అదానీకి తమిళనాడు ప్రభుత్వం షాక్
చెన్నై: తమిళనాడు పవర్ డిస్ట్రిబ్యూషన్ కార్పొరేషన్, అదానీ ఎనర్జీ సొల్యూషన్స్ లిమిటెడ్(ఏఈఎస్ఎల్)కు ఇచ్చిన స్మార్ట్ మీటర్ కాంట్రాక్టును రద్దు చేసింది. ఏఈఎస్ఎల్ కోట్ చేసిన ధరలు ఎక్కువగా ఉండటమే ఇందుకు కారణమని పేర్కొంది. కేంద్రం సవరించిన డిస్ట్రిబ్యూషన్ సెక్టార్ స్కీమ్ కింద గత ఆగస్టులో నాలుగు ప్యాకేజీలుగా టెండర్లను పిలిచారు. ఒకటో ప్యాకేజీకి ఏఈఎస్ఎల్ లోయెస్ట్ బిడ్డర్గా నిలిచింది.
దీని కింద చెన్నై సహా ఎనిమిది జిల్లాలకు 82 లక్షల స్మార్ట్మీటర్లను అమర్చాల్సి ఉంటుంది. అయితే ఏఈఎస్ఎల్ కోట్చేసిన ధరలు ఎక్కువగా ఉండటంతో గత నెల 27న టెండర్ రద్దు చేసినట్టు కార్పొరేషన్ ప్రకటించింది. మరోసారి టెండర్లను పిలిచే అవకాశాలు ఉన్నాయని సంబంధిత వర్గాలు తెలిపాయి. ఇండియాలో సోలార్పవర్కాంట్రాక్టుల కోసం అదానీ గ్రూపు రూ.2,100 కోట్ల లంచాలు ఇచ్చినట్టు అమెరికాలో కేసు నడుస్తున్న సమయంలోనే తమిళనాడు ప్రభుత్వం ఈ నిర్ణయం తీసుకుంది.
