బెల్లంపల్లిలో సోలార్​ వెలుగులు

• సింగరేణి ఆధ్వర్యంలో 67.5 మెగావాట్ల ప్లాంట్​ 
• బెల్లంపల్లి, మందమర్రిలో నాలుగు ప్రాంతాల్లో పనులు
• వాణిజ్య పరమైన అవసరాల కోసం లీజ్ భూముల వినియోగం
• రూ.340 కోట్ల వ్యయంతో ప్లాంట్ ​నిర్మాణం

కోల్​బెల్ట్/బెల్లంపల్లి, వెలుగు: బెల్లంపల్లి పట్టణంలో సోలార్ పవర్ ​ప్లాంట్ ఏర్పాటుకు సింగరేణి చర్యలు చేపట్టింది. కొత్తగా 67.5 మెగావాట్ల కెపాసిటీ సోలార్​ పవర్​ ప్లాంట్​ను నిర్మించాలని యాజమాన్యం నిర్ణయం తీసుకుంది. ఇప్పటికే బెల్లంపల్లి, మందమర్రిలో ఐదు స్థలాలను గుర్తించిన మందమర్రి ఏరియా సింగరేణి యాజమాన్యం.. మూడు చోట్ల స్థలాలను చదును చేస్తోంది. 

బొగ్గు గనులు మూతబడిపోయి, డిపార్ట్​మెంట్ల ఎత్తివేతతో ఉనికి కోల్పోయిన బెల్లంపల్లిలో పెద్ద ఎత్తున బొగ్గు గనుల తవ్వకాలతోపాటు ఇతర అవసరాల కోసం ప్రభుత్వం నుంచి లీజ్​కు తీసుకున్న వందలాది ఎకరాల భూములన్నాయి. ఖాళీగా ఉన్న భూములను కంపెనీ అవసరాలు, కమర్షియల్​పరంగా వినియోగించాలనే టార్గెట్​తో సోలార్​ పవర్ ప్లాంట్​ఏర్పాటుకు సింగరేణి శ్రీకారం చుట్టింది. ప్లాంట్​ఏర్పాటుతో ఈ  భూములు అన్యాక్రాంతం కాకుండా నియంత్రించే ఛాన్స్​ కూడా ఉంటుందని సింగరేణి భావిస్తోంది.  

పవర్​ ప్లాంట్​ ఇక్కడే..

మందమర్రి ఏరియా సింగరేణి యాజమాన్యం ఆధ్వర్యంలో కొత్తగా 67.5 మెగావాట్ సోలార్ పవర్​ప్లాంట్​ను బెల్లంపల్లి, మందమర్రిలోని నాలుగు ప్రాంతాల్లో ఏర్పాటు చేసేందుకు పనులు చేప
ట్టింది. బెల్లంపల్లిలో దశాబ్దాలుగా పడావుగా ఉంటున్న ఆర్మ్​డ్​ రిజర్వ్​ పోలీస్​ హెడ్​ క్వార్టర్​ ముందు మ్యాగ్జిన్ ప్రాంతం, బుధా గెస్ట్​హౌజ్​ఆవరణలో, శాంతిఖని ఏజెంట్ ఆఫీస్ ప్రాంతంలో, మందమర్రిలోని షిర్కే పక్కన, మూసివేసిన కేకే 3, కేకే5 గనుల మధ్యలోని పాత ఆఫీస్​ ఆవరణలో ప్లాంట్​ను ఏర్పాటు చేసేందుకు కసరత్తు చేస్తోంది.

కబ్జాకు గురికాకుండా..

బెల్లంపల్లిలోని మ్యాగ్జిన్, బుధా గెస్ట్​హౌజ్​ప్రాంతాల్లో సింగరేణికి వందలాది ఎకరాల భూములుండగా కొంత కబ్జాకు గురైంది. మందమర్రి ఏరియా సింగరేణి యాజమాన్యం ఇప్పటికే మందమర్రిలో ఎంవీటీసీ కేంద్రం వెనుక, రామకృష్ణాపూర్​కు వెళ్లే మార్గంలోని ట్రినిటీ స్కూల్​ఎదుట, కాసిపేట మండలం కాసీపేట 2 గని ప్రాంతాల్లో 43 మెగావాట్ల సోలార్​పవర్​ ప్లాంట్లను సక్సెస్​పూల్​గా నడుపుతోంది. ప్రభుత్వ కాలేజీ ముందున్న 28 మెగావాట్ల పవర్​ప్లాంట్​లో యాజమాన్యం ప్రతిష్ఠాత్మక బ్యాటరీ ఎనర్జీ సిస్టం ప్లాంట్​ను కూడా ఏర్పాటు చేయనున్నట్లు ఇటీవల సింగరేణి సీఎండీ బలరాంనాయక్​ ప్రకటించారు. 

కొత్తగా ఏర్పాటు చేయనున్న సోలార్​పవర్​ప్లాంట్​తో స్థానికులకు ఉపాధి అవకాశాలు కూడా దక్కనున్నాయి. బొగ్గు గనులు, డిపార్ట్​మెంట్ల మూసివేతతో బోసిపోయిన బెల్లంపల్లిలో రెండు దశాబ్దాలుగా సింగరేణి ఎలాంటి ప్రత్యామ్నాయ ఏర్పాట్లు చేయలేదు. ఈ పవర్​ప్లాంట్​ఏర్పాటుతో ఇక్కడ తిరిగి సింగరేణి కార్యకలాపాలు మొదలయ్యే అవకాశాలున్నాయి.

రూ.340 కోట్ల వ్యయం నిర్మిస్తున్నాం

ఒక మెగావాట్​కు ఐదెకరాల చొప్పున 67.5 మెగావాట్ల సోలార్ ​పవర్​ప్లాంట్​ను రూ.340 కోట్ల వ్యయంతో నిర్మిస్తున్నాం. మూడు నెలల్లో ప్లాంట్​ను అందుబాటులోకి తీసుకొస్తాం. ఈ ప్లాంట్​కోసం 350 నుంచి 400 ఎకరాల స్థలాలను సేకరిస్తున్నాం. సింగరేణి జీఎం జి.దేవేందర్, మందమర్రి ఏరియా