అమెరికాలో మరో విమాన ప్రమాదం చోటు చేసుకుంది. ఫిలడెల్ఫియాలో టేకాఫ్ అయిన కాసేపటికే ఫ్లైట్ కుప్పకూలింది. ఈ ప్రమాదంలో ఆరుగురు మృతి చెందారు. అమెరికా కాలమానం ప్రకారం ఫిలడెల్ఫియాలో శుక్రవారం చిన్న ఎయిర్ క్రాఫ్ట్ క్రాష్ కావడంతో భారీగా మంటలు చెలరేగాయి.
ఎయిర్ క్రాఫ్ట్ లో 6 మంది ప్రయాణిస్తున్నట్లు సీనియర్ పోలీస్ కమాండర్ తెలిపారు. ఈ ప్రమాదంలో ఆరుగురు మృతి చెందినట్లు తెలిపారు. ఫిలడెల్ఫియా అధికారిక వర్గాలు ఈ ప్రమాదాన్ని ‘‘మేజర్ ఇన్సిడెంట్’’గా పేర్కొన్నారు. ఉత్తర ఫిలడెల్ఫియాలోని కాట్మన్ బస్టెల్టన్ ప్రాంతంలో రూస్ వెల్ట్ మాల్ కు దగ్గర ఈ ప్రమాదం జరిగినట్లు అధికారిక వర్గాలు ఎక్స్ (ట్విట్టర్)లో పోస్ట్ చేశారు.
Also Read :- ఓలా నుంచి కొత్తగా 8 ఈ -స్కూటర్లు
వాషింగ్ టన్ రీగన్ ఎయిర్ పోర్ట్ దగ్గర విమానం, ఎయిర్ క్రాఫ్ట్ ఢీకొన్న ఘటన మరువక ముందే మరో ఫ్లైట్ క్రాష్ కావడం గమనార్హం. వాషింగ్టన్ ప్రమాదంలో 67 మంది మృతి చెందిన విషయం తెలిసిందే.
