ఆరు దశాబ్దాల సిద్దిపేటకు రైలు కల నేడు నెరవేరనుంది. సిద్దిపేట జిల్లా వాసులు సొంత భూమి నుంచి రైలు ఎక్కాల్సిన సమయం ఆసన్నమైంది. అది దశాబ్దాలుగా ఎదురుచూస్తున్న కల. రైలు అనే మాట వినని ఈ ప్రాంత ప్రజలు, అది సాకారమైన తరుణంలో ఆనందం వ్యక్తం చేస్తున్నారు. ఆ మధుర క్షణాలను ఆస్వాదించేందుకు ఆసక్తిగా ఉన్న చాలా మందికి రైల్వే శాఖ గ్రీన్ సిగ్నల్ ఇచ్చింది. మెదక్ జిల్లా మనోహరాబాద్ – కరీంనగర్ జిల్లా కొత్తపల్లి రహదారిలో కీలక మైలురాయి మంగళవారం ప్రారంభం కానుంది.
సిద్దిపేట నుంచి సికింద్రాబాద్ వరకు పుష్ పుల్ రైలు సేవలు అందుబాటులో ఉంటాయి. ఈ నెల 3వ తేదీ మధ్యాహ్నం 3 గంటల తర్వాత ప్రధాని నరేంద్ర మోదీ నిజామాబాద్ నుంచి వర్చువల్ జర్నీ ప్రారంభిస్తారని అధికారులు ప్రకటించారు. తాజాగా ఈ మార్గంలో రెండు రైళ్లను నడిపేందుకు రైల్వే శాఖ పచ్చజెండా ఊపింది. మనోహరాబాద్- కొత్తపల్లి మార్గం నాలుగు జిల్లాలను కలిపే ముఖ్యమైన మార్గం. ఇక తెలంగాణలో సుప్రసిద్ధ పుణ్యక్షేత్రమైన కొమురవెల్లి మల్లన్నను ప్రతి సంవత్సరం 25 లక్షల మందికి పైగా భక్తులు దర్శించుకుంటారు. అయితే, ఈ పుణ్యక్షేత్రానికి సరైన ప్రయాణ సౌకర్యాలు లేక భక్తులు తిప్పలు పడుతున్నారు.
రాజీవ్‌ రహదారి నుంచి 3 కి.మీ. దూరం ఉన్న క్షేత్రానికి చేరుకోవడానికి, తిరిగి వెళ్లేందుకు ప్రధాన రహదారిపై గంటల కొద్దీ నిరీక్షించాల్సిన పరిస్థితి ఏర్పడింది. రోడ్డు మార్గంలో హైదరాబాద్‌ నుంచి సుమారు 110 కి.మీ., కరీంనగర్ నుంచి 90 కి.మీ., ప్రయాణం చేయాల్సి ఉంటుంది. ఈ రైల్వే లైన్‌‌‌‌తో పాటు స్టేషన్ అందుబాటులోకి వస్తే భక్తులకు సమయంతో పాటు డబ్బులు కూడా ఆదా కానున్నాయి.ఈ ప్రాంతానికి కావాల్సిన ఎరువులు రైలు ద్వారానే వస్తున్నాయి. ఈ ప్రాంతం నుంచి ధాన్యం క్రమం తప్పకుండా ఎగుమతి అవుతోంది. సిద్దిపేటలో కూడా సరుకు రవాణా ప్రాంగణం అందుబాటులోకి వస్తే ధాన్యం తరలించేందుకు చాలా ఉపయోగకరంగా ఉంటుంది.
- ఆలేటి రమేశ్
