పరిచయం..ఆ రెండు పాటలు కెరీర్​లో మైలు రాళ్లు

•     నాకు తెలుగు వచ్చు. అప్పుడప్పుడు మా వాళ్లతో మాట్లాడతా. వైజాగ్​లో బంధువులు ఉంటారు. 
•     బిస్మిల్లా ఖాన్, అంజాద్ అలీ ఖాన్, సితారా దేవీ, పర్వీన్ సుల్తానా వంటి వాళ్లందరి పాటలు లైవ్​లో చూశా. 
•     రోజులో మూడు గంటలు ప్రాక్టీస్​ చేస్తా. ఈ ప్రాక్టీస్​ నాకు చిన్నప్పటి నుంచి అలవాటు.
•     మా నాన్నతో నాకు స్పెషల్ బాండ్​ ఉంది. మా నాన్న ముఖంలో కనిపించే ఎక్స్​ప్రెషనే నాకు పెద్ద కాంప్లిమెంట్. నేను ఎంత బాగా పాడగలను అనేది ఆయనకు తెలుసు. అలాగే మా అమ్మ, నా బ్రదర్ నా పాటలకు బెస్ట్ క్రిటిక్స్. 

రజినీ కాంత్​ ‘జైలర్’, షారుఖ్​ ఖాన్ ‘జవాన్’ ఈ రెండు సినిమాలు రిలీజ్​ అయ్యి చాలా రోజులైంది. కానీ, ఆ సినిమాల్లోని ‘‘వా.. నువ్వు కావాలయ్యా...’’, ‘‘చలేయా.. తేరి ఓర్...” అనే ఈ రెండు పాటలు మాత్రం ఇప్పటికీ సోషల్​ మీడియాను ఊపేస్తున్నాయి. ఈ పాటల ఒరిజినల్​ వెర్షన్స్​ పాడింది శిల్పారావ్​. ‘‘చిన్నప్పుడే నేను సంగీతం నేర్చుకున్నా.. కానీ గాయని కావాలని ఎప్పుడూ అనుకోలేదు. ఎలాంటి అంచనాలు లేకుండా సంగీతంపై దృష్టి పెట్టా. ఇప్పుడు వెనక్కి తిరిగి చూసుకుంటే.. నా సంగీత ప్రయాణం చాలా బాగుంది. నా హార్డ్ వర్క్​ సక్సెస్​ తెచ్చిపెట్టింది’’ అంటున్న శిల్ప సింగింగ్ జర్నీ ఆమె మాటల్లోనే..

‘‘నేను పుట్టింది జంషెడ్​ పూర్​లో. ప్రస్తుతం ముంబైలో ఉంటున్నాం. జంషెడ్​ పూర్​లో స్కూల్లో చదివా. ఆ టైంలో స్కూల్లో కోయర్ గ్రూప్​లో చేరా. తర్వాత 1997లో పోస్ట్​ గ్రాడ్యుయేషన్​ కోసం ముంబై వెళ్లా. ముంబై యూనివర్సిటీలో స్టాటిస్టిక్స్​లో డిప్లొమా చేశా. నా సంగీతం గురించి చెప్పాలంటే ముందు మా నాన్న గురించి చెప్పాలి. ఆయన పేరు ఎస్​. వెంకట్రావ్. మ్యూజిక్​లో ఎం.ఎ. చేశారు ఆయన. నా మూడేండ్ల వయసులోనే మ్యూజిక్ నేర్పించడం మొదలుపెట్టాడు. తనతో పాటు నన్ను కచేరీకి తీసుకెళ్లాడు. అలా నాన్నతో కలిసి జంషెడ్​పూర్​లో చాలా స్టేజీ షోలకు వెళ్లా. అలా సంగీతం మీద నాకు ఇష్టం పెరిగింది. ఆ తర్వాత ఒకసారి హరిహరన్​​ని కలిశా. అప్పుడు నాకు పదమూడేండ్లు ఉంటాయి. ఉస్తాద్​ గులామ్​ ఖాన్ దగ్గర మ్యూజిక్​ నేర్చుకోమని సలహా ఇచ్చారు ఆయన. అలా నా పాటల ప్రయాణానికి మొదటి అడుగుపడింది.

