మా కులాలను బీసీలో చేర్చండి

మాకు తీవ్ర అన్యాయం జరుగుతున్నది
బీసీ కమిషన్ను కోరిన 26 కుల సంఘాల నేతలు
10 ఉమ్మడి జిల్లాల్లో ముగిసిన పబ్లిక్ హియరింగ్
డిసెంబర్ మొదటి వారంలో ప్రభుత్వానికి నివేదిక

హైదరాబాద్, వెలుగు: రాష్ట్ర ఆవిర్భావం తర్వాత బీసీ వర్గం నుంచి తొలగించిన 26 కులాలను మళ్లీ అందులోనే చేర్చాలని పలువురు నేతలు బీసీ కమిషన్ను కోరారు. బీసీ వర్గం నుంచి తొలగించడంతో తమకు తీవ్ర అన్యాయం జరుగుతున్నదని తెలిపారు. 10 ఉమ్మడి జిల్లాల్లో పబ్లిక్ హియరింగ్ ముగిసింది. సోమవారం ఖైరతాబాద్లోని బీసీ కమిషన్ ఆఫీస్లో హైదరాబాద్ వాసులు, కుల సంఘాల కోసం కమిషన్.. పబ్లిక్ హియరింగ్ నిర్వహించింది. మంగళవారం కూడా కొనసాగనున్నది. సుమారు 58 సంఘాలు, 600 మంది హాజరయ్యారు. తమకు జరుగుతున్న అన్యాయాన్ని బీసీ కమిషన్ చైర్మన్ గోపిశెట్టి నిరంజన్, సభ్యులు బాలలక్ష్మి, సురేందర్, జయప్రకాశ్కు వినతిపత్రాలు, సలహాలు, సూచనలు, అఫిడవిట్ల రూపంలో అందజేశారు.

జనాభా ప్రాతిపదికన బీసీలకు రిజర్వేషన్లు ఇవ్వాలని, ఎంబీసీల్లో ఉన్న సంచార జాతులకు తీవ్ర అన్యాయం జరుగుతున్నదని వివరించారు. బీసీల్లో కేవలం 5 కులాలకే నిధులు, ప్రభుత్వ పథకాలు అందుతున్నాయని బీసీ కమిషన్ దృష్టికి తీసుకెళ్లారు. ఈ సందర్భంగా బీసీ కమిషన్ చైర్మన్ నిరంజన్ మాట్లాడారు. జనాభాకు అనుగుణంగా బీసీలకు రిజర్వేషన్లతో పాటు ఏ, బీ, సీ వర్గీకరణ కోసం కుల గణన ఉపయోగపడుతుందన్నారు. గణనలో వివరాలు అందించనివాళ్లు వెంటనే ఇవ్వాలని కోరారు.

కుల గణనకు సహకరించండి: గోపిశెట్టి నిరంజన్

రాష్ట్రంలో ఏ కులంలో.. ఎంత మంది ఉన్నారో అధికారిక లెక్కలు లేవని నిరంజన్ తెలిపారు. ‘‘ఓటర్ లిస్ట్ ప్రకారం కులాల వారీగా జనాభా తెలియదు. ఇంటింటి సర్వే ద్వారానే తెలుస్తది. సిబ్బంది లేకపోవడంతో బాధ్యతలు ప్లానింగ్ డిపార్ట్మెంట్కు సీఎం రేవంత్ అప్పగించారు. జిల్లాల్లో పర్యటించినప్పుడు కుల గణన చేస్తున్న ఎన్యుమరేటర్లను కలిశాం. డేటా భద్రతపై కలెక్టర్లను అడిగి తెలుసుకున్నాం. ఫిల్ చేసిన అప్లికేషన్లను ట్రంక్ పెట్టెల్లో భద్రపరుస్తున్నట్లు కలెక్టర్లు చెప్పారు. 87వేల మంది ఎన్యుమరేటర్లు కుల గణనలో పాల్గొంటున్నారు. ఈ వివరాలను ప్రభుత్వం, బీసీ కమిషన్ హైకోర్టుకు అందజేస్తుంది.

10 జిల్లాల్లో నిర్వహించిన పబ్లిక్ హియరింగ్లో 1,224 వినతులు వచ్చాయి. వచ్చే నెల మొదటి వారంలో ప్రభుత్వానికి రిపోర్ట్ ఇచ్చేందుకు ప్రయత్నిస్తాం. తార్నాకలో ప్రశ్న పత్రాలు రోడ్డు మీదకు వచ్చాయనే వార్త విన్నాం. మేడ్చల్ కలెక్టర్కు రిపోర్ట్ అడిగినం. టూ వీలర్ మీద తీసుకెళ్తుంటే కింద పడ్డాయని కలెక్టర్ చెప్పారు. బాధ్యుడిగా ఉన్న సూపర్వైజర్ను సస్పెండ్ చేశామన్నరు’’అని నిరంజన్ చెప్పారు.