వరంగల్, వెలుగు: ఓరుగల్లులో ఆరోగ్యశ్రీ సేవలు అందించే క్రమంలో పలు ప్రైవేట్ హాస్పిటల్స్ అక్రమాలకు పాల్పడుతున్న నేపథ్యంలో హైదరాబాద్‍లోని ఆరోగ్యశ్రీ ట్రస్ట్, విజిలెన్స్ ఎన్‍ఫోర్స్మెంట్‍ అధికారులు విచారణ చేపట్టారు. ప్రైవేట్ హస్పిటల్స్లో ఆరోగ్యశ్రీ స్కీం అక్రమాలపై వెలుగు మెయిన్ పేపర్‍ లో ఈ నెల 14న ‘ఆరోగ్యశ్రీ ట్రీట్‍మెంట్‍ కావాలా? బిల్లులో 50 శాతం కట్టాల్సిందే’ హెడ్డింగ్‍తో వార్త ప్రచురించింది.
అదేరోజు కొందరు బాధితులు తమకు జరిగిన అన్యాయాన్ని ఫిర్యాదు రూపంలో ట్రస్ట్ పెద్దలతో పాటు కలెక్టర్‍ దృష్టికి తీసుకెళ్లారు. దీంతో ఆరోగ్యశ్రీ ట్రస్ట్ అధికారులు స్పందించారు. విజిలెన్స్ ఏసీపీతో పాటు చీఫ్‍ మెడికల్‍ ఆడిటర్‍ డాక్టర్‍ దయానంద్‍ రెండ్రోజుల పాటు గ్రేటర్‍ వరంగల్లో పర్యటించారు. ఎక్కువ ఫిర్యాదులు అందిన హనుమకొండ, వరంగల్లోని హాస్పిటల్స్కు వెళ్లారు. ఆరోగ్యశ్రీ ఉద్యోగులతో సంబంధం లేకుండా ఆకస్మిక తనిఖీలు నిర్వహించారు. కొందరు బాధితులతో మాట్లాడారు. కలెక్టర్‍ను కలిసి హాస్పిటల్స్ అక్రమాలపై చర్చించారు.
వరంగల్ కలెక్టర్‍ సత్య శారద సైతం డీఎంహెచ్ వోలతో రివ్యూ నిర్వహించారు. ప్రైవేట్ హాస్పిటల్స్లో దోపిడీని ఉపేక్షించకుండా చర్యలు తీసుకోవాలని ఆదేశించారు. రాష్ట్ర ప్రభుత్వం పేద పేషెంట్లకు సూపర్ స్పెషాలిటీ ట్రీట్‍మెంట్‍ అందించేందుకు గతంలో ఉన్న ఆపరేషన్‍ చార్జీలను 25 శాతం పెంచింది. కాగా, వరంగల్లో పదుల సంఖ్యలో ప్రైవేట్ హాస్పిటల్స్ యాజమాన్యాలు బాధితులను తప్పుదారి పట్టించి ట్రీట్‍మెంట్‍ చార్జీల్లో 50 శాతం డబ్బులు వసూలు చేసినట్లు ఆరోపణలున్నాయి.
వరంగల్, హనుమకొండ ప్రాంతాల్లో కిడ్నీ, ఆర్థోపెడిక్‍, గ్యాస్ట్రో, కార్డియాలజీ హాస్పిటల్స్లో పలువురు పేషెంట్ల వద్ద ఇదే తరహాలో వసూలు చేశారు. ఆరోగ్యశ్రీ సేవల గురించి తెలియని బాధితులు.. డాక్టర్లు చెప్పింది నమ్మి సొంత డబ్బులతో ప్రైవేట్లో చికిత్స చేసుకోవాల్సి వచ్చింది. ఇదే పేషెంట్ల పేరుతో హస్పిటల్స్ ఆరోగ్యశ్రీ బిల్లులు పెట్టుకున్నారు.
