కోల్బెల్ట్/జైపూర్,వెలుగు: థర్మల్ పవర్ ప్లాంట్ నుంచి వాయు కాలుష్యాన్ని తగ్గించేందుకు సింగరేణి ప్రయత్నాలు చేపట్టింది. ఇందుకోసం రూ.696 కోట్ల వ్యయంతో ఫ్లూ గ్యాస్ డీసల్పరైజేషన్(ఎఫ్జీడీ) యూనిట్ల నిర్మాణాలు చేపట్టింది. థర్మల్ పవర్ ప్లాంట్ల ద్వారా వచ్చే పొగలో సల్ఫర్, కార్భన్, లెడ్తో పాటు మరిన్ని విషవాయువులుంటాయి. థర్మల్ విద్యుత్ ఉత్పత్తి టైంలో విడుదల అవుతున్న సల్ఫర్ ఆక్సైడ్ శాతం ఘనపు మీటర్కు 2వేల మిల్లీ గ్రాములుంటుంది. దీని వల్ల వాతావరణ కాలుష్యం పెరిగి, సమీప గ్రామాల ప్రజలు అనారోగ్య బారిన పడతారు. దీన్ని నివారించేందుకు ఫ్లూ గ్యాస్ డీసల్ఫరైజేషన్ యూనిట్లను ఏర్పాటు చేయాలని 2015లో కేంద్ర పర్యావరణ, అటవీ మంత్రిత్వశాఖ ఆదేశాలు జారీ చేసింది. ఈ ఎఫ్జీడీ యూనిట్ల వల్ల పవర్ ప్లాంట్ పరిసరాలు కాలుష్యం కాకుండా ఉంటాయి.
కొనసాగుతున్నపనులు..
హైదరాబాద్కు చెందిన పీఈఎస్ ఇంజినీర్స్ ప్రైవేట్ లిమిటెడ్ సంస్థ టెండర్ ద్వారా నిర్మాణ పనులు చేపట్టింది. ఎస్టీపీపీలో 600 మెగావాట్ల కెపాసిటీ కలిగిన రెండు యూనిట్లు ఉండటంతో వాటికోసం ప్రత్యేకంగా 150 మీటర్ల ఎత్తుతో రెండు చిమ్నీలను ఏర్పాటు చేస్తున్నారు. గతయేడాది అక్టోబర్ మొదటి వారంలో వీటి పనులు మొదలయ్యాయి. మొదటిది ఇప్పటికే 115 మీటర్లకు పైగా, రెండోది 60మీటర్లపై ఎత్తు వరకు పూర్తయ్యాయి. మరోవైపు ఇంటర్ కనెక్టింగ్ ఫౌండేషన్, అబ్జర్వర్, ట్యాంకుల ఫౌండేషన్ పనులు, బూస్టర్ ఫ్యాన్, ప్యూయల్, ఫ్యాబ్రికేషన్ పనులు వివిధ దశల్లో సాగుతున్నాయి.
ఇదీ పని ..
పవర్ ప్లాంట్లో ఫ్లూ గ్యాస్ డీసల్ఫరైజేషన్ చేసే ప్రక్రియలో బొగ్గును మండించగా వచ్చే.. వాయువు నుంచి సల్ఫర్ వాయువులను వేరు చేస్తారు. రసాయనిక చర్య వల్ల సల్ఫర్ గ్యాస్లను తడిసున్నం పీల్చుకుంటుంది. చివరకు బయటకు విడుదలయ్యే వాయువుల్లో సల్ఫర్ గ్యాస్ శాతం తగ్గుతుంది. మరోవైపు రసాయనిక చర్య వల్ల జిప్సం(కాల్షియం సల్పేట్) ఏర్పడుతుంది. ఈ జిప్సంను ఎరువులు, సిమెంటు, పేపర్, వస్త్ర పరిశ్రమ, నిర్మాణరంగంలో వినియోగించుకునే వీలుంది. ఇప్పటికే ప్లాంట్లో బొగ్గును మండించగా వెలువడుతున్న బూడిదను వందశాతం గాలిలో కలువకుండా కొన్నేళ్లుగా చర్యలు తీసుకుంటున్నారు. బూడిదను సిమెంట్ ఇటుకలు, రోడ్డు నిర్మాణానికి వాడుతున్నారు. సింగరేణి ఎస్టీపీపీకి రెండు సార్లు జాతీయ స్థాయిలో బెస్ట్ ఫ్లైయాష్ యుటిలైజేషన్ అవార్డులు రాగా.. మరోసారి జాతీయ స్థాయిలో అవార్డు సొంతం చేసుకుంది. పూర్తిస్థాయి కాలుష్యనియంత్రణకు చేపట్టిన ఎఫ్జీడీ యూనిట్ల నిర్మాణంలో మొదటి చిమ్నీని జూన్ కల్లా రెండోది వచ్చే ఏడాది సెప్టెంబర్లో పూర్తి చేస్తామని సింగరేణి సీఎండీ ఎన్ శ్రీధర్ తెలిపారు.
