లేదు.. తెలియదు.. యాదికి లేదు

కమిషన్ అడిగిన పలు ప్రశ్నలకు స్మితా సభర్వాల్, సోమేశ్ సమాధానాలు ఇవి

కాళేశ్వరం కమిషన్: 2016 మార్చి 1న రూ.2591 కోట్లతో మేడిగడ్డ, రూ.1785 కోట్లతో అన్నారం, రూ.1437 కోట్లతో సుందిళ్ల బ్యారేజీలకు అప్పటి సీఎం ఓకే చెప్పాక.. కేబినెట్లో చర్చించకుండానే జీవో జారీ చేశారా?
స్మిత: సీఎం అప్రూవల్స్ ఇచ్చిన విషయం నాకు తెలియదు. ఈ విషయంలో సీఎం సొంతంగా నిర్ణయించి ఉండొచ్చు.
కమిషన్: అంటే మూడు బ్యారేజీలకూ కేబినెట్ అప్రూవల్స్ లేవంటారా?
స్మిత: నాకు తెలియదు
కమిషన్: ప్రాణహిత– చేవెళ్ల ప్రాజెక్టు ద్వారా ఆదిలాబాద్లో అదనపు ఆయకట్టు సృష్టించేందుకు వ్యాప్కోస్తో స్టడీ కోసం రూ.6.67 కోట్లు అప్పటి సీఎం రిలీజ్చేశారు. కేబినెట్ ఆమోదం లేకుండా డైరెక్ట్గా సీఎం అప్రూవల్ ఇచ్చారా?
స్మిత: నాకు తెలియదు.
కమిషన్: మీరేమైనా మీదగ్గరకు వచ్చిన ఫైళ్లలో లోపాలు ఎత్తి చూపారా?
స్మిత: లేదు
కమిషన్: మేడిగడ్డ లిఫ్ట్ సిస్టమ్కు సంబంధించి అదనపు పనులకోసం 2019 ఆగస్టు 6న జీవో 329 ఇష్యూ చేశారు కదా?
సోమేశ్: ఇచ్చి ఉండొచ్చు. ఆ విషయం నాకు గుర్తులేదు.
కమిషన్: కేబినెట్ అనుమతితోనే మూడు బ్యారేజీలను నిర్మించారా?
సోమేశ్: నాకు వాటితో ఎలాంటి సంబంధం లేదు.
కమిషన్: ప్రాణహిత –చేవెళ్ల 6, 7, 8, 10, 11, 12 ప్యాకేజీలకు మార్పులు చేసి రెండేండ్లలో పనులు పూర్తి చేయాలని ప్రభుత్వం ఆదేశించిన అంశం కేబినెట్లో చర్చించారా?
సోమేశ్: దీనిపై ఏమీ చెప్పలేను.
కమిషన్: కేబినెట్లో బ్యారేజీల విషయాలపై ఎప్పుడైనా చర్చించారా?
సోమేశ్: నాకు తెలియదు.
కమిషన్: ఏదైనా ప్రాజెక్ట్ లేదా ఇతర అంశాల్లో సీఎంకు డిసెంట్ నోట్స్ ఇచ్చారా?
సోమేశ్: ఇవ్వలేదు.
కమిషన్: బ్యారేజీలను ఎప్పుడు ప్రారంభించారు?
సోమేశ్: 2018 లేదా 2019లో ప్రారంభించి ఉండొచ్చు.
కమిషన్: 3 బ్యారేజీలతో మీకు సంబంధం లేదా?
సోమేశ్: లేదు.

నాడు సీఎంతో విభేదించారా?

ఏదైనా ప్రాజెక్ట్ లేదా ఇతర అంశాల్లో సీఎంకు డిసెంట్ నోట్స్ ఇచ్చారా? అని కాళేశ్వరం కమిషన్ ఆరా తీయగా.. ఇవ్వలేదని సోమేశ్ కుమార్ బదులిచ్చారు. ఏదైనా ఫైల్కు సంబంధించి అందులో నెగెటివ్ ఉంటే డిసెంట్ వ్యక్తం చేయాలని మీ మనస్సాక్షికి అనిపించలేదా? అని కమిషన్ ప్రశ్నించగా.. అవసరాన్ని బట్టి లోపాలను ఎత్తి చూపుతామన్నారు. అయితే, తన టెన్యూర్లో మాత్రం అలాంటివి ఎదురు కాలేదన్నారు. కింది స్థాయి అధికారులు తయారుచేసిన ఫైళ్లలో ఏవైనా లోపాలుంటే సరి చేసుకురావాలని చెప్పానని తెలిపారు. మూడు బ్యారేజీలతో రాష్ట్రంపై ఆర్థిక భారం పడుతుందని ఎప్పుడూ అనిపించలేదా..? అని కమిషన్ ప్రశ్నించింది.

ఇలాంటి ఆర్థికాంశాల్లో ఆర్థికశాఖ కస్టోడియన్గా ఉంటుందని, ఆర్థికశాఖ క్లియర్ చేస్తే.. దానిని తాను ఫార్వర్డ్ చేస్తానని సోమేశ్ చెప్పుకొచ్చారు. మూడు బ్యారేజీల నిర్మాణంతో తనకు ఎలాంటి సంబంధం లేదన్నారు. బ్యారేజీలను ఎప్పుడు ప్రారంభించారని కమిషన్ ప్రశ్నించగా.. 2018 లేదా 2019లో ప్రారంభించి ఉండొచ్చని సోమేశ్ చెప్పారు. తాను సెక్రటరీగా ఉండి ఉంటే కచ్చితంగా ప్రారంభోత్సవానికి వెళ్లి ఉండేవాడిని కదా అంటూ వ్యాఖ్యానించారు. మూడు బ్యారేజీలతో మీకు ఎలాంటి సంబంధం లేదా అని కమిషన్ మరోసారి ప్రశ్నించగా.. లేదని చెప్పిన ఆయన, ఒకసారి మాత్రం ముంపు విషయంలో మహారాష్ట్ర అధికారులతో సమావేశమయ్యామని తెలిపారు.