మంత్రులు ఇన్చార్జులుగా ఉన్న గ్రామాల్లో టీఆర్ఎస్ వెనుకంజ

మల్లారెడ్డికి అప్పగించిన ఊర్లలో బీజేపీకి 450 ఓట్ల ఆధిక్యం
తలసానికి ఇచ్చిన ప్రాంతాల్లో బీజేపీకి 497 ఓట్ల లీడ్
జగదీశ్రెడ్డి, శ్రీనివాస్గౌడ్, ప్రశాంత్రెడ్డి, ఇంద్రకరణ్రెడ్డి,
ఎర్రబెల్లి ఇన్చార్జులుగా ఉన్న చోటా అదే పరిస్థితి
కేసీఆర్, కేటీఆర్, హరీశ్, గంగుల ఉన్నచోట టీఆర్ఎస్కు మెజార్టీ

నల్గొండ, వెలుగు: మునుగోడు ఉప ఎన్నికలో పలువురు మంత్రులు, ఎమ్మెల్యేలకు ఓటర్లు షాక్ ఇచ్చారు. వాళ్లు ఇన్చార్జులుగా ఉన్న గ్రామాల్లో టీఆర్ఎస్ కన్నా బీజేపీకే ఎక్కువ ఓట్లు పడ్డాయి. బైపోల్లో ఎలాగైనా గెలవాలని భావించిన టీఆర్ఎస్ హైకమాండ్.. మంత్రులతో పాటు ఎమ్మెల్యేలను 2,500 నుంచి 3వేల లోపు ఓటర్లు ఉన్న ఒక్కో ఎంపీటీసీ స్థానానికి నామినేషన్ల టైమ్లోనే ఇన్చార్జులుగా వేసింది. సీఎం కేసీఆర్ స్వయంగా లెంకలపల్లి బాధ్యతలు తీసుకున్నారు. మంత్రులు, ఎమ్మెల్యేలు ఇన్చార్జులుగా ఉన్న ప్రతి గ్రామంలో బీజేపీపై మెజారిటీ సాధించాలని సీఎం ఆదేశించారు. ఇక్కడ సాధించబోయే మెజార్టీ ఆధారంగానే రాబోయే అసెంబ్లీ ఎన్నికల్లో టికెట్లు ఉంటాయని హెచ్చరించినట్లు కూడా వార్తలు వచ్చాయి. దీంతో ఎన్నికలను సీరియస్గా తీసుకున్న మంత్రులు, ఎమ్మెల్యేలు సుమారు నెలపాటు వారికి అప్పగించిన గ్రామాల్లో తిష్టవేసి ఇల్లిల్లూ తిరుగుతూ ఓట్లు అభ్యర్థించారు. దావత్లు, స్కీములతో ఓటర్లను ఆకట్టుకునే ప్రయత్నం చేశారు. మంత్రి మల్లారెడ్డి ఓ అడుగు ముందుకేసి జనానికి మందు పోశారు. మంత్రి జగదీశ్రెడ్డి లాంటివాళ్లయితే.. బీజేపీకి ఓట్లు వేస్తే పింఛన్లు ఆగిపోతాయని ప్రచారం చేశారు. తీరా చూస్తే పలువురు మంత్రులు ఇన్చార్జ్లుగా ఉన్న గ్రామాల్లో బీజేపీకి లీడ్రావడం చర్చనీయాంశమైంది.

కొన్ని చోట్ల లీడ్ వచ్చినా..!

మిగిలిన చోట్ల ఇతర మంత్రులకు లీడ్ వచ్చినా చాలావరకు డబుల్డిజిట్స్ కే పరిమితమయ్యారు. మంత్రి కేటీఆర్ ఇన్చార్జ్గా ఉన్న గట్టుప్పల్ లో టీఆర్ఎస్ కు 65 ఓట్ల మెజార్టీ వచ్చింది. మంత్రి గంగుల కమలాకర్‌ ఇన్చార్జ్గా ఉన్న సంస్థాన్‌ నారాయణపురం ఎంపీటీసీ -2 స్థానంలో బీజేపీ కంటే టీఆర్‌ఎస్‌కు 66 ఓట్లు ఎక్కువ వచ్చా యి. మంత్రి పువ్వాడ అజయ్ కుమార్ ఇన్చార్జ్గా ఉన్న కొరటికల్, దుబ్బ కాల్వ ఎంపీటీసీ పరిధిలో టీఆర్ఎస్ కు 109 ఓట్ల మెజారిటీ వచ్చింది. మంత్రి సత్యవతి రాథోడ్ ఇన్చార్జ్గా ఉన్న పోర్లగడ్డ ఎంపీటీ సీ స్థానంలో టీఆర్ఎస్కు 288 మెజారిటీ వచ్చింది. మంత్రి సబితా ఇంద్రా రెడ్డి ఇన్ చార్జ్గా ఉన్న పసునూరు మండలంలో టీఆర్ఎస్ కు 332 ఓట్ల మెజార్టీ వచ్చింది. కేసీఆర్ ఇన్చార్జ్గా ఉన్న మర్రిగూడ మండలం లెంకలపల్లిలో టీఆర్ఎస్ 254 ఓట్ల మెజార్టీ సాధించింది. ఇక్కడ మొత్తం 2,927 ఓట్లకు గాను 1,795 ఓట్లు పోలయ్యాయి. దీంట్లో టీఆర్ఎస్కు 944, బీజేపీకి 690 ఓట్లు పడ్డాయి. హరీశ్రావు ఇన్చార్జ్గా ఉన్న మర్రిగూడ మండల కేంద్రంలో టీఆర్ఎస్కు 613 ఓట్ల లీడ్ వచ్చింది.

