ఇప్పుడు జనానికి ఉన్న సెల్ఫీ పిచ్చి అంతా ఇంతా కాదు. పెళ్లికెళ్లినా, ఏదైనా ఫంక్షన్కు పోయినా కావాల్సినోళ్లు కనిపిస్తే చాలు స్మైల్ అంటూ చెయ్యి పైకెత్తి ఫోన్ ఫ్రంట్ కెమెరాతో సెల్ఫీ క్లిక్మనిపించేస్తారు. ఈసారి ఒక చిన్న చేంజ్ చేద్దామా? మనకు మనమే సెల్ఫీ తీసుకునే బదులు ఓ రోబోతో సెల్ఫీ తీసేసుకుంటే ఎట్లుంటది? ఆ రోబో ఇదే. సెల్ఫీలు తీయడమే కాదు, ఆ ఫొటోలను వెంటనే ఈమెయిల్కు దాని నుంచే పంపించుకోవచ్చు. ‘ఈవా ఫొటోగ్రఫీ రోబో’ అని దాన్ని పిలుస్తున్నారు. బర్మింగ్హాంకు చెందిన సర్వీస్ రోబో అనే సంస్థ దానికి రూపునిచ్చింది. పెళ్లిళ్లు, ఇతర ఫంక్షన్లకు ఈ సెల్ఫీ రోబోలను అద్దెకిస్తుంది.
కావాలంటే కొనుక్కోవచ్చు కూడా. బర్మింగ్హాంకే చెందిన ఓ జంట తమ పెళ్లిలో ఈ రోబోతోనే ఫొటోలు తీయించుకుంటే కొత్తగా ఉంటుందని భావించి ఈవాను అద్దెకు తెచ్చుకున్నారు. వాళ్ల పెళ్లితో పాటు ఈవా పేరు మార్మోగిపోయింది. పెళ్లికొచ్చిన చుట్టపక్కాలతో పాటు ఫ్రెండ్స్ ఎంచక్కా ఈవాతో సెల్ఫీలు తీయించుకున్నారు. ఈవా టచ్స్క్రీన్పై ఉన్న ఆప్షన్లను క్లిక్ చేసి పర్ఫెక్ట్ సెల్ఫీ దిగొచ్చు. దీని అద్దె ధర మాత్రం పేలిపోతుంది. ఒక్కసారి 8 గంటలు మాత్రమే అద్దెకిస్తారు. దానికయ్యే ఖర్చు 500 పౌండ్లు. దాదాపు ₹44 వేలు. వ్యాట్ కలిపితే 750 పౌండ్లు. మన పైసలల్ల అయితే దగ్గరదగ్గర ₹65 వేలు. బర్మింగ్హాం నుంచి దూరంగా వెళ్లాలంటే మాత్రం డెలివరీ చార్జీలు వేస్తారు. టెక్నాలజీ అంతా తమదే అయినా, దాని బాడీ మాత్రం చైనాదని కంపెనీ చెప్పింది.