కెరీర్ షురూ 

సంగీతం అయితే నేర్చుకున్నా కానీ అవకాశాల కోసం మాత్రం చాలా కష్టపడాల్సి వచ్చింది. అప్పట్లో సోషల్​ మీడియా కూడా లేదు. ఉండుంటే అంత స్ట్రగుల్స్ పడేదాన్ని కాదేమో! ఆ టైంలో జంషెడ్​ పూర్ నుంచి ముంబై వెళ్లా. అక్కడుంటేనే అవకాశాలు వస్తాయని డిసైడ్ అయ్యా. చాలా ఓపికగా అవకాశాల కోసం ఎదురు చూశా. ఆ తర్వాత 2001లో హరిహరన్​తో కలిసి లైవ్​ పర్ఫార్మెన్స్​లు ఇచ్చా.  ఒకసారి స్టేజీ షో కోసం వెళ్లినప్పుడు శంకర్ మహదేవన్​ని కలిశా. అప్పుడు ఆయన జింగిల్స్ నేర్చుకోమని నాకు కొన్ని కాంటాక్ట్స్​ ఇచ్చారు. మూడేండ్లు జింగిల్ సింగర్​గా చేశా. క్యాడ్​బరీ మంచ్, సన్​సిల్క్​, యాంకర్ జెల్, నో మార్క్స్​ వంటి ప్రొడక్ట్స్​కి అడ్వర్టైజ్​మెంట్​ జింగిల్స్​ పాడా. కాలేజీలో ఉన్నప్పుడు మ్యూజిక్​ డైరెక్టర్ మిథున్​ని కలిశా. ఆయన 2007లో అన్వర్ సినిమాలో ‘టోస్ నైనా’ అనే పాట పాడే అవకాశం ఇచ్చారు. అలా సినిమా సింగింగ్​ కెరీర్ షురూ అయింది.  

ఖుదా జానే.. 

2008లో ‘బచ్​నా ఏ హసీనో’ సినిమాలో ‘ఖుదా జానె’ అనే పాట సింగర్ కేకేతో కలిసి పాడా. ఆ పాట తర్వాత నా లైఫే మారిపోయింది. అక్కడి నుంచి వెనుదిరిగి చూసుకోలేదు. అయితే, సక్సెస్​ రావడం కంటే దాన్ని నిలబెట్టుకోవడం కష్టమైన పని. ఎవరూ వడ్డించిన విస్తరి మన ముందు పెట్టరు. కానీ, టాలెంట్​ ఉంటే ఇండస్ట్రీలో ఎవరూ ఆపలేరు అనేది నమ్ముతా నేను. 

క్లాసికల్ ఒక్కటే కాదు.. 

నాకు అన్నిరకాల మ్యూజిక్ ఇష్టమే. నేను నాన్న దగ్గర క్లాసికల్ సింగింగ్ నేర్చుకున్నా. హరిహరన్​ దగ్గర గజల్స్, పర్ల్ జామ్స్ ఎడ్డీ వెడ్డర్, బ్రిటిష్ సింగర్స్ స్టింగ్, సేడ్ వంటి వాళ్లని ఇన్​స్పిరేషన్​గా తీసుకుని అన్ని రకాల పాటలు పాడటానికి ట్రై చేసేదాన్ని. బాలీవుడ్​లో నాకిష్టమైన సింగర్స్ సునిధి చౌహన్, శంకర్ మహదేవన్. వాళ్ల పాటలు బాగా వినేదాన్ని. 

క్లాసికల్ సింగింగ్​తోపాటు గజల్స్ కూడా నేర్చుకున్నా. చెప్పాలంటే.. గజల్స్ నా లైఫ్​లో చాలా ఇంపార్టెంట్. ఒక రెండేండ్లు ఇండియాలోని రకరకాల ప్రాంతాల్లో చాలా పర్ఫార్మెన్స్​లు ఇచ్చా. నేను ప్రతి పాటలో గజల్, సూఫీ టెక్నిక్స్​ వాడతా. అది ‘ధూమ్ 3’లో మలంగ్, ‘ఏ దిల్ హై ముష్​కిల్​’లో బుల్లెయ్యా, ‘కళంక్​’లో ‘బేషరమ్​ రంగ్’​ వంటి సాంగ్స్​లో అలా ట్రై చేశా. వాటిలో కొన్ని పాటలు హిట్ అవుతాయి. కొన్ని అంతగా జనాల్లోకి వెళ్లవు. అలాగని నేనెప్పుడూ డిజప్పాయింట్​ అవ్వలేదు. ప్రతి పాట కొత్తగా పాడాలని ట్రై చేస్తా. ఆడియెన్స్​కి నచ్చినట్టు పాడాలనేదే నా ప్రయత్నం.  

వాయిస్ కోసం..

