ముషీరాబాద్, వెలుగు: ప్రైమరీ స్కూళ్లను నిర్లక్ష్యం చేయొద్దని, ప్రభుత్వ విద్యారంగాన్ని బలోపేతం చేయాలని సెకండరీ గ్రేడ్ టీచర్స్ యూనియన్(ఎస్జీటీయూ) అధ్యక్ష, కార్యదర్శులు కరివేద మహిపాల్ రెడ్డి, అరికల వెంకటేశం డిమాండ్ చేశారు. ఆదివారం ఇందిరాపార్క్ ధర్నా చౌక్ లో ఉపాధ్యాయుల సమస్యలను పరిష్కరించాలని కోరుతూ ధర్నా నిర్వహించారు. కాంగ్రెస్ తన మేనిఫెస్టోలో పెట్టిన అంశాలను అమలు చేయాలని, పెండింగ్ఉన్న 5 డీఏలను, పీఆర్సీని వెంటనే ప్రకటించాలన్నారు.
10 వేల ప్రైమరీ స్కూళ్లకు హెడ్మాస్టర్ పోస్టులు మంజూరు చేసి, అర్హత కలిగిన ఎస్జీటీలకు ప్రమోషన్ ఇవ్వాలని కోరారు. ప్రాథమిక, ప్రాథమికోన్నత పాఠశాలల టీచర్లందరికీ ఉపాధ్యాయ ఎమ్మెల్సీ ఎన్నికల్లో ఓటు హక్కు కల్పించాలన్నారు. నాయకులు శ్రీనివాస్ రెడ్డి, రవీందర్, శ్రీనివాస్, నరేందర్ రెడ్డి తదితరులు పాల్గొన్నారు.
