ములుగు, వెలుగు : తెలంగాణ రాష్ట్రాన్ని ఇచ్చిన కాంగ్రెస్ పార్టీకి ఒక అవకాశం ఇవ్వాలని మహిళా కాంగ్రెస్ జాతీయ ప్రధాన కార్యదర్శి, ఎమ్మెల్యే సీతక్క కోరారు. పదేళ్ల బీఆర్ఎస్ పాలనతో ప్రజలు నలిగిపోయారని విమర్శించారు. మంగళవారం ములుగు మండలం జాకారంలో, ములుగు పట్టణంలో చింతనిప్పుల భిక్షపతి ఆధ్వర్యంలో కాంగ్రెస్ ఆరు గ్యారంటీ పథకాలపై ప్రచారం నిర్వహించారు. జాకారంలో బీఆర్ఎస్ నుంచి 100మంది మహిళలు, యువకులు కాంగ్రెస్ లో చేరారు.
ఈ సందర్భంగా సీతక్క మాట్లాడుతూ సీఎం కేసీఆర్ కుటుంబ పాలనకు చరమగీతం పాడేందుకు ప్రజలు సిద్ధంగా ఉన్నారన్నారు. కాంగ్రెస్ పార్టీతోనే అభివృద్ధి సాధ్యమవుతుందని చెప్పారు. కార్యక్రమంలో టీపీసీసీ సభ్యులు మల్లాడి రాంరెడ్డి, కిసాన్ కాంగ్రెస్ జిల్లా అధ్యక్షుడు గొల్లపెల్లి రాజేందర్ గౌడ్, యూత్ కాంగ్రెస్ అధ్యక్షుడు రవిచందర్, బ్లాక్ కాంగ్రెస్ అధ్యక్షుడు వెంకన్న, కాంగ్రెస్ మండల అధ్యక్షుడు ఎండీ.చాంద్ పాషా, జిల్లా ఉపాధ్యక్షుడు పల్లెల జయపాల్ రెడ్డి, వర్కింగ్ కమిటీ అధ్యక్షుడు నల్లెల్ల భరత్, నాయకులు పాల్గొన్నారు.
అధికారంలోకి వచ్చేది కాంగ్రెస్సే..
వెంకటాపూర్( రామప్ప), వెలుగు : ములుగు జిల్లా వెంకటాపూర్ మండలంలోని నల్లగుంట, గాంపోని పల్లి, లక్ష్మీదేవి పేటకు చెందిన సుమారు250 మందికి మంగళవారం సీతక్క కండువా కప్పి కాంగ్రెస్ పార్టీలోకి ఆహ్వానించారు. ఈ సందర్భంగా ఆమె మాట్లాడుతూ తెలంగాణలో అధికారంలోకి వచ్చేది కాంగ్రెస్ ప్రభుత్వమేనని అన్నారు. తనను ఓడించడానికి బీఆర్ఎస్ నాయకులు డబ్బు సంచులతో వస్తున్నారని, కానీ తాను ప్రజలను నమ్ముకున్నానని, తాను గెలిస్తే ప్రజలు గెలిచినట్లు.. బీఆర్ఎస్ వాళ్ళు గెలిస్తే డబ్బు గెలిచినట్లని చెప్పారు. కార్యక్రమంలో టీపీసీసీ సభ్యులు మాజీ మార్కెట్ కమిటీ చైర్మన్ రాం రెడ్డి, బ్లాక్ కాంగ్రెస్ అధ్యక్షుడు భగవాన్ రెడ్డి ఉన్నారు.
