- చలామణీలో నగదు పెరిగింది
- డిజిటల్ జోరందుకుంది
- రియల్ ట్రాన్సాక్షన్లు ఇంకా బ్లాక్లోనే
న్యూఢిల్లీ: ఆరేళ్ల కిందట అంటే నవంబర్ 8, 2016 నాడు ప్రభుత్వం అమలు చేసిన డీమానిటైజేషన్ (పెద్ద నోట్ల రద్దు) ఫలితాలపై నేటికీ చర్చ జరుగుతూనే ఉంది. బ్లాక్మనీ, టెర్రర్ ఫండింగ్ అరికట్టడంలో డీమానిటైజేషన్ సఫలమైందని ప్రభుత్వం చెబుతుంటే, రియల్ ఎస్టేట్ వంటి రంగాలలో నేటికీ క్యాష్ లావాదేవీలు తగ్గనే లేదని విమర్శకులు చెబుతున్నారు. దేశంలో బ్లాక్మనీని కట్టడి చేయడంతో పాటు, డిజిటల్ పేమెంట్స్ జోరు పెంచాలనే టార్గెట్తో ప్రధాన మంత్రి నరేంద్ర మోడి అప్పట్లో రూ. 1,000, రూ. 500 నోట్లను రద్దు చేస్తున్నట్లు ప్రకటించారు. రిజర్వ్ బ్యాంక్ ఆఫ్ ఇండియా తాజా రిపోర్టు ప్రకారం దేశంలో కరెన్సీ చలామణీ అక్టోబర్ 21 నాటికి రూ. 30.88 లక్షల కోట్లకు పెరిగింది. ఇంకోలా చెప్పాలంటే, డీమానిటైజేషన్ పూర్తయి ఆరేళ్లవుతున్నా ఇంకా నగదు వినియోగం దేశంలో తగ్గలేదన్న మాట. నవంబర్ 4, 2016 నాటికి చలామణీలో ఉన్న కరెన్సీతో పోలిస్తే ఇప్పుడు చలామణీలో ఉన్న కరెన్సీ దాదాపు 72 శాతం ఎక్కువ. అయితే 2015–16 నుంచీ క్రమంగా పేమెంట్ సిస్టమ్స్లో నగదు తగ్గుతోందని ఎస్బీఐ రీసెర్చ్ రిపోర్టు ఒకటి వెల్లడించింది. 2015–16లో 88 శాతంగా ఉన్న క్యాష్ పేమెంట్లు 2021–22 నాటికి 20 శాతానికి తగ్గిపోయినట్లు ఆ రిపోర్టు పేర్కొంది. 2026–27 నాటికి పేమెంట్ సిస్టమ్స్లో నగదు చెల్లింపులు మరింత తగ్గి 11.15 శాతానికే పరిమితమవుతాయని ఈ రిపోర్టు అంచనా వేస్తోంది.
డిజిటల్ జోరు...
ఇదే టైములో డిజిటల్ ట్రాన్సాక్షన్లు జోరందుకున్నాయి. 2015–16 నాటికి 11.26 శాతంగా ఉన్న డిజిటల్ ట్రాన్సాక్షన్లు 2021–22 నాటికి ఏకంగా 80.40 శాతానికి పెరిగాయి. ఇవి మరింత పెరిగి 2026–27 నాటికి 88 శాతమవుతాయని ఎస్బీఐ రీసెర్చ్ రిపోర్టు చెబుతోంది. డీమానిటైజేషన్తో దేశం బ్లాక్మనీ నుంచి విముక్తి సాధిస్తుందని ప్రభుత్వం చెప్పిందని, కానీ ఆ విధంగా జరగలేదని కాంగ్రెస్ పార్టీ ప్రెసిడెంట్ మల్లికార్జున్ ఖర్గే ఒక ట్వీట్లో విమర్శించారు. దేశంలోని వ్యాపారాలను డీమానిటైజేషన్ నాశనం చేసిందని, కొత్త ఉద్యోగాలు రాకుండా చేసిందనీ పేర్కొన్నారు. ఎకానమీ పడిపోవడానికి కారణమైన డీమానిటైజేషన్ తప్పేనని ఇప్పటికీ ప్రభుత్వం మాత్రం ఒప్పుకోలేదని ఖర్గే వ్యాఖ్యానించారు. డీమానిటైజేషన్ లక్ష్యాలేవీ నెరవేరలేదని మసాచుసెట్స్ యూనివర్శిటీ ప్రొఫెసర్ జయతి ఘోష్ చెప్పారు. దేశపు ఎకానమీలో 85 శాతానికి కారణమైన ఇన్ఫార్మల్ సెక్టార్ వెన్నును డీమానిటైజేషన్ విరిచేసిందని పేర్కొన్నారు. డీమానిటైజేషన్ దేశంలో గందరగోళానికి కారణమైందని సీపీఎం జనరల్ సెక్రటరీ సీతారాం ఏచూరి ట్వీట్ చేశారు. దేశపు ఎకానమీని ఈ డీమానిటైజేషన్ దెబ్బ కొట్టిందని అన్నారు. ఆరేళ్ల తర్వాత కూడా డీమానిటైజేషన్ సక్సెసయిందా, లేదా అనేది తేలలేదని లోకల్ సర్కిల్స్ ఒక రిపోర్టులో తెలిపింది. రియల్ ఎస్టేట్ ట్రాన్సాక్షన్లలో ఇప్పటికీ నగదు (బ్లాక్మనీ) చెల్లిస్తున్నారని పేర్కొంది. చాలా వస్తువులతోపాటు సర్వీసులకూ ఇప్పటికీ సరయిన రిసీట్స్ ఉండటం లేదని తెలిపింది.
