- ఆఫీసును సిద్ధం చేస్తున్న ఆఫీసర్లు
- వీసీ పోస్టుకు 133 మంది దరఖాస్తు
నిజామాబాద్, వెలుగు: తెలంగాణ వర్సిటీ వీసీగా అపాయింట్అయ్యేందుకు అర్హతగల ముగ్గురి పేర్లతో కూడిన షార్ట్ లిస్టు తయారైంది. దసరా పండగ వేళ ఏ క్షణంలోనైనా వీసీ పేరు ప్రకటించే అవకాశం ఉందని తెలియడంతో వర్సిటీలో హడావిడి మొదలైంది. రూ.2 కోట్లతో నిర్మించిన వీసీ బంగ్లా, ఆఫీస్ను సిద్ధం చేస్తున్నారు. కారును సిద్ధం చేశారు.
భారీ వడపోత
టీయూ వీసీగా పనిచేసిన రవీందర్గుప్తా గత ఏడాది జూన్ లో లంచం తీసుకుంటూ ఏసీబీకి పట్టుబడి జైలుకు వెళ్లారు. దీంతో ఐఏఎస్లను ఇన్చార్జిలుగా నియమించి పాలనసాగిస్తున్నారు. జనవరిలో పోస్టు భర్తీ చేయడానికి ప్రభుత్వం నోటిఫికేషన్ జారీ చేయగా, మొత్తం 133 దరఖాస్తులు అందాయి.
నిబద్ధతగల వ్యక్తిని టీయూకు వీసీగా అపాయింట్ చేయడానికి సర్కారు భారీ కసరత్తు చేసింది. ప్రొఫెసర్గా పదేండ్ల అనుభవంతో పాటు 70 ఏళ్లలోపు గల వారినే వీసీగా నియమించాలి.
అయితే పాలనపరమైన అనుభవం, అకడమిక్ క్వాలిఫికేషన్ను పరిగణలోకి తీసుకొని నిర్ణయం తీసుకుంటారు. ఇందుకోసం ఫిబ్రవరి 17న ప్రభుత్వం ముగ్గురు సభ్యులతో కూడిన సెర్చ్ కమిటీని నియమించింది. వర్సిటీ నుంచి ప్రొఫెసర్సులేమాన్ సిద్ధిఖీ, యూజీసీ తరపున రాజేశ్వర్ సింగ్ఛందేల్, ప్రభుత్వం నుంచి చీఫ్ సెక్రటరీ శాంతికుమారి నేతృత్వంలోని కమిటీ దరఖాస్తులను ఫిల్టర్ చేసింది.
ముగ్గురూ ఉద్దండులే
టీయూ వీసీ కోసం ఏకంగా133 దరఖాస్తులు రావడం ఆశ్చర్యపరిచింది. ఇందులో ముగ్గురి పేర్లను సెర్చ్కమిటీ ఫైనల్ చేసి గవర్నర్కు నివేదించాక వాటిలో ఒక పేరును గవర్నర్ అనౌన్స్ చేయడం ఆనవాయితీ. సెర్చ్ కమిటీ సమర్పించిన మూడు పేర్లతో కూడిన షార్ట్ లిస్టులో ప్రముఖ ప్రొఫెసర్లు ఉన్నారు. ఓయూకు చెందిన లా విభాగం ప్రొఫెసర్, కామారెడ్డి జిల్లాకు చెందిన మెకానికల్ విభాగం ప్రొఫెసర్తో పాటు జర్నలిజం అండ్ మాస్ కమ్యూనికేషన్ ప్రొఫెసర్ పేర్లను సెర్చ్ కమిటీ నివేదించినట్లు విశ్వసనీయ సమాచారం.
వర్సిటీ నుంచి ఆరుగురు ప్రొఫెసర్లు దరఖాస్తు చేయగా వీసీ పోస్టు దక్కించుకోవడానికి మైనారిటీ వర్గానికి చెందిన ఒకరు, కోరుట్లకు ప్రాంతానికి చెందిన మరో ప్రొఫెసర్ తీవ్రంగా శ్రమించారు. షార్ట్ లిస్టు గవర్నర్ చెంతకు చేరడంతో అంతా కొలిక్కి వచ్చింది. దసరా పండగకే వీసీని ప్రకటించాలని ఉన్నత స్థాయిలో నిర్ణయించారు. ఇందుకు సంకేతంగా వర్సిటీలో బంగ్లాను సిద్ధం చేస్తున్నారు.
