యాదాద్రి, వెలుగు: ‘పార్టీలో కొత్త లీడర్ల చేరడం మంచిదే. కానీ వారిలో కొందరు సర్పంచ్లనే పట్టించుకోవడం లేదు. కొత్తగా చేరిన వాళ్లకు సీడీఎఫ్ వర్క్స్ ఇవ్వడంపై సర్పంచ్లు అసంతృప్తిగా ఉన్నారు. దీనివల్ల పార్టీకి నష్టం జరుగుతోంది”అని పలువురు బీఆర్ఎస్ లీడర్లు వాపోయారు. శనివారం యాదాద్రి జిల్లా తుర్కపల్లిలో జరిగిన ఆత్మీయ సమ్మేళనంలో లోకల్ లీడర్లు, ప్రజాప్రతినిధులు తమ గోడు వెళ్లబోసుకున్నారు. లీడర్లు, క్యాడర్ మధ్య సమన్వయం లోపించిందన్నారు. లీడర్లతో సఖ్యత లేకపోవడం వల్లే కొందరు సర్పంచులు ఈ మీటింగ్కు రాలేదని చెప్పారు. వారితో పెద్ద లీడర్లు మాట్లాడాలని, ఎన్నికల టైమ్లో నష్టాన్ని నివారించడానికి కో ఆర్డినేషన్ కమిటీ ఏర్పాటు చేయాలని సూచించారు. మొదటినుంచి పార్టీలో ఉన్నా తమను పట్టించుకోకపోవడం, ఇతర పార్టీల్లోంచి వచ్చినవారికి పనులు జరుగుతుండడంతో కేడర్ నారాజ్గా ఉందన్నారు.
రుణమాఫీపై రైతుల్లో వ్యతిరేకత
మళ్లీ ఎన్నికలు వస్తున్నా ఇంకా రూ. లక్ష రుణమాఫీ కాకపోవడంపై రైతుల్లో వ్యతిరేకత ఉందని వారు అన్నారు. తన ఇంట్లో వారికే పింఛన్ ఇప్పించుకోలేక పోయానని ఓ లీడర్ ఆవేదన వ్యక్తం చేశారు. గృహలక్ష్మి స్కీంలో పార్టీ వారికే ప్రయారిటీ ఇవ్వాలని కోరారు. గ్రామాల్లో బీఆర్ఎస్ సర్కార్ ఎంతో డెవలప్ చేస్తోందని సీఎం కేసీఆర్ దత్తత గ్రామమైన వాసాలమర్రి సర్పంచ్ పోగుల ఆంజనేయులు తెలిపారు. ‘‘వాసాలమర్రిలో సమస్యలున్నాయి. .అవి ఎమ్మెల్యే సునీతకు తెలుసు. సమస్యలన్నీ సీఎం దృష్టికి తీసుకెళ్లండి”అని కోరారు. ఆలేరు ఎమ్మెల్యే గొంగిడి సునీత, ఎమ్మెల్సీ యాదవరెడ్డి, మాజీ ఎమ్మెల్యేలు మోత్కుపల్లి నర్సింహులు, బూడిద భిక్షమయ్య గౌడ్, డీసీసీబీ చైర్మన్ గొంగిడి మహేందర్రెడ్డి, ఆలేరు మార్కెట్ కమిటీ చైర్మన్ గడ్డమీది రవీందర్ గౌడ్, ఎంపీపీ భూక్యా సుశీల రవీందర్ నాయక్ పాల్గొన్నారు.
