బ్యాంక్​ లింకేజీ రుణాల్లో శివ్వంపేట మహిళలు టాప్

• లక్ష్యాన్ని మించి 126 శాతం రుణాలు
• మండల వ్యాప్తంగా దాదాపు 500 యూనిట్ల ఏర్పాటు 
• 99 శాతం రుణ రికవరీతో ఆదర్శం

మెదక్/ శివ్వంపేట, వెలుగు: మహిళల ఆర్థికాభ్యున్నతి కోసం రాష్ట్ర ప్రభుత్వం మహిళా శక్తి కార్యక్రమం ద్వారా బ్యాంక్​ లింకేజీ కింద అందజేస్తున్న రుణాల సద్వినియోగంలో శివ్వంపేట మండలం మెదక్​జిల్లాలో మొదటి స్థానంలో ఉంది. మండల వ్యాప్తంగా 870 సెల్ఫ్ హెల్ప్ గ్రూప్ లు ఉన్నాయి. వీటిలో 8,700 మంది మహిళలు మెంబర్లుగా ఉన్నారు. 2024 –- 25 ఆర్థిక సంవత్సరానికి బ్యాంక్ లింకేజీ లోన్ల టార్గెట్ రూ.26 కోట్లుగా నిర్ధారించారు. ఇప్పటి వరకు నిర్దేశిత లక్ష్యాన్ని అధిగమించి మండలంలోని వివిధ గ్రామాలకు చెందిన 275 సెల్ప్​హెల్ప్​గ్రూపులకు రూ.33.99 కోట్లు రుణాలు అందించడం విశేషం. 

ఎన్నో రకాల యూనిట్లు

బ్యాంక్​లింకేజీ ద్వారా అందిస్తున్న రుణాలతో మహిళా సంఘాల్లో సభ్యులైన మహిళలు స్వయం ఉపాధి కోసం వివిధ రకాల యూనిట్లను ఏర్పాటు చేసుకున్నారు.  పిండిగిర్ని, కిరాణా షాప్​లు, ఫ్యాన్సీ స్టోర్లు, టెంట్​హౌజ్​లు, హోటల్స్​ తదితర వ్యాపారాలు ఏర్పాటు చేసుకున్నారు. కొందరు వ్యవసాయ అవసరాలకు రుణాలను వినియోగించుకున్నారు. ఆయా వ్యాపారాలను సక్రమంగా నిర్వహించుకుంటూ ఆర్థికాభ్యున్నతి సాధిస్తున్నారు. బ్యాంక్​ లింకేజీ ద్వారా తీసుకున్న రుణాలను మహిళా సంఘాలు సకాలంలో తిరిగి చెల్లిస్తున్నాయి. రుణ రికవరీ 99 శాతం ఉండడం గమనార్హం. తీసుకున్న రుణాలను సకాలంలో తిరిగి చెల్లిస్తుండడంతో బ్యాంక్​లు మహిళా సంఘాలకు ఎక్కువ మొత్తంలో రుణాలు ఇస్తున్నాయి. 

500 యూనిట్లకు ఆర్థిక సాయం

మహిళలు ఆర్థికాభ్యున్నతి సాధించాలనే ఉద్దేశ్యంతో స్వయ ఉపాధి పథకాల కోసం బ్యాంక్​ లింకేజీ ద్వారా రుణాలు అందిస్తున్నాం. మండలంలో 500 యూనిట్లకు రూ.లక్ష నుంచి రూ.5 లక్షల వరకు రుణాలు అందజేశాం. మహిళా గ్రూపులకు రుణాలు ఇవ్వడంలో శివ్వంపేట మండలం జిల్లాలో మొదటి స్థానంలో ఉంది. మార్కెటింగ్​పై అవగాహన కల్పించాం. దీంతో రుణాలు తీసుకున్న అందరూ వ్యాపారాలు పెట్టుకుని లాభాలు ఆర్జిస్తున్నారు. ఇచ్చిన రుణాలను 99 శాతం రికవరీ చేశాం.   – వారాల సరిత, ఐకేపీ సీసీ, శివ్వంపేట 

రెస్టారెంట్​ పెట్టుకున్నా

మహిళా శక్తి ద్వారా రూ.5 లక్షల లోన్​ఇచ్చారు. ఆ మొత్తంతో మినీ రెస్టారెంట్ పెట్టుకున్నా. తీసుకున్న లోన్​లో 35 శాతం సబ్సిడీ వస్తుంది. ఇది మా కుటుంబానికి ఎంతో మేలు కలిగించే విషయం. రెస్టారెంట్ చాలా బాగా నడుస్తుంది. ఈ ప్రభుత్వం ఏర్పడ్డాక కొత్తగా మహిళా శక్తి ద్వారా మాలాంటి మహిళలందరికీ రుణాలు అందించడం సంతోషంగా ఉంది. 

నవనీత, ఎస్​హెచ్​జీ మెంబర్, పెద్ద గొట్టిముక్కుల

నా కాళ్ల మీద నేను నిలబడుతున్నా

మహిళా శక్తి ద్వారా రెండు లక్షలు లోను తీసుకొని పిండి గిర్ని ఏర్పాటు చేసుకున్నా. బయట పనికి వెళ్లకుండా సొంతంగా బిజినెస్​పెట్టుకుని డబ్బులు సంపాదిస్తూ నా కాళ్ల మీద నేను నిలబడ్డా. ప్రభుత్వం మహిళా శక్తి ద్వారా ఉపాధి కల్పించడం బాగుంది. 

సుమలత, రోహిణి గ్రూప్ ​మెంబర్, చిన్న గొట్టి ముక్కుల