సనోబర్ పార్దివాలా.. ఈ పేరు విని ఉండకపోవచ్చు. ఈమెని చూసి ఉండకపోవచ్చు. కానీ, ఈమె పనిని చూసే ఉంటారు. అదెలాగంటారా? ఒకసారి ఐశ్వర్యారాయ్, మరోసారి దీపికా పదుకొనే.. ఇంకోసారి కత్రీనా, అలియా, ప్రియాంక, తాప్సీ.. ఇలా ముఖాలు మార్చుకుంటుంది ఈమె. ఈ హీరోయిన్లు సినిమాల్లో చేసే సాహసాల్ని... వాళ్లకి బదులు సనోబర్ చేస్తుందన్న మాట. ‘ధూమ్–2, విలన్, బ్యాంగ్ బ్యాంగ్, జగ్గూ జాసూస్, వీర్జారా, రామ్లీలా... ఇలా దాదాపుగా 250 సినిమాలకి స్టంట్విమెన్గా చేసిన సనోబర్ సెలబ్రిటీ ఫిట్నెస్ ట్రైనర్ కూడా. మార్షల్ ఆర్ట్స్ నేర్చుకుంది. ఎక్సర్సైజ్ సైకాలజిస్ట్గానూ పేరుంది. డీప్ సీ డైవర్, జిమ్నాసిస్ట్. కుంగ్ఫు, కిక్ బాక్సింగ్, క్రావ్ మాగా, ముయే థాయ్.. లాంటి వాటిపైనా మంచి పట్టుందీమెకి. సర్టిఫైడ్ పారా గ్లైడర్, స్కై డైవర్ కూడా. బాలీవుడ్లోని చాలామంది హీరోయిన్లకి న్యూట్రిషనిస్ట్ ట్రైనర్గానూ పనిచేస్తోంది. అయితే ఇదంతా పన్నెండేండ్ల వయసులో తను చేసిన ఒక కమర్షియల్ యాడ్ నుంచి మొదలైందని చెప్తోంది సనోబర్.
16 వ అంతస్తు నుంచి..
సనోబర్ పుట్టి, పెరిగిందంతా ముంబైలోనే. చిన్నప్పట్నించీ అడ్వెంచర్స్ చేయడం అంటే ఇష్టం. అందుకని జిమ్నాస్టిక్స్ క్లాసులకి వెళ్లింది. స్విమ్మింగ్ నేర్చుకుంది. పన్నెండేండ్లకే కరాటేలో బ్లాక్ బెల్ట్ సాధించింది. ఆ టైంలోనే ఓ డైమండ్ కంపెనీ కమర్షియల్ యాడ్కి డూప్ కావాలనే ప్రకటన కనిపించిందామెకి. ఆ యాడ్లో ఐశ్వర్యరాయ్ నటిస్తుందని తెలియడంతో క్షణం ఆలోచించకుండా ఆడిషన్కి వెళ్లింది. అక్కడికి వెళ్లాక నేలపై పల్టీలు కొట్టమన్నారు. హై జంప్ చేయమన్నారు. సనోబర్ టాలెంట్కి తోడు.. ఐశ్వర్యతో సరిసమానంగా ఎత్తు, రంగు ఉండటంతో వెంటనే ఓకే చేశారు. పదివేలు రెమ్యూనరేషన్ ఇచ్చారు. ఇరవై ఏండ్ల కిందట పదివేల రూపాయల పారితోషికం అంటే మామూలు విషయం కాదు. అలా ప్యాషన్నే ప్రొఫెషన్గా మార్చుకోవాలని సనోబర్ ఇండస్ట్రీ వైపు అడుగులేసింది. ఆ ప్రయత్నంలో ‘భూత్’ సినిమాలో హీరోయిన్కి డూప్గా 16 వ అంతస్తు నుంచి కిందకి దూకింది. ఆ ఫీట్ తర్వాత కెరీర్ గ్రాఫ్ పైపైకి పాకింది.
