- నిజామాబాద్ జిల్లా చేపూర్లో ఘటన
- జిల్లా హాస్పిటల్ కు తరలింపు
ఆర్మూర్, వెలుగు : నిజామాబాద్ జిల్లా ఆర్మూర్ మండలం చేపూర్ గ్రామంలో ఆదివారం పిచ్చికుక్కలు దాడి చేసి ఏడుగురిని గాయపరిచాయి. నాలుగు నుంచి ఐదు వరకు కుక్కలు రోడ్లపై నుంచి వెళ్తూ కనిపించినవారినల్లా కరిచాయి. ఈ ఘటనలో వేల్పుల నర్సయ్య, పోసాని, లత, రాజ గంగారాం , బట్టు లాస్య, లలిత, కళ తీవ్రంగా గాయపడ్డారు. కొంతమందిని కాళ్లపై కరవగా కింద పడడంతో తల, కండ్లు, మూతి, ఇతర శరీర భాగాలపై దాడి చేశాయి. గాయపడిన వారిని108లో ఆర్మూర్ ఏరియా దవాఖానకు తరలించారు. అక్కడి డాక్టర్లు ఫస్ట్ఎయిడ్చేసి నిజామాబాద్ హాస్పిటల్ లో చేర్పించారు.
వరంగల్లో మహిళపై వీధికుక్క దాడి
కాశీబుగ్గ(కార్పొరేషన్): వరంగల్ సిటీలో 18వ డివిజన్లో ఓ మహిళపై వీధికుక్క దాడి చేసింది. పట్టణానికి చెందిన సునీత తన ఇద్దరు పిల్లలతో కలిసి రోడ్డుపై వెళ్తుండగా వీధి కుక్కలు ఎగబడ్డాయి. దీంతో ఆమె తన పిల్లలను వాటికి అందకుండా చేస్తూనే తరమడానికి ప్రయత్నించింది. ఈ క్రమంలో ఓ కుక్క ఆమెపై దాడి చేసి గాయపర్చింది. అక్కడున్న వారు వచ్చి కుక్కలను వెళ్లగొట్ట మహిళను దవాఖానకు తరలించారు.
