నలిగిపోతున్నఅస్సాం రైఫిల్స్

అస్సాం రైఫిల్స్కి గొప్ప చరిత్ర ఉంది. మన దేశానికి 185 ఏళ్లుగా సెక్యూరిటీ సేవలు అందిస్తోంది. 1835లో ఏర్పడిన ఈ పారామిలటరీ ఫోర్స్ని సమాజానికి కుడి చెయ్యిలా, సైన్యానికి ఎడమ చెయ్యిలా చెప్పుకుంటారు. 1960ల్లో 17 బెటాలియన్లే ఉండగా, ఇప్పుడు 46,000 బెటాలియన్లు కలిగిన బలగంలా ఎదిగింది. ఇండిపెండెన్స్ తర్వాత జరిగిన యుద్ధాల్లో ఇండియా పైచేయి సాధించటంలో, నార్త్ ఈస్ట్లోని చొరబాట్ల కట్టడిలో కీలక పాత్ర పోషించింది. ఈ రైఫిల్స్పై పట్టు కోసం హోం, డిఫెన్స్ శాఖలు కొన్నేళ్లుగా పోటీ పడుతున్నాయి.

అస్సాం రైఫిల్స్… దేశంలోనే అత్యంత పాత పారామిలటరీ ఫోర్స్. ఈ బలగం పనితీరును ఆర్మీ, అడ్మినిస్ట్రేషన్ వ్యవహారాలను హోం శాఖ చూస్తున్నాయి. దీన్ని పూర్తిగా తన కంట్రోల్లోకి తెచ్చుకోవటానికి హోం శాఖ చేస్తున్న ప్రయత్నాలకు ఆర్మీ అడ్డు తగులుతోంది. ఈ గొడవ ఇప్పటిది కాదు. చాలా కాలంగా జరుగుతోంది. ఈ మధ్య మరోసారి తెరపైకి వచ్చింది. అస్సాం రైఫిల్స్ హండ్రెడ్ పర్సంట్ మా కంట్రోల్లోనే ఉండాలంటూ హోం శాఖ ఇచ్చిన ప్రపోజల్ ప్రస్తుతం ప్రధాని మోడీ దగ్గర పెండింగ్లో ఉంది. ‘కేబినెట్ కమిటీ ఆన్ సెక్యూరిటీ (సీసీఎస్)’ భేటీలో ఈ అంశం అటోఇటో తేలనుంది. దీనికి సంబంధించిన ఒక డ్రాఫ్ట్ నోట్ని హోం శాఖ సీసీఎస్ మీటింగ్లో ప్రవేశపెట్టనుంది. అస్సాం రైఫిల్స్ని ‘ఏ టూ జెడ్’ హోం శాఖకు అప్పగిస్తే నేషనల్ సెక్యూరిటీకి తీవ్ర సమస్యలు తలెత్తుతాయన్నది సైన్యం ఆందోళన. ముఖ్యంగా పొరుగు దేశం చైనాతో పేచీ ఉన్న బోర్డర్లో ఇబ్బంది రావచ్చని, అందువల్ల ఇప్పుడున్నట్లే కొనసాగించాలని కోరుతోంది. దీంతోపాటు మరో రిక్వెస్ట్ కూడా చేస్తోంది.

చైనాని దారికి తేవాలంటే..

సరి‘హద్దు’ మీరుతున్న చైనాకు మరింత గట్టిగా బుద్ధి చెప్పాలంటే ఇండో–చైనా బోర్డర్ వెంట గార్డ్ డ్యూటీలో తాను కూడా పాలుపంచుకుంటానని ఆర్మీ చెబుతోంది. ఆ బోర్డర్లో ఐటీబీపీ కాపలా కాస్తోంది. ఈ విషయంలో వెంటనే జోక్యం చేసుకోవాలని డిఫెన్స్ మినిస్ట్రీని ఈ మధ్యనే అడిగింది. హోం శాఖ ఆలోచన మరోలా ఉంది. అస్సాం రైఫిల్స్ ప్రస్తుతం ఇండియా–మయన్మార్ సరిహద్దులో రక్షణ పనులు చూస్తోంది. దీనిపై అజమాయిషీ అంతా తన చేతిలోకి వచ్చాక ‘ఇండో–టిబెటన్ బోర్డర్ పోలీస్ ఫోర్స్(ఐటీబీపీ)’లో కలిపేయాలని చూస్తోంది.

