హైదరాబాద్ బోయిన్⁬పల్లిలోని పెంట్హౌజ్⁬లో ఈ పనులేంటి..?

నకిలీ నోట్ల తయారీ దందా గుట్టురట్టు
హైదరాబాద్ బోయిన్⁬పల్లిలోని పెంట్ హౌజ్⁬లో కరెన్సీ తయారీ
ఆరుగురు నిందితుల అరెస్ట్, పరారీలో మరో ఇద్దరు
రూ.56.90 లక్షల నకిలీ నోట్లు సీజ్, కంప్యూటర్, ఇతర పరికరాలు స్వాధీనం

కామారెడ్డి, వెలుగు: వ్యాపారాల్లో ఏర్పడిన ఆర్థిక నష్టాల నుంచి బయటపడడంతో పాటు సులభంగా డబ్బు సంపాదించాలనే ఆశతో నకిలీ నోట్లను తయారు చేసి చలామణి చేస్తున్న ముఠా గుట్టురట్టయింది. అంతర్రాష్ట్ర నకిలీ నోట్ల ముఠాలో 8 మంది ఉండగా ఆరుగురిని పోలీసులు అరెస్ట్ చేయగా, మరో ఇద్దరు పరారీలో ఉన్నారు. వీరి నుంచి రూ.56.90 లక్షల(రూ.500 నోట్లు) నకిలీ కరెన్సీ, పరికరలను స్వాధీనం చేసుకున్నారు.

శనివారం కామారెడ్డి జిల్లా పోలీసు ఆఫీస్లో ఎస్పీ సింధూశర్మ మీడియాకు వివరాలు వెల్లడించారు. కామారెడ్డి జిల్లా బాన్సువాడ పట్టణపోలీసులు కొయ్యగుట్ట వద్ద శుక్రవారం వెహికల్స్ చెకింగ్ చేస్తుండగా, కారులో వస్తున్న ముగ్గురు వ్యక్తులు పోలీసులను చూసి పారిపోయేందుకు ప్రయత్నించారు. వారిని వెంబడించి పట్టుకొని కారును తనిఖీ చేయగా రూ.30 లక్షల నకిలీ నోట్ల కట్టలు దొరికాయి.

కడపత్రి రాజ్గోపాల్రావు, కొలావర్ కిరణ్కుమార్, రమేశ్గౌడ్ను పట్టుకొని ఎంక్వైరీ చేయగా ఈ వ్యవహారం బయటపడింది. కడవత్రి రాజ్గోపాల్రావు(తెలంగాణ), హుస్సేన్ పీరా( కర్నాటక) నకిలీ రూ. రూ.500 నోట్ల తయారీకి పెట్టుబడులు పెట్టారు. వీరికి పరిచయం ఉన్న కమలేశ్(రాజస్థాన్), రాధాకృష్ణ అలియాస్ భరద్వాజ్(ఉత్తరాఖండ్) నోట్లను తయారీ చేస్తారు. కామారెడ్డి జిల్లాకు చెందిన కొలావార్ కిరణ్కుమార్, రమేశ్గౌడ్, మహారాష్ట్రకు చెందిన అజయ్,ఈశ్వర్ మార్కెట్ లో వీటిని చలామణి చేస్తారు. నకిలీ నోట్ల తయారీ కోసం కంప్యూటర్, పేపర్ కట్టర్, కలర్ ప్రింటర్, ఇంక్ బాటిల్స్, రిబ్బన్స్ కొనుగోలు చేశారు. హైదరబాద్ బోయిన్పల్లిలోని అంటిలియా అపార్ట్మెంట్ పెంట్ హౌజ్ను కిరాయికి తీసుకున్నారు. అక్కడ రూ.60 లక్షల నకిలీ నోట్లను తయారు చేశారు. వీటిలో నుంచి రూ.3 లక్షలను కిరణ్కుమార్(బిచ్కుంద), రమేశ్గౌడ్( బాన్సువాడ)కు ఇచ్చారు. ఈ కరెన్సీని వీళ్లు చుట్టు పక్కల గ్రామాల్లో చలామణి చేశారు.

హైదరాబాద్ నుంచి రాజ్గోపాల్రావు రూ.30 లక్షలు తీసుకొని వారికి ఇచ్చేందుకు శుక్రవారం రాగా, పోలీసులకు దొరికారు. వారు ఇచ్చిన సమాచారంతో హైదరాబాద్లో తనిఖీలు నిర్వహించి.. రూ.26.90 లక్షల నకిలీ కరెన్సీ, నోట్ల తయారీకి ఉపయోగించిన సామగ్రితో పాటు హుస్సేన్ పీరా, భరద్వాజ్, అజయ్ను అదుపులోకి తీసుకున్నారు. రాజస్థాన్కు చెందిన కమలేశ్, సుక్రాయ్పరారీలో ఉన్నారు. నకిలీ కరెన్సీ, నోట్ల తయారు కోసం వాడిన సామగ్రి, కారు, 6 సెల్ఫోన్లు స్వాధీనం చేసుకున్నారు. ఇదిలాఉంటే రాజ్గోపాల్రావు కొంత కాలం ఆమెరికాలో పని చేశాడు. కేసులో కీలకంగా వ్యవహరించిన సీసీఎస్ ఇన్స్పెక్టర్ శ్రీనివాస్, బాన్సువాడ టౌన్ సీఐ అశోక్, సీసీఎస్, పిట్లం ఎస్సైలు ఉస్మాన్, రాజు, సీసీఎస్ ఏఎస్సై రాజేశ్వర్, సిబ్బంది కిషన్, గణపతి, రాజేందర్, శ్రావణ్ను ఎస్పీ అభినందించారు.

వ్యాపారం కలిసి రాక..
రియల్ ఎస్టేట్, కన్స్ట్రక్షన్, ఇతర వ్యాపారాలు చేస్తూ ఆర్థికంగా ఇబ్బందులు పడుతూ నకిలీ నోట్ల తయారీని ఎంచుకున్నారు. విశ్వసనీయ సమాచారం ప్రకారం.. హైదరాబాద్లోని కొంపల్లికి చెందిన రాజ్గోపాల్రావు గతంలో ఆమెరికాలో ఉండి ఆర్థికంగా ఎదిగాడు. ఇక్కడకు వచ్చి వివిధ వ్యాపారాల్లో పెట్టుబడులు పెట్టాడు. వీటిలో నష్టాలు రావడంతో బోయిన్పల్లిలోని ఉన్న బిల్డింగ్ను అమ్మేశాడు. కర్నాటక రాయచూర్కు చెందిన కనస్ట్రక్షన్ బిజినెస్ చేసే హుస్సేన్ పీరాతో పరిచయం ఏర్పడింది.

రాజ్గోపాల్రావు కు చెందిన స్థలంలో గుప్త నిధులు ఉన్నాయని పీరా చెప్పాడు. అక్కడ తవ్వినా ఫలితం లేదు. ఆ తరువాత తమకు పరిచయం ఉన్న రాజస్థాన్, ఉత్తరఖాండ్కు చెందిన వ్యక్తులతో కలిసి నకిలీ నోట్ల తయారీ దందాను షూరు చేశారు. అంతకుముందు రాజ్గోపాల్రావు బోయిన్పల్లిలో అమ్మిన బిల్డింగ్లోనే పెంట్హౌజ్ను కిరాయికి తీసుకొని నకిలీ నోట్లను తయారు చేశారు. పరారీలో ఉన్న మరో ఇద్దరు వ్యక్తులు పట్టుబడితే పూర్తి వివరాలు వెలుగులోకి వచ్చే అవకాశం ఉంది.