నాగర్కర్నూల్/కందనూలు, వెలుగు: మాజీ మంత్రి, కాంగ్రెస్ సీనియర్ నేత నాగం జనార్ధన్ రెడ్డి శనివారం చేపట్టిన మార్కండేయ లిఫ్ట్పనుల పరిశీలన ఉద్రిక్తతకు దారి తీసింది. నాగర్కర్నూల్ జిల్లా బిజినేపల్లి మండలం శాయిన్పల్లి సమీపంలోని పైలాన్ సమీపంలో కాంగ్రెస్, బీఆర్ఎస్ లీడర్లు, కార్యర్తల మధ్య తోపులాట జరిగింది. కాంగ్రెస్ లీడర్ వాల్యానాయక్ను చుట్టుముట్టిన బీఆర్ఎస్ కార్యకర్తలు ఆయనను కిందపడేసి గొంతుపై కాలు పెట్టి తొక్కారు. తోపులాట, వాగ్వాదంతో పరిస్థితి ఉద్రిక్తంగా మారింది. ఇంత గొడవ జరుగుతున్నా సమీప పరిసరాల్లో ఎక్కడా పోలీసులు కనిపించలేదు. ప్రాజెక్టు పనులను అడ్డుకునేందుకే నాగం వస్తున్నాడని బీఆర్ఎస్ లీడర్లు బిజినేపల్లి ఎంపీపీ శ్రీనివాస్గౌడ్, వైఎస్ ఎంపీపీ చిన్నారెడ్డి, కృష్ణారెడ్డి, తిరుపతిరెడ్డి, శంకర్ ఆగ్రహం వ్యక్తం చేశారు. కాంగ్రెస్ లీడర్లను సైట్ దగ్గరికి పోనివ్వబోమని పట్టుబట్టారు. కాంగ్రెస్ లీడర్లు, కార్యకర్తలు వెనుదిరగడంతో వివాదం సద్దుమణిగింది.
7,310 ఎకరాలకు నీరిచ్చేందుకు..
నాగర్కర్నూల్ నియోజకవర్గం బిజినేపల్లి మండలం నుంచి వెళ్లే కేఎల్ఐ ప్యాకేజీ 29లోని మెయిన్కెనాల్నుంచి నీటిని మార్కండేయ చెరువుకు లిఫ్ట్ చేసి 5 గ్రామాలు,17 గిరిజన తండాల్లోని 7,310 ఎకరాలకు సాగునీరు అందించే పనులకు 2022లో మంత్రి కేటీఆర్ శంకుస్థాపన చేశారు. పరిపాలన అనుమతులిచ్చి చేతులు దులుపుకొన్నారని నాగం శుక్రవారం నాగర్కర్నూల్లో నిర్వహించిన ప్రెస్మీట్లో ఆరోపించారు. శనివారం కాంగ్రెస్ పార్టీ ఆధ్వర్యంలో మార్కండేయ లిఫ్ట్ పైలాన్నుంచి పనులను పరిశీలిస్తామని ప్రకటించారు. శనివారం ఉదయం నాగం నాయకత్వంలో పైలాన్ వద్దకు వెళుతుండగా బీఆర్ఎస్ లీడర్లు అడ్డుకున్నారు. నాలుగేండ్ల కింద మొదలుపెట్టిన మార్కండేయ లిఫ్ట్లో ఇప్పటివరకు తట్టెడు మన్నూ తీయలేదని నాగం ఆరోపించారు. అవసరమైతే శిలాఫలకం వద్ద దీక్షకు కూర్చుంటానని చెప్పారు. దౌర్జన్యాలకు పాల్పడుతున్న ఎమ్మెల్యే మర్రి జనార్థన్ రెడ్డి పద్ధతి మార్చుకోవాలని హెచ్చరించారు. ఘర్షణపై కాంగ్రెస్ లీడర్లు బిజినేపల్లి పోలీస్స్టేషన్లో ఫిర్యాదు చేశారు.