ఇదీ పరిస్థితి

మంత్రి మల్లారెడ్డి ఇన్చార్జ్గా ఉన్న చౌటుప్పల్ మండలం ఆరె గూడెం, కాట్రేవు, రెడ్డిబావి గ్రామాల్లో టీఆర్ఎస్ కంటే బీజేపీకి 450 ఓట్ల ఆధిక్యం వచ్చింది. టీఆర్ఎస్కు1015 ఓట్లు పోల్కాగా.. బీజేపీకి 1,466 ఓట్లు పడ్డాయి.
మంత్రి జగదీశ్రెడ్డి ఇన్చార్జ్గా ఉన్న మునుగోడు టౌన్లో టీఆర్ఎస్ కు 2,614 రాగా.. బీజేపీకి 2,676 ఓట్లు పోలయ్యాయి. ఇక్కడ బీజేపీ 62 ఓట్ల మెజార్టీ సాధించింది.
మంత్రి శ్రీనివాస్ గౌడ్ ఇన్చార్జ్గా ఉన్న చౌటుప్పల్ మున్సిపాలిటీ పరిధిలోని లింగోజిగూడెం, తాళ్ల సిం గారం, కొత్తపేట గ్రామాల్లో బీజేపీకి 1,227 ఓట్లు పోల్కాగా, టీఆర్ఎస్ 1,050 ఓట్లు వచ్చాయి. ఇక్కడ బీజేపీకి 177 ఓట్ల మెజార్టీ వచ్చింది.
మంత్రి వేముల ప్రశాంత్ రెడ్డి ఇన్చార్జ్గా ఉన్న దేవలమ్మ నాగారంలో టీఆర్ఎస్ కంటే బీజేపీకి 60 ఓట్లు ఎక్కువొచ్చాయి.
మంత్రి ఎర్రబెల్లి దయాకర్రావు ఇన్చార్జ్గా ఉన్న చండూరు మున్సిపాలిటీలో బీజేపీ 79 ఓట్ల మెజార్టీ సాధించింది.
మంత్రి ఇంద్రకరణ్‌రెడ్డి ఇన్చార్జ్గా ఉన్న సర్వేల్‌ ఎంపీటీసీ -1లో టీఆర్‌ఎస్‌ కంటే బీజేపీకి 18 ఓట్లు ఎక్కువ పోలయ్యాయి.
మంత్రి తలసాని శ్రీనివాస్ యాదవ్ ఇన్చార్జ్గా ఉన్న నాంపల్లి మండల కేంద్రంలో బీజేపీకి 497 ఓట్ల మెజార్టీ వచ్చింది.

పలివెలలో బీజేపీకి భారీ ఆధిక్యం..

మునుగోడు మండలం పలివెల గ్రామంలో బీజేపీ భారీ ఆధిక్యం సాధించింది. ఈ గ్రామ ఎంపీటీసీ స్థానానికి రాష్ట్ర రైతు బంధు సమితి అధ్యక్షుడు పల్లా రాజేశ్వర్రెడ్డిని ఇన్చార్జ్గా టీఆర్ఎస్ నియమించింది. ఈ గ్రామం హుజూరాబాద్ ఎమ్మెల్యే ఈటల రాజేందర్ అత్తగారి ఊరు కావడంతో మొదటి నుంచీ ఈ స్థానంపై ఆసక్తి నెలకొంది. ఈ ఇద్దరు నేతలు ఎలాగైనా తమ సత్తా చాటుకునేందుకు సర్వశక్తులు ఒడ్డారు. ఇరువర్గాల మధ్య ఒక దశలో ఘర్షణ వాతావరణం కనిపించింది. ఈ గ్రామంలో 2,104 ఓట్లు ఉండగా.. 1,952 ఓట్లు పోలయ్యాయి. దీంట్లో బీజేపీకి 1,029 రాగా, టీఆర్ఎస్ 698 ఓట్లతో సరిపెట్టుకుంది. కాంగ్రెస్ 101 ఓట్లకే పరిమితమైంది. మొత్తంమీద బీజేపీ 331 ఓట్ల మెజార్టీ సాధించింది.