కాళేశ్వరం ఫైళ్లు కేబినెట్కు రాలే.. కేవలం ప్రతిపాదనలే పెట్టారు..

కమిషన్ ఎదుట స్మితా సభర్వాల్ అంగీకారం
ఆర్థికాంశాలపై మాత్రమే కేబినెట్లో చర్చించారు
బ్యారేజీలకు నాడు సీఎం అప్రూవల్స్ ఇచ్చిన విషయం తెలియదు
సీఎం సెక్రటరీగా నాకు 7 ప్రధాన సబ్జెక్టులు అప్పగించారు.. వాటిపై జిల్లాల్లో పర్యటించి సీఎంకు ఫీడ్బ్యాక్ ఇవ్వడం తన పని అని స్మిత వెల్లడి
నేను సీఎస్ కాక ముందే ప్రాజెక్టుపై నిర్ణయాలు జరిగాయి: సోమేశ్కుమార్
కాళేశ్వరం కమిషన్ ఓపెన్ కోర్టు విచారణకు హాజరు

హైదరాబాద్, వెలుగు: కాళేశ్వరం బ్యారేజీలకు సంబంధించిన ఏ ఫైల్ కూడా కేబినెట్ ముందుకుగానీ, సీఎంవోకి గానీ రాలేదని బీఆర్ఎస్ హయాంలో సీఎం సెక్రటరీగా పనిచేసిన స్మితా సభర్వాల్ స్పష్టం చేశారు. ప్రతిపాదనలు మాత్రమే కేబినెట్ ముందుకు వచ్చాయని.. ఆర్థికాంశాలపై చర్చించేందుకే ఆ ప్రతిపాదనలు పెట్టారని తెలిపారు. జీవోను కూడా కేబినెట్లో పెట్టలేదని కాళేశ్వరం జ్యుడీషియల్ కమిషన్ ముందు ఆమె ఒప్పుకున్నారు.

‘‘జీవో 776కు నాటి ఇరిగేషన్ శాఖ మంత్రి అనుమతిచ్చారు కదా.. అయినా కూడా కేబినెట్లో దానిపై చర్చించలేదా?’’ అని కమిషన్ ప్రశ్నించగా.. ఆ ఫైల్ అసలు సీఎంవో వరకు కూడా రాలేదని ఆమె తేల్చిచెప్పారు. గురువారం కమిషన్ ఓపెన్ కోర్టు విచారణకు స్మితా సభర్వాల్తో పాటు మాజీ సీఎస్ సోమేశ్ కుమార్ హాజరయ్యారు. పలు ప్రశ్నలకు ఇద్దరూ.. ‘‘లేదు.. తెలియదు.. యాదికి లేదు’’ అని సమాధానాలు చెప్పారు. ప్రాణహిత ప్రాజెక్టులోని 6, 7, 8, 10, 11, 12 ప్యాకేజీల మోడిఫికేషన్కు సంబంధించి జీవో 776ని జారీ చేశారు కదా.. దానిని కేబినెట్ ముందు ప్రవేశపెట్టారా అని కమిషన్ ప్రశ్నించగా.. ఆర్థిక అంశాలపై చర్చించేందుకు మాత్రమే ప్రతిపాదనలు పెట్టారని స్మిత వెల్లడించారు.

‘‘ప్రాణహిత –చేవెళ్ల డిజైన్ మార్పు డీపీఆర్తో పాటు మేడిగడ్డ బ్యారేజీ నిర్మాణానికి సంబంధించి అప్పటి ఇరిగేషన్ శాఖ మంత్రి ఆమోదించారు.. ఆతర్వాత 2016 జనవరి 18న జీవో 40ని జారీ చేశారు, దానిపైనా కేబినెట్లో చర్చ జరగలేదు కదా’’ అని కమిషన్ ప్రశ్నించింది. మంత్రి స్థాయిలోనే ఆమోదం తెలిపాక కేబినెట్ ముందుకు రాని, చర్చించని ఏ ఫైల్ కూడా సీఎంవోకు రాదని స్మితా సభర్వాల్ స్పష్టం చేశారు.

2016 మార్చి 1న రూ.2,591 కోట్లతో మేడిగడ్డ, రూ.1,785 కోట్లతో అన్నారం, రూ.1,437 కోట్లతో సుందిళ్ల బ్యారేజీలకు అప్పటి సీఎం ఓకే చెప్పాక.. కేబినెట్లో చర్చించకుండానే జీవో జారీ చేశారా? అని కమిషన్ ఆరా తీయగా.. సీఎం ఆమోదం తెలిపే ప్రతి విషయం తన దగ్గరకు రావాల్సిన అవసరం లేదని, వాటికి అప్రూవల్స్ ఇచ్చిన విషయం తనకు తెలియదని ఆమె బదులిచ్చారు. ఈ విషయంలో నాటి సీఎం సొంతంగా నిర్ణయించి ఉండొచ్చని పేర్కొన్నారు. అయితే, మూడు బ్యారేజీలకూ కేబినెట్ అప్రూవల్స్ లేవంటారా? అని కమిషన్ ప్రశ్నించగా.. తనకు తెలియదని స్మిత చెప్పారు.

సీఎం సెక్రటరీగా మీ పనులేంటి?

నాడు సీఎం సెక్రటరీగా మీ పనులేంటో చెప్పాలని స్మితా సభర్వాల్ను కాళేశ్వరం కమిషన్ ప్రశ్నించింది. తనకు 7 ప్రధాన సబ్జెక్టులను అప్పగించారని ఆమె చెప్పారు. ఆయా సబ్జెక్టులకు సంబంధించి తాను జిల్లాల్లో పర్యటించానని, ఆయా సబ్జెక్టులకు సంబంధించి ఫీడ్బ్యాక్ను నాటి సీఎంకు చెప్పానని తెలిపారు. అయితే, తన పరిధి కేవలం జనరల్ కో ఆర్డినేషన్కే పరిమితమని ఆమె స్పష్టం చేశారు. తన ముందుకు వచ్చే అంశాలు ఆర్థిక, విధానపరమైన నిర్ణయాలకు లోబడి ఉన్నాయో లేదో చెక్ చేయడం తన పరిధి అని తెలిపారు. ‘‘సీఎస్ నుంచి వచ్చే వివిధ ఫైళ్లు, ఇతర అంశాల్లో ఏవైనా లోపాలున్నాయో లేదో చెక్ చేయడం కూడా నాడు నా డ్యూటీ. దానిపైనా సీఎంకు వివరించాల్సి ఉంటుంది.

కేబినెట్ సెక్రటేరియెట్లో అన్ని చెక్స్ అయ్యాక ఆ ఫైల్ ఆమోదం కోసం సీఎంకు పంపాల్సి ఉంటుంది. అయితే, నాడు నా దగ్గరకు వచ్చిన ఫైళ్లలో ఎలాంటి లోపాలుగానీ, తప్పులనుగానీ ఇటు ఫైనాన్స్ డిపార్ట్మెంట్, అటు సీఎస్ ఆఫీస్ నుంచి చెప్పలేదు” అని ఆమె పేర్కొనారు. అయితే, ఏ ఫైల్ల్లోనైనా సీఎస్గానీ, ఇతర శాఖల కార్యదర్శులుగానీ లోపాలను ఎత్తిచూపితే.. ఆ విషయాన్ని నాడు సీఎంకు చెప్పేవారా? అని కమిషన్ ప్రశ్నించగా.. చెప్తామని పేర్కొన్నారు.

మరి, ఈ మూడు బ్యారేజీల నిర్మాణానికి సంబంధించిన ఫైళ్లపై అలాంటి లోపాలను ఏవైనా సీఎస్గానీ, ఫైనాన్స్ డిపార్ట్మెంట్గానీ ఎత్తి చూపాయా? అని కమిషన్ ప్రశ్నించగా.. ఎవరూ లోపాలను చెప్పలేదని ఆమె అన్నారు. ‘‘మీరేమైనా మీదగ్గరకు వచ్చిన ఫైళ్లలో లోపాలు తేల్చారా?’’ అని ప్రశ్నించగా.. లేదని స్మిత బదులిచ్చారు. అయితే, క్రాస్ ఎగ్జామినేషన్లో ఆమె చాలా వరకు ప్రశ్నలకు తెలీదు అనే బదులివ్వడం గమనార్హం.

నేను రాకముందే బ్యారేజీలపై నిర్ణయాలు: సోమేశ్

కాళేశ్వరం ప్రాజెక్టుతో తనకు ఏ సంబంధమూ లేదని, ఆ ప్రాజెక్ట్ అప్రూవల్స్కు సంబంధించిన నిర్ణయాలు జరిగినప్పుడు తాను సీఎస్గా గానీ, ఇరిగేషన్ సెక్రటరీగా గానీ పనిచేయలేదని మాజీ సీఎస్ సోమేశ్ కుమార్ చెప్పారు. సీఎస్గా పనిచేయడానికి ముందు ఇరిగేషన్ సెక్రటరీగా పనిచేశారు కదా అని కమిషన్ ప్రశ్నించగా.. కేవలం మూడున్నర నెలలు మాత్రమేనని, 2019 మే 2 నుంచి 2019 ఆగస్టు 18 వరకే పనిచేశానని ఆయన చెప్పారు. ఆ సమయంలో ప్రాజెక్టుకు సంబంధించి ఎలాంటి నిర్ణయాలు తీసుకోలేదని తెలిపారు. ఇరిగేషన్ సెక్రటరీగా పనిచేసి దాదాపు మూడేండ్లు అవుతుండడంతో అంతగా ఆ విషయాలు గుర్తులేవన్నారు.

అయితే, ఆయన సమాధానంపై జ్యుడీషియల్ కమిషన్ ఆగ్రహం వ్యక్తం చేసింది. ముఖ్యమైన విషయాలేవైనా చాలా మంది గుర్తుంచుకుంటారని, అంత త్వరగా ఎలా మరిచిపోతారని చురకలు అంటించింది. మేడిగడ్డ లిఫ్ట్ సిస్టమ్కు సంబంధించి అదనపు పనుల కోసం 2019 ఆగస్టు 6న జీవో 329 ఇష్యూ చేశారు కదా? అని కమిషన్ ప్రశ్నించగా.. ఇచ్చి ఉండొచ్చని, ఆ విషయం తనకు గుర్తులేదని సోమేశ్ చెప్పారు. ఆ జీవోలో ‘‘ఆ పనులకు సంబంధించిన ఖర్చులను 4700–01–232–2526–530/531 హెడ్ అకౌంట్స్ నుంచి తీసుకోవాలి” అని పేