హైదరాబాద్, వెలుగు: బీఆర్ఎస్కు బిగ్ షాక్ తగిలింది. ఆ పార్టీకి చెందిన ఆరుగురు ఎమ్మెల్సీలు ఒకేసారి కాంగ్రెస్లో చేరారు. గురువారం అర్ధరాత్రి సీఎం రేవంత్రెడ్డి, కాంగ్రెస్ రాష్ట్ర వ్యవహారాల ఇన్చార్జ్ దీపాదాస్ మున్షీ సమక్షంలో వీరంతా కాంగ్రెస్లో జాయిన్ అయ్యారు. ఇందులో ఎమ్మెల్సీలు బస్వరాజు సారయ్య, భాను ప్రసాద్ రావు, దండే విఠల్, ఎగ్గే మల్లేశం, ప్రభాకర్ రావు, బుగ్గారపు దయానంద్ ఉన్నారు. రెండురోజుల ఢిల్లీ పర్యటనను ముగించుకొని సీఎం రేవంత్రెడ్డి గురువారం అర్ధరాత్రి హైదరాబాద్కు చేరుకోగానే.. ఆరుగురు ఎమ్మెల్సీలు ఆయనను కలిసి కాంగ్రెస్ కండువా కప్పుకున్నారు. సీఎం రేవంత్రెడ్డి నివాసంలో ఈ కార్యక్రమం జరిగింది.
ఇప్పటికే ఆరుగురు ఎమ్మెల్యేలు..
బీఆర్ఎస్ పార్టీ నుంచి వరుసగా నేతలు బయటకు వస్తున్నారు. పార్లమెంట్ ఎన్నికలకు ముందు ఖైరతాబాద్ ఎమ్మెల్యే దానం నాగేందర్, స్టేషన్ ఘన్పూర్ ఎమ్మెల్యే కడియం శ్రీహరి, భద్రాచలం ఎమ్మెల్యే తెల్లం వెంకట్రావ్.. పార్లమెంట్ ఎన్నికల తర్వాత బాన్సువాడ ఎమ్మెల్యే పోచారం శ్రీనివాస్ రెడ్డి, జగిత్యాల ఎమ్మెల్యే సంజయ్ కుమార్, చేవెళ్ల ఎమ్మెల్యే కాలె యాదయ్య బీఆర్ఎస్ను వీడి కాంగ్రెస్లో చేరారు.
బుధవారం బీఆర్ఎస్ రాజ్యసభ సభ్యుడు కేకే కూడా కాంగ్రెస్ కండువా కప్పుకున్నారు. ఆ మరుసటిరోజే గురువారం రాత్రి ఏకంగా ఆరుగురు ఎమ్మెల్సీలు బీఆర్ఎస్కు గుడ్బై చెప్పారు. శాసన మండలిలో మొత్తం 40 స్థానాలు ఉండగా.. రెండు ఖాళీగా ఉన్నాయి. ప్రస్తుతం మండలిలో కాంగ్రెస్కు నలుగురు సభ్యులు ఉండగా.. ఇప్పుడు బీఆర్ఎస్ నుంచి ఆరుగురు చేరడంతో ఆ పార్టీ బలం 10కి చేరింది.
చేరిన ఎమ్మెల్సీలు వీళ్లే
1. బస్వరాజు సారయ్య
2. దండే విఠల్
3. భాను ప్రసాద్ రావు
4. బుగ్గారపు దయానంద్
5. ప్రభాకర్ రావు
6. ఎగ్గే మల్లేశం