ఇండో–భూటాన్ బోర్డర్లో గస్తీ తిరుగుతున్న ‘సశస్త్ర సీమా బల్ (ఎస్ఎస్బీ)’ మరో ‘సెంట్రల్ ఆర్మ్డ్ పోలీస్ ఫోర్స్ (సీఏపీఎఫ్)’ అనే విషయం తెలిసిందే. ఐటీబీపీ, ఎస్ఎస్బీ… రెండూ కేంద్ర హోం శాఖ పరిధిలోకే వస్తాయి. అమిత్షా హోం శాఖ మంత్రిగా, ఆ శాఖ మాజీ సెక్రెటరీ రాజీవ్ గౌబా ఇప్పుడు కేబినెట్ సెక్రెటరీగా బాధ్యతలు చేపట్టాక ఇండో–భూటాన్ బోర్డర్లోని సెక్యూరిటీ ఆపరేషన్స్ అన్నింటినీ తామే టేకోవర్ చేయాలని అనుకుంటున్నారు. హోం శాఖ కంట్రోల్లోకి మొత్తంగా రాని ఒకే ఒక పారామిలటరీ ఫోర్స్ అస్సాం రైఫిల్స్ మాత్రమే. ఈ లోటును భర్తీ చేయటానికి అమిత్ షా, రాజీవ్ గౌబా తీవ్రంగా కసరత్తు చేస్తున్నారు. వాళ్ల ప్రపోజల్కి ప్రధాని మోడీ గనక ఓకే అంటే… అది అమిత్ షా సాధించిన అతి పెద్ద అచీవ్మెంట్ అవుతుందని ప్రభుత్వ వర్గాలు అంటున్నాయి. అస్సాం రైఫిల్స్ ఎప్పటి నుంచో ఎదుర్కొంటున్న చాలా సమస్యలు కూడా పరిష్కారమవుతాయని కొందరు అభిప్రాయపడుతున్నారు. మరికొందరేమో కొత్త గొడవలకు దారి తీస్తుందని విమర్శిస్తున్నారు.

2013లోనూ తెరపైకి..

అస్సాం రైఫిల్స్ వ్యవహారం యూపీఏ–2 హయాం (2013 జనవరి)లోనూ తెరపైకి వచ్చింది. ఇండో–మయన్మార్ బోర్డర్లో ఈ బలగానికి బదులు ‘బోర్డర్ సెక్యూరిటీ ఫోర్స్ (బీఎస్ఎఫ్)’ని పెట్టాలని హోం శాఖ ప్రతిపాదించింది. రైఫిల్స్ ఆపరేషనల్ కంట్రోల్ని తన పరిధిలోకి తెచ్చుకోవాలని చూసింది. సీసీఎస్ భేటీలో చర్చకు డ్రాఫ్ట్నీ రెడీ చేసింది. రైఫిల్స్ స్థానంలో బీఎస్ఎఫ్ని మోహరించాలనటంపై ఎలాంటి అభ్యంతరమూ చెప్పని డిఫెన్స్ మినిస్ట్రీ… దాని ఆపరేషనల్ కంట్రోల్ని వదులుకోవటానికి మాత్రం ససేమిరా అన్నది.

ఈ అంశం ఇప్పుడు ఢిల్లీ హైకోర్టుకు చేరింది. దీనిపై చర్చించటానికి కేబినెట్ సెక్రటరీ రాజీవ్ గౌబా.. డిఫెన్స్ మాజీ సెక్రెటరీ సంజయ్ మిత్రాతో భేటీ అయ్యారు. ఈ విషయాలన్నింటినీ హోం శాఖ కోర్టుకు వివరించింది. సీసీఎస్ తాజా భేటీలో తీసుకునే నిర్ణయానికి కట్టుబడి ఉంటానని చెప్పింది. దీంతో హైకోర్టు కేబినెట్ సెక్రెటరీకి నోటీసు జారీ చేస్తూ, సీసీఎస్ నిర్ణయాన్ని తమకు చెప్పాలని సూచించింది. ప్రధాని మోడీ ఏ నిర్ణయం తీసుకుంటారనే దానిపై ఆసక్తి నెలకొంది. ఈ విషయంలో భిన్న వాదనలు వినిపిస్తున్నాయి. గుర్తింపే పెద్ద సమస్య

