న్యూఢిల్లీ: చిన్న/ప్రాంతీయ ఎఫ్ఎంసీజీ కంపెనీలు పెద్ద ఎఫ్ఎంసీజీ (ఫాస్ట్మూవబుల్ కన్జూమర్ గూడ్స్)లకు ధీటుగా విస్తరిస్తున్నాయి. గత రెండు క్వార్టర్లలో ఇవి రెండంకెల అమ్మకాల వృద్ధిని సాధించి జాతీయ బ్రాండ్‌‌‌‌‌‌‌‌లకు మరింత గట్టి పోటీనిస్తున్నాయి. అమ్మకాలు పెరుగుతుండటం, ధరల భారం (ఇన్ఫ్లేషన్) తగ్గుముఖం పట్టడం వల్ల ప్రాంతీయ ఎఫ్ఎంసీజీ బ్రాండ్‌‌‌‌‌‌‌‌లు వేగంగా ఎదుగుతున్నాయి.
రుంగ్తా టీ, బాలాజీ వేఫర్‌‌‌‌‌‌‌‌లు, మారియో రస్క్, బోవోంటో సాఫ్ట్డ్రింక్స్ వంటి ప్రాంతీయ బ్రాండ్‌‌‌‌‌‌‌‌లు జనంలోకి చొచ్చుకుపోవడానికి అన్ని ప్రయత్నాలూ చేస్తున్నాయి. కరోనా తరువాత వీటికి ఎదురులేకుండా పోయింది. ఉత్తరప్రదేశ్, రాజస్థాన్, బీహార్‌ సహా పలు మార్కెట్లలో సత్తా చాటుతున్న రుంగ్తా టీ... చాయ్ పాయింట్, చాయోస్‌ ల మాదిరిగానే టీ పార్లర్‌‌‌‌‌‌‌‌లను ఏర్పాటు చేస్తోంది. మార్కెట్ను అంచనా వేయడానికి ఇదొక ఈ–కామర్స్ బృందాన్ని కూడా నియమించింది.
ప్రస్తుత మార్కెట్‌‌‌‌‌‌‌‌లలోని అనేక జాతీయ బ్రాండ్ల కంటే వేగంగా అభివృద్ధి చెందుతున్నామని, పంపిణీదారులతో, కస్టమర్‌‌‌‌‌‌‌‌లతో బలమైన సంబంధాలు ఉన్నాయని రుంగ్తా టీ మేనేజింగ్ డైరెక్టర్ గిరిజేశ్ రుంగ్తా చెప్పారు. టీ పార్లర్‌‌‌‌‌‌‌‌లతో, ఈ–కామర్స్‌‌‌‌‌‌‌‌తో తదుపరి స్థాయికి వెళుతున్నామని, అదే సమయంలో నాణ్యత, ఇనోవేషన్లకు ప్రాధాన్యం ఇస్తున్నామని వివరించారు.
ప్రాంతీయ బ్రాండ్‌‌‌‌‌‌‌‌లు గత ఏప్రిల్– ఈ ఏడాది ఏప్రిల్ మధ్య కాలంలో 12.7శాతం వృద్ధి చెందాయని, జాతీయ బ్రాండ్‌‌‌‌‌‌‌‌లు 8.2శాతం పెరిగాయని కాంటార్ వరల్డ్ ప్యానెల్ ఇటీవల విడుదల చేసిన రిపోర్టులో వెల్లడించింది. రీజనల్ బ్రాండ్ల డిస్ట్రిబ్యూషన్, ఇన్నోవేషన్ పెరగడం ఇందుకు కారణమని పేర్కొంది.
వాల్యూ ఫర్ మనీ..
రాజ్‌‌‌‌‌‌‌‌కోట్‌‌‌‌‌‌‌‌కు చెందిన స్నాకింగ్ సంస్థ బాలాజీ వేఫర్స్.. పెప్సికో ఇంద్రా నూయి, ఇతర పెద్ద స్నాక్స్ కంపెనీలను ఆకర్షించేస్థాయికి వెళ్లింది. ఇది ఉత్తర భారతదేశంలో తన మొదటి ప్లాంట్‌‌‌‌‌‌‌‌ను లక్నోలో ఏర్పాటు చేస్తోంది. "మా ప్లాన్ ఏమిటంటే భారతదేశం అంతటా విస్తరించడం. గుజరాత్ దాటి మేం అన్ని ప్రాంతాలకూ వెళ్తాం. వాల్యూ ఫర్ మనీ వ్యూహాన్ని ఇక నుంచి కూడా కొనసాగిస్తాం”అని బాలాజీ ఫౌండర్ చందూభాయ్ విరానీ చెప్పారు.
చిరుతిళ్లు, టీ, బిస్కెట్లు, డిటర్జెంట్లు, సబ్బులు, టూత్‌‌‌‌‌‌‌‌పేస్ట్‌‌‌‌‌‌‌‌లు వంటి సెగ్మెంట్లలో ప్రాంతీయ ఎఫ్ఎంసీజీ కంపెనీలు జాతీయస్థాయికి వెళ్లే పోకడ కనిపిస్తోందని ఈ రంగానికి చెందిన నిపుణులు అంటున్నారు. "ఈ విషయంలో యాజమాన్యం కీలకమైనది. ఆపరేషన్స్లో నేరుగా పాల్గొనే ప్రాంతీయ ఎఫ్ఎంసీజీ కంపెనీల ఫౌండర్లు వేగంగా విస్తరిస్తున్నారు”అని ట్రెడిషనల్ ట్రేడ్ డిస్ట్రిబ్యూషన్ ప్లాట్ఫారమ్ వీట్రాక్ ఎక్స్‌‌‌‌‌‌‌‌టెండ్‌ రీచ్ కో–ఫౌండర్ సుమిత్ అగర్వాల్ అన్నారు.
హిందుస్థాన్ యూనిలీవర్(హెచ్యూఎల్) వంటి పెద్ద కంపెనీల మాదిరిగా ప్రాంతీయ ఎఫ్ఎంసీజీలు అన్ని కేటగిరీలపై ఒకేసారి దృష్టి పెట్టడం లేదని, ఒక్కొక్కదానిని టార్గెట్ చేసుకుంటూ వెళ్తున్నాయని చెప్పారు. చిన్న కంపెనీలు కాబట్టి కస్టమర్కు అధిక ప్రయోజనం చేకూర్చగలవని చెప్పారు.
బొవాంటో సాఫ్ట్డ్రింగ్స్ తమిళనాడు, ఆంధ్రప్రదేశ్‌‌‌‌‌‌‌‌లోని ప్రధాన మార్కెట్‌‌‌‌‌‌‌‌లకు తన ఆరెంజ్, అల్లం, ఆలే ఫిజ్జీ డ్రింక్స్ వంటి ఉత్పత్తులను తీసుకువెళ్లే ప్రయత్నాల్లో ఉంది. మారియో రస్క్ తన మొదటి బ్రాండ్ అంబాసిడర్‌‌‌‌‌‌‌‌గా నటుడు, సింగర్ దిల్జిత్ దోసాంజ్‌‌‌‌‌‌‌‌ను నియమించుకుంది.
