హైదరాబాద్ పాతబస్తీ నడిరోడ్డుపై విధి నిర్వహణలో ఉన్న ఓ ఎస్ఐ గన్తో బెదిరించి హల్చల్ చేశాడు. తెల్లవారుజామున 2 గంటల సమయంలో వాహనాల తనిఖీలు నిర్వహిస్తున్న పోలీసులను చూసి ఓపెన్ టాప్ కారు ఆగకపోవడంతో విధి నిర్వహణలో ఉన్న ఎస్ఐ గన్తో బెదిరించాడు. అయితే దీనికి సంబంధించిన వీడియో ప్రస్తుతం సోషల్ మీడియాలో వైరల్ కాగా.. ఇది చూసిన నెటిజన్లు ''ఇదేనా ఫ్రెండ్లీ పోలీస్ అంటూ విమర్శిస్తున్నారు''. ఈ ఘటన పాతబస్తీ మీర్చౌక్పోలీస్ స్టేషన్పరిధిలో తీవ్ర కలకలం రేపుతోంది.
మీర్చౌక్ ఎస్ఐ జబ్బార్ తన బృందంతో కలిసి ఆదివారం అర్థరాత్రి మీర్చౌక్‌లో వాహనాల తనిఖీలు నిర్వహిస్తున్నాడు. సోమవారం తెల్లవారుజామున 2 గంటల సమయంలో అటుగా వచ్చిన ఓపెన్ టాప్కారులో ఐదుగురు వ్యక్తులు వస్తుండటాన్ని గమనించిన కానిస్టేబుల్ ఆపే ప్రయత్నం చేశాడు. కారును ఆపకుండా వేగం పెంచడంతో కోపోద్రిక్తుడైన ఎస్ఐ జబ్బార్తన వద్ద ఉన్న గన్ తీసి వారిని కిందకి దిగాలంటూ గట్టిగా కేకలు వేశాడు. దీంతో తీవ్ర భయాందోళనకు గురై కారును నడుపుతున్న వ్యక్తి పక్కకు ఆపాడు. గన్ చేతిలో పట్టుకుని అంతా కిందకి దిగాలని పట్టుబట్టాడు. దీంతో అందరూ కిందికి దిగడంతో డ్రైవర్ సీటుతో పాటు వెనుక డిక్కీని క్షుణ్ణంగా పరిశీలించారు. కాగా.. దీనికి సంబంధించిన వీడియోలు ప్రస్తుతం సోషల్మీడియాలో వైరల్ అవుతూ దుమారం లేపాయి. సోషల్ మీడియా ద్వారా విషయం తెలుసుకున్న సౌత్ జోన్ డీసీపీ సాయి చైతన్య ఈ ఘటనపై పూర్తి స్థాయిలో విచారిస్తున్నట్లు తెలిపారు.
