ఇస్తున్నారో వారి లిస్టు కూడా ఇవ్వడం లేదని సర్పంచ్ వాపోయారు. కలెక్టర్ విచారణ జరిపించి గ్రామసభ ద్వారా లబ్ధిదారులను ఎంపిక చేయాలని డిమాండ్ చేశారు.