ఆ సాహసాలంటే ఇష్టం
చదువు కూడా కెరీర్కి తగ్గట్టే ఉండాలనుకుంది సనోబర్. అందుకే అమెరికన్ కాలేజీ ఆఫ్ స్పోర్ట్స్ మెడిసిన్లో ఫిట్నెస్, న్యూట్రిషన్లో డిగ్రీ చేసింది. కరాటే, సీ డైవింగ్లో అడ్వాన్స్డ్ కోర్సులు చేసింది. అదే టైంలో ఇండస్ట్రీ నుంచి అవకాశాలు అందుకుంది. ‘వీర్జారా’లో షారుక్ఖాన్తో కలిసి ప్రీతిజింటా ఎత్తైన బిల్డింగ్పై నుంచి దూకే స్టంట్ బాగా పేరు తెచ్చిందామెకి. ‘ధూమ్–2’ లో హృతిక్ రోషన్తో కలిసి చేసిన స్టంట్స్ బాలీవుడ్ ఫేవరెట్ స్టంట్ విమెన్ ట్యాగ్ తెచ్చిపెట్టింది. ‘రావణ్’ , ‘బ్యాంగ్ బ్యాంగ్’ సినిమాల్లో చేసిన ఫీట్లు ఇంటర్నేషనల్ స్టంట్ అవార్డ్స్కి నామినేట్ అయ్యాయి. బాలీవుడ్లో కరీనా కపూర్, అనుష్కా శర్మ, సోనాక్షి సిన్హా.. లాంటి స్టార్స్కి కూడా డూప్గా చేసింది సనోబర్.. అయితే కారు,బైక్లతో చేసే స్టంట్స్ ఎక్కువ ఎంజాయ్ చేస్తానంటోంది.
సవాళ్లు ఎదురయ్యాయి
ఈ జర్నీలో ఎన్నో సవాళ్లు ఎదురయ్యాయి అంటోంది సనోబర్. తాను ఇండస్ట్రీకి వచ్చిన కొత్తలో స్టంట్విమెన్ అనే కాన్సెప్ట్ లేకపోవడంతో అందరూ ఆమెని స్టంట్మెన్ అనే పిలిచేవాళ్లు. దాన్ని కరెక్ట్ చేయడానికి చాలా పోరాడాల్సి వచ్చిందామె. అన్నింటికీ మించి స్టంట్స్ కోసం ఫిజికల్గా ఫిట్గా ఉండటం ఓ సవాలు అంటుంది. అలాగే ఈ ప్రొఫెషన్లో వందకి వంద శాతం హార్డ్ వర్క్ ఉండాలి. అంత కష్టపడ్డా అన్నిసార్లు కాలం కలిసొస్తుందని చెప్పలేం. కోలుకోలేని గాయాలు అవ్వొచ్చు. ఒక ఏజ్ వచ్చాక.. స్టంట్ చేయడానికి బాడీ సహకరించదు. అందుకే స్టంట్విమెన్ అవ్వాలనుకునేవాళ్లు కచ్చితంగా ఒక బ్యాక్అప్ ప్లాన్ పెట్టుకోవాలి అని చెప్తుంది సనోబర్.
‘‘ కలశ్’ అనే హిందీ సీరియల్లో హీరోయిన్కి కాళ్లు, చేతులు కట్టేసి, నడుముకి ఒక రాయి కట్టి నదిలో ముప్పై అడుగుల కిందికి వదిలే సీన్ ఉంది. ఆ సీన్కి హీరోయిన్ డూప్గా నేనే చేశా. కిందికి దిగుతున్నా కొద్దీ కళ్లు కనిపించలేదు నాకు. ఆ టైంలో నా బ్రెయిన్ని నేను కంట్రోల్ చేసుకున్నా.. స్టంట్స్ చేసేటప్పుడు ఈ ఎబిలిటీ లేకపోతే ప్రాణానికే ప్రమాదం. అలాగే నీళ్లలో ఉన్నప్పుడు ప్రతి సెకన్ ముఖ్యమే.. స్టంట్స్ కేవలం శరీరంతో చేసేవి కాదు. శరీరంలోని ప్రతి అడుగు, కదలిక వెనుక ఒక లెక్క ఉండాలి. ఒక్కోసారి వేరేవాళ్ల పొరపాటు వల్ల గాయాలు అవ్వొచ్చు. వాటికి నేనెప్పుడూ సిద్ధమే’’ అంటోంది సనోబర్.
