సింగోటం రిజర్వాయర్లో నీళ్లను వదిలేసి రిపేర్లు చేస్తున్న ఇంజనీర్లు
నాగర్కర్నూల్, వెలుగు : ఇంజనీరింగ్ ఆఫీసర్లు ముందుచూపు లేకుండా వ్యవహరించడం రైతుల పాలిట శాపంగా మారుతోంది. కేఎల్ఐ ఎత్తిపోతల పథకంలోని సింగోటం రిజర్వాయర్ అలుగు, కట్ట, తూములు దెబ్బతిని ప్రమాదకరంగా ఉన్నాయని రెండేండ్ల నుంచి ఆ ప్రాంత రైతులు ఆందోళన చెందుతుంటే లీడర్లు, ఆఫీసర్లు లైట్గా తీసుకున్నారు. తొందరేముంది మొత్తం తెగినాంక చూసుకుందాంలే అన్నట్లు వదిలేశారు. సింగోటం రిజర్వాయర్ కట్ట, అలుగు, తూముల రిపేర్లకు రూ. 95లక్షల ఫండ్స్వచ్చి ఏడాది దాటింది.
టెండర్ ఫైనల్ అయిన తర్వాత కూడా పనులు చేయకుండా ఊరుకున్నారు. మార్చి ఫస్ట్ వీక్ నుంచి ఏప్రిల్, మే రెండు నెలలు ఎండాకాలంలో పనులు చేసే అవకాశం ఉన్నా మొదలు పెట్టలేదు. తీరా వర్షాకాలం మొదలైన తర్వాత పనులు స్టార్ట్ చేశారు. పనులు చేపట్టేందుకు వీలుగా రిజర్వాయర్లో సగం నీటిని వదిలేశారు. వర్షాలు స్టార్ట్ అయిన తర్వాత పనులు చేపట్టడంతో రైతులు ఆందోళన వ్యక్తం చేస్తున్నారు. రిపేర్లు లేట్ అయితే తమకు సాగు నీరు అందుతుందా లేదా అని అనుమానాలు వ్యక్తం చేస్తున్నారు.
ఏడాది కింద ఫండ్స్..
కేఎల్ఐలోని ఫస్ట్ లిఫ్ట్ నుంచి ఎల్లూరు రిజర్వాయర్లోకి నీటిని ఎత్తిపోసిన తర్వాత అక్కడి నుంచి సింగోటంలోని శ్రీవారి సముద్రం నిండుతుంది. ఇక్కడి నుంచి రెండవ లిఫ్ట్ జొన్నల బొగడ రిజర్వాయర్కు అటు నుంచి మూడవ లిఫ్ట్ గుడిపల్లిగట్టు రిజర్వాయర్కు నీరు వెళ్తుంది. సింగోటం రిజర్వాయర్ పనుల కోసం ఉన్న నీటిని వదలి జూలై, ఆగస్టులో కృష్ణాకు వరద వస్తే ఆ నీటిని తీసుకునే అవకాశం లేకుండా చేశారనే విమర్శలున్నాయి. కేఎల్ఐ ప్రాజెక్ట్ కిందఆరుతడి పంటలకు మాత్రమే నీళ్లు ఇవ్వాలనే సాంకేతిక అంశాన్ని అడ్డం పెట్టుకుని వానాకాలంలో రిజర్వాయర్లు నింపడం లేట్ అయినా పెద్దగా నష్టం ఉండదనే రీతిలో వ్యవహరిస్తున్నారు.
దాదాపు 95 ఏండ్ల కింద సురభి రాజులు సింగోటం దగ్గర శ్రీవారి సముద్రం పేరుతో 1,600 ఎకరాల ఆయకట్టుకు నీరు అందేలా చెరువు నిర్మించారు. ఆ తర్వాత దీన్ని కేఎల్ఐ రిజర్వాయర్గా మార్చారు. ప్రస్తుతం 10 వేల ఎకరాల ఆయకట్టు ఉంది. అలుగు దగ్గర సైడ్ వాల్ కుంగిపోయింది. ఇక్కడి నుంచి వాటర్ లీకేజీ పెరిగింది. కట్ట రివిట్మెంట్కు పగుళ్లు వచ్చి బలహీనంగా మారింది. ఈ రిపేర్లు చేసేందుకు ఏడాది కింద ఫండ్స్ వచ్చినా టెండర్ ఫైనల్ కాకపోవడంతో పనులు స్టార్ట్ కాలేదు. టెండర్ ఖరారైన తర్వాత కూడా పనులు చేపట్టకుండా ఊరుకున్న ఇంజనీర్లు, వర్షాకాలం ముందు పనులు స్టార్ట్ చేశారు. రిపేర్లు లేట్ అయితే సింగోటం కింద ఉన్న జొన్నలబొగడ, గుడిపల్లిగట్టు రిజర్వాయర్లకు నీరు వచ్చే అవకాశం ఉండదని రైతులు ఆందోళన చెందుతున్నారు.
