బెల్లంపల్లిలో కొత్త ఓసీపీకి ప్రపోజల్స్

• మందమర్రి ఏరియా సింగరేణి జీఎం జి.దేవేందర్  
• బెల్లంపల్లి టౌన్​కు ఎలాంటి ఇబ్బందులుండవ్​
• టార్గెట్ కు ముందుగానే 100శాతం దాటిన ఉత్పత్తి

కోల్​బెల్ట్, వెలుగు :  సింగరేణి బెల్లంపల్లి ఏరియాలో కొత్తగా ఓపెన్​ కాస్ట్​ మైన్ ​ఏర్పాటుకు  యాజమాన్యం ప్రతిపాదనలు చేస్తోందని మందమర్రి ఏరియా జీఎం జి.దేవేందర్​ తెలిపారు. మంగళవారం ఆఫీస్​లో మీడియా సమావేశంలో డిసెంబర్​లో  ఏరియాలోని బొగ్గు గనుల్లో జరిగిన ఉత్పత్తి, ఉత్పాదకత వివరాలను వెల్లడించారు.  బెల్లంపల్లి -– అకినపల్లి మధ్యలోని అటవీ ఏరియాలో మూసివేసిన శాంతి ఖని యంక్లైన్ –-​2 గనిలో మిగిలిన బొగ్గును వెలికితీసేందుకు ఫేజ్​–1లో  ఓపెన్​కాస్ట్​ మైన్​గా ఏర్పాటు చేసేందుకు ప్లాన్ చేస్తున్నట్టు పేర్కొన్నారు.

ఇక్కడ 1ఇన్​13 స్ర్టిప్పింగ్​ రేషియాలో భారీగా బొగ్గు నిక్షేపాలున్నాయన్నారు. బెల్లంపల్లి టౌన్ కు సుమారు ఆరేడు కిలోమీటర్ల దూరంలో ఉండటంతో టౌన్​కు ఎలాంటి ఇబ్బందులుండని తెలిపారు.మైన్​బౌండరీ, ఎంత స్థలం అవసరం  వంటి అంశాలపై వివరాలు సేకరిస్తున్నామని,  మరో నెల రోజుల్లో క్లారిటీ వస్తుందని,  తర్వాత మైనింగ్​ప్లాన్​తయారు చేస్తామని తెలిపారు.  రామకృష్ణాపూర్​ ఓపెన్​కాస్ట్​లో వచ్చే ఫిబ్రవరి 15 వరకు బొగ్గు వెలికితీత పనులు కొనసాగుతాయని చెప్పారు.

రెండో ఫేజ్ ఫారెస్ట్​​పర్మిషన్లకు మినిస్ర్టీ ఆఫ్​ ఫారెస్ట్​ వెబ్​ పోర్టల్​లో ఆప్​లోడ్​ చేశామని, ఏడాదిన్నరలోపు పర్మిషన్లు వచ్చే చాన్స్​ఉందని వివరించారు. రాబోయే  కాలంలో కేకే –-5 ఓసీపీ ఏర్పాటు, శాంతి ఖని గనిలో 6 నుంచి 700 మీటర్ల లోతులో బొగ్గును వెలికితీసేందుకు లాంగ్​వాల్​ మైన్​గా మార్చుతామన్నారు. ఇందుకు మైనింగ్​ప్లాన్ అప్రూవల్​వస్తే  ఈసీ కోసం పబ్లిక్​ హియరింగ్​నిర్వహిస్తామన్నారు. శ్రావణపల్లి ఓసీపీ వస్తే 20 – 25 ఏండ్ల వరకు మందమర్రి ఏరియాకు ఉజ్వల భవిష్యత్ ఉంటుందన్నారు. 

 ముందుగానే టార్గెట్ సాధించాం 

రామకృష్ణాపూర్​ ఓపెన్ ​కాస్ట్​, కేకే- –5 గనుల్లో 2024 –-25 ఆర్థిక సంవత్సరం ముగియడానికి మూడు నెలల ముందే వందశాతం  టార్గెట్ సాధించామని తెలిపారు.  ఆర్కేపీలో 7 లక్షల టన్నుల బొగ్గు ఉత్పత్తికి డిసెంబర్​31 నాటికి 115 శాతం, కేకే –-5 గనిలో 1,50,000 టన్నులకు 1,50,602 టన్నుల ఉత్పత్తి సాధించినట్లు చెప్పారు. కాసీపేట–2, కాసీపేట–1ఏ గనుల ఏరియాల్లో కొత్తగా శాండ్ స్ర్టవింగ్ ప్లాంట్లను నిర్మిస్తామన్నారు.  కేకే ఓసీపీ ఏరియాలో మట్టి నుంచి ఇసుకను తయారు చేసే ప్లాంట్​ను అందుబాటులోకి తీసుకొస్తున్నామన్నారు.

ఇప్పటికే 43 మెగావాట్ల సోలార్​పవర్​ ప్లాంట్లు నడుస్తున్నాయన్నారు.  మందమర్రి, బెల్లంపల్లిలోని నాలుగు ప్రాంతాల్లో మరో 67.5 మెగావాట్ల ​ప్లాంట్లను మరో రెండు నెలల్లో అందుబాటులోకి తెస్తామన్నారు. ఈ సమావేశంలో ఏరియా ఏఎస్ వో టు జీఎం విజయప్రసాద్, ఏజీఎం ప్రసాద్​, పర్సనల్​ మేనేజర్​ శ్యాంసుందర్​, ఏరియా సేఫ్టీ ఆఫీసర్​ రవీందర్ తదితరులు పాల్గొన్నారు.