- ఇకపై రోజుకు 2.4 లక్షల టన్నుల బొగ్గు ఉత్పత్తి, రవాణా చేయాలి
- జీఎంలకు సింగరేణి సీఎండీ ఆదేశం
హైదరాబాద్, వెలుగు: భారీ వర్షాల వల్ల ఈ ఏడాది టార్గెట్ 72 మిలియన్ టన్నుల ఉత్పత్తి లక్ష్యంపై కొంత ప్రభావం పడిందని సింగరేణి సీఎండీ బలరామ్ తెలిపారు. ఈ లోటును అధిగమించడానికి ఇకపై రోజుకు 2.4 లక్షల టన్నుల బొగ్గు ఉత్పత్తి, రవాణా జరిగేలా చూడాలని అధికారులను ఆయన ఆదేశించారు. మంగళవారం హైదరాబాద్ సింగరేణి భవన్ నుంచి వీడియో కాన్ఫరెన్స్లో అన్ని ఏరియాల జనరల్ మేనేజర్లతో ఉత్పత్తి పై బలరామ్ ప్రత్యేక సమీక్ష నిర్వహించారు.
సీఎండీ మాట్లాడుతూ వర్షాల ప్రభావంతో ప్రొడక్షన్ టార్గెట్లో 10 శాతం వెనుకబడ్డామని, దీన్ని పూడ్చుకోవడంతో పాటు నెలవారి టార్గెట్ సాధించాల్సిన బాధ్యత ప్రతిఒక్కరిపై ఉందన్నారు. పలు ఏరియాలు టార్గెట్ సాధనలో వెనకబడడంపై సీఎండీ అసంతృప్తిని వ్యక్తంచేశారు. రానున్న 165 రోజులు కీలకమని, రోజుకు 17.5 లక్షల క్యూబిక్ మీటర్ల ఓవర్ బర్డెన్ తొలగించేలా ప్లాన్ చేయాలన్నారు.
విధుల్లో నిర్లక్ష్యం, టైమింగ్స్ పాటించకపోవడం, గైర్హాజరు కావడం వంటి అంశాలుతన దృష్టికి వచ్చాయని, అలాంటి వారిపై కఠిన చర్యలు తీసుకుంటామని హెచ్చరించారు. చాలా కాలంగా డ్యూటీకి రానివారిని విధుల నుంచి తొలగించడానికి వెనకాడబోమన్నారు. గైర్హాజరీ వల్ల ఇతర ఉద్యోగులపై పనిభారం పెరుగుతోందని, ఉత్పత్తిపైనా ప్రభావం చూపుతోందన్నారు. కొత్తగా రిక్రూట్ అయిన ఉద్యోగులందరినీ విధిగా ఐదేళ్ల పాటు అండర్ గ్రౌండ్ మైన్స్లో పనిచేసేలా చర్యలు తీసుకోవాలని సీఎండీ సూచించారు.