అస్సాం రైఫిల్స్పై పెత్తనాన్ని రెండు శాఖలు పంచుకుంటూ ఉండటం వల్ల సవాలక్ష ఇబ్బందులు వస్తున్నాయని ఈ ఫోర్స్లో పనిచేసి రిటైరైనవాళ్లు చెబుతున్నారు. ‘అస్సాం రైఫిల్స్ ఎక్స్–సర్వీస్మెన్ వెల్ఫేర్’ పేరిట వీళ్లంతా ఒక అసోసియేషన్గా ఏర్పడి, తమ కష్టాలను ఇటీవల కోర్టు దృష్టికి తెచ్చారు. ఒక వైపు మిలటరీ, మరో వైపు పారా మిలటరీ బాధ్యతలు నిర్వహిస్తున్న అస్సాం రైఫిల్స్ని ‘పోలీస్ ఫోర్స్’ కేటగిరీగా ట్రీట్ చేయడం పక్షపాతంగా, హక్కుల ఉల్లంఘనగా మండిపడ్డారు. ఈ నేపథ్యంలో తమకు ఆర్మీతో సమానంగా పేమెంట్లు, అలవెన్స్లు, పెన్షన్లు, ఎక్స్సర్వీస్మెన్ ఫెసిలిటీస్ ఇచ్చేలా ప్రభుత్వాన్ని ఆదేశించాలని కోరారు. అస్సాం రైఫిల్స్ని కంప్లీట్గా డిఫెన్స్ మినిస్ట్రీ పరిధిలోకి తెచ్చేలా ఆదేశాలు జారీచేయాలని వారు కోర్టుకి విజ్ఞప్తి చేశారు. వాస్తవానికి అస్సాం రైఫిల్స్ని రెండు శాఖల పరిధిలో ఉంచాలని ‘గవర్నమెంట్ ఆఫ్ ఇండియా (అలొకేషన్ ఆఫ్ బిజినెస్) రూల్స్–1961’లో సైతం లేదు.

రిటైర్మెంట్కి ముందు, తర్వాత కూడా ఎలాంటి ప్రయోజనాలు లేకుండా సైనిక కమాండర్ల కింద ఆర్మీ డ్యూటీ చేస్తున్న పారామిలటరీ ఫోర్స్ కూడా అస్సాం రైఫిల్స్ మాత్రమే. ఈ బలగంపై అధికారం మొత్తం తామే చెలాయించే ఛాన్స్ కోసం హోం, డిఫెన్స్ మినిస్ట్రీలు ఎన్నో ఏళ్లుగా పోటీపడుతున్నాయి. ఇండో–చైనా యుద్ధం (1962) తర్వాత అస్సాం రైఫిల్స్పై ఆపరేషనల్ కంట్రోల్ని ఆర్మీకి ఇచ్చారు. ఇది జరిగిన మూడేళ్ల అనంతరం హోం శాఖను ఈ ఫోర్స్ పాలనా వ్యవహారాలకే పరిమితం చేస్తూ నిర్ణయం తీసుకున్నారు.

గుర్తింపే పెద్ద సమస్య

రైఫిల్స్ ఆపరేషనల్ కంట్రోల్ని హోం శాఖ పరిధిలోకి తెస్తే లాభం కన్నా నష్టమే ఎక్కువ జరుగుతుంది. రైఫిల్స్ని హోం శాఖ కంట్రోల్లోకి తెస్తే.. చివరికి అది గుర్రమూ, గాడిదా ఏదీ కాకుండా పోతుంది.

– కల్నల్ (రి) అజయ్ శుక్లా , డిఫెన్స్ కామెంటేటర్