హైదరాబాద్, వెలుగు: మహిళల్లో ఆరోగ్యంపై అవగాహన, సుస్థిరత, కమ్యూనిటీ స్పిరిట్ పెంచడమే లక్ష్యంగా మంగళవారం మోకిల పీజీ హిల్స్లో నిర్వహించిన శారీథాన్ సందడిగా సాగింది. గండిపేట వెల్ఫేర్ సొసైటీ ఆధ్వర్యంలో నిర్వహించిన కార్యక్రమంలో మహిళలు చీర కట్టులో మెరిశారు. ఈ సందర్భంగా ఏర్పాటు చేసిన 5కె, 3కె రన్ ను టీడీఎఫ్ కు చెందిన శారద నేరెళ్ల, గీతా భాస్కర్, భవాని, కృష్ణ ప్రియ, విశాల ప్రారంభించారు.
అనంతరం మహిళా పారిశ్రామిక వేత్తలుతమ ప్రొడక్టులను ప్రదర్శించారు. ఇండ్లల్లో ప్లాస్టిక్ వాడకాన్ని తగ్గించాలని, ఎకో ఫ్రెండ్లీ వస్తువులనే ఉపయోగించాలని గండిపేట వెల్ఫేర్ సొసైటీ మెంబర్ వాణి తిమ్మయ్యగారి మహిళలతో ప్రతిజ్ఞ చేయించారు. ప్రతిఒక్కరూ ఆరోగ్యంపై శ్రద్ధ పెట్టాలని, రోజూ తప్పనిసరిగా వ్యాయామం చేయాలని సూచించారు. అనంతరం వేస్ట్ మేనేజ్మెంట్ నిర్వహణతో పొల్యూషన్ను తగ్గించేందుకు కృషి చేస్తున్న మోకిల సంఘాలను అభినందించారు. పారిశుద్ధ్య కార్మికులకు గ్రీన్ అవార్డులు, చక్కని చీరకట్టులో పాల్గొన్న మహిళలకు అవార్డులు ఇచ్చారు.