వాయిస్​ ఎప్పుడు పాడినా ఫ్రెష్​గా ఉండాలంటే వోకల్​ హెల్త్​ బాగుండాలి. దానికి రెస్ట్ అవసరం. కంటినిండా నిద్ర ఉంటే వోకల్స్​తో అద్భుతాలు చేయొచ్చు. అలాగే వాయిస్​ కోసం కొన్ని జాగ్రత్తలు కూడా తీసుకుంటా. ముఖ్యంగా ట్రావెలింగ్​ చేసేటప్పుడు జాగ్రత్తలు తీసుకోవడం అవసరం. ప్రాక్టీస్ రెగ్యులర్​గా చేస్తూనే ఉంటా. అది వాయిస్​కి మంచి షేప్ ఇస్తుంది. 

భాష నేర్చుకోనక్కర్లేదు!

పాడిన ప్రతి పాటతో తప్పకుండా కనెక్షన్ ఉంటుంది. కంపోజర్స్, డైరెక్టర్స్, ప్రొడ్యూసర్స్.. అందరూ కలిసి ఓపెన్​ మైండెడ్​గా పనిచేస్తారు. వాళ్లంతా ఏదైనా కొత్తగా చేయాలనే ఆలోచనతోనే ఉంటారు.

 
కొత్త భాషలో పాడడానికి భాష నేర్చుకోవాల్సిన అవసరంలేదు. సంగీతంలో ఉండే మ్యాజిక్​ అదే. ఏ పాట విన్నా, అది అర్థం కాకున్నా ఆడియెన్స్ ఎంజాయ్ చేస్తారు. అందుకు కారణం సంగీతమే. కానీ, ఒక పాట పాడేటప్పుడు పదాలు పలికేటప్పుడు ఉచ్ఛారణ సరిగా ఉండాలి. దానికోసం మాత్రమే కొంచెం ఎక్కువ ఎఫర్ట్​ పెట్టాల్సి ఉంటుంది.’’ 

చలేయా ఛాన్స్

షారుఖ్​​ ఖాన్ మేనేజర్ పూజా డడ్లానీ నాకు ఫోన్ చేసి.. ‘జవాన్ సినిమాలో ‘చలేయా’ పాట పాడాలి. షారుఖ్​ నిన్ను అడగమన్నారు’ అని చెప్పింది. అది నాకు పెద్ద కాంప్లిమెంట్. ఆ తర్వాత నేను అనిరుధ్​ని చెన్నైలో కలిసి ‘షారుఖ్​​ ​ చెప్పింది నా గురించే’ అని పరిచయం చేసుకున్నా. ఇద్దరం కంపోజింగ్​ రూంలో కూర్చుని ఇరవై నిమిషాల్లో సాంగ్ రికార్డింగ్ కంప్లీట్​ చేశాం. తర్వాత ఆ పాటని షారుఖ్​కి పంపించాం. పాట విని ‘చాలా బాగా వచ్చింద’ని చెప్పారు. 

కావాలయ్యా... కలగనలేదు

రజినీకాంత్​ సినిమాలో నేను పాడతానని ఊహించలేదు. ఎందుకంటే ఇంతకుముందు నేను డైరెక్ట్​గా తమిళ పాటలు పాడ లేదు. భాష కూడా రాదు. కానీ, షారుఖ్​​ ఖాన్​ ‘పఠాన్​’ సినిమాలోని ఒక సాంగ్​ తమిళ వెర్షన్​ నేను పాడా. అంతే! కాబట్టి తమిళంలో నేను పాడిన మొదటి పాట ‘కావాలయ్యా..’ అని చెప్పొచ్చు. కోలీవుడ్​లో నా ఫస్ట్ సాంగ్​ రజినీకాంత్​ సినిమాలో పాడడం చాలా సంతోషంగా ఉంది. ఈ పాట లిరిక్స్ తమిళం, తెలుగు మిక్స్​ అయి ఉంటుంది. నేను తెలుగమ్మాయినే కాబట్టి తెలుగు పదాలు నాకు తెలుసు. తమిళ పదాలు మాత్రం రెండు మూడు సార్లు ప్రాక్టీస్​ చేశాక పాడగలిగా. పాడేటప్పుడు లిరిక్స్ తప్పుగా పలికితే అనిరుధ్​ కరెక్ట్ చేసేవాడు. ఒక టీచర్​లా ప్రతి విషయంలో కేర్ తీసుకుని పాడించాడు అతను. పాట పూర్తి చేయడానికి దాదాపు ఒక గంట టైం పట్టింది. పాడినంతసేపూ ఎంజాయ్ చేశా. ఆ పాట ఇంత పెద్ద హిట్​ అయినందుకు చాలా హ్యాపీగా ఉంది. ఈ అవకాశం ఇచ్చినందుకు అనిరుధ్​కి థ్యాంక్స్​ చెప్పాలి.