- సర్కారు స్కూళ్లలోని అమ్మాయిలకు ‘సర్వ శిక్ష’ స్పెషల్ ట్రైనింగ్
- కొనసాగుతున్న మార్షల్ ఆర్ట్స్లో శిక్షణ
- గర్ల్ చైల్డ్ ఎంపవర్మెంట్ క్లబ్ల ద్వారా అన్ని సొసైటీల గురించి అవగాహన
హైదరాబాద్ సిటీ, వెలుగు : ప్రభుత్వ స్కూళ్లలో చదువుతున్న అమ్మాయిలను చిన్నతనం నుంచే మానసికంగా, శారీరకంగా ధృడంగా ఉంచేందుకు ‘సర్వశిక్ష’ చర్యలు తీసుకుంటోంది. విపత్కర పరిస్థితుల్లో వారిని వారు రక్షించుకునేలా సెల్ఫ్డిఫెన్స్లో ప్రత్యేక శిక్షణ ఇప్పిస్తోంది. హైదరాబాద్ జిల్లాలోని హైస్కూల్స్, అప్పర్ప్రైమరీ స్కూళ్లలో చదివే అమ్మాయిలకు ‘రాణీ లక్ష్మీబాయి ఆత్మ రక్ష ప్రక్షిక్షణ్’ పేరుతో కరాటే, తైక్వాండో, ఉషూ, జూడో, మార్షల్ఆర్ట్స్లో తర్ఫీదు ఇప్పిస్తోంది. ప్రస్తుతం జిల్లాలోని 211 ప్రభుత్వ హైస్కూల్స్, అప్పర్ ప్రైమరీ స్కూళ్లలో ఈ ట్రైనింగ్నడుస్తోంది. ఒక్కో స్కూల్లో మూడు నెలల పాటు...వారానికి 3 సెషన్ల చొప్పున నెలకు12 సెషన్లు ట్రైనింగ్ఉంటుంది.
అన్ని అంశాలపై అవగాహన కోసం...
ఆత్మరక్షణే కాకుండా సమాజం ఎలా ఉంది? దాన్ని ఏ దృష్టి కోణంతో చూడాలి? సమస్య వచ్చినప్పుడు దాన్ని ఎలా ఎదుర్కోవాలి అన్న అంశాలపై కూడా సర్కారు బడుల్లోని అమ్మాయిలకు అవగాహన కల్పిస్తున్నారు. ఇందులో భాగంగా జిల్లాలోని హైస్కూళ్లలో గర్ల్ చైల్డ్ఎంపర్మెంట్ క్లబ్స్(జీసీఈసీ)లను ఏర్పాటు చేస్తున్నారు. 100 స్కూళ్లలో ఈ జీసీఈసీల ఏర్పాటే లక్ష్యంగా ముందుకు కదులుతున్నారు. ఈ క్లబ్బుల ద్వారా గుడ్టచ్, బ్యాడ్టచ్, ఈవ్టీజింగ్, చైల్డ్ మ్యారేజెస్, ఫినాన్సియల్ లిటరసీ, ఆరోగ్యం, హింస తదితర అంశాలపై అవగాహన వచ్చేలా క్లాసులు చెప్తారు. ఏదైనా సమస్య వస్తే ఎవరిని సంప్రదించాలి?
ఎలా కంప్లయింట్చేయాలి? అనేది వివరిస్తారు. ఈ క్లబ్బులకు చైర్మన్గా హెడ్మాస్టర్, మెంబర్లుగా స్టూడెంట్స్ తో ఫ్రెండ్లీగా ఉండే టీచర్,14మంది అమ్మాయిలు, స్థానిక పీఎస్నుంచి లేడీ కానిస్టేబుల్ఉంటారు. స్కూళ్లలో అత్యవసర పరిస్థితుల్లో సంప్రదించాల్సిన ఫోన్నంబర్లను ఏర్పాటు చేయడంతో పాటు, అమ్మాయిలు తమ సమస్యలను తెలియచేయడానికి ప్రత్యేకంగా కంప్లయింట్బాక్స్ఏర్పాటు చేస్తారు. కమిటీ ఈ కంప్లయింట్బాక్స్ను చెక్ చేస్తుంది.
మా కష్టం ఫలిస్తోంది....
అమ్మాయిలు తమను తాము సెల్ఫ్ప్రొటెక్ట్ చేసుకోవడానికి మార్షల్ఆర్ట్స్ఉపయోగపడుతుంది. ఇప్పటికే ట్రైనింగ్తీసుకున్న వారు మనోధైర్యంతో ఉంటున్నారు. గర్ల్ ఎంపవర్మెంట్ క్లబ్స్అమ్మాయిల్లో ఆత్మవిశ్వాసాన్ని పెంచుతున్నాయి. కెరీర్గైడెన్స్, స్కూల్స్, ఇండ్లు, బయటి ప్రదేశాల్లో జరిగే గుడ్టచ్, బ్యాడ్టచ్, కన్ఫ్యూజన్ టచ్గురించి వివరంగా చెప్తున్నాం. ఇవి అమ్మాయిలను మానసికంగా, శారీరకంగా ధృడంగా చేస్తున్నాయి.
– రజిత, సర్వశిక్షా కో ఆర్డినేటర్, హైదరాబాద్ జిల్లా
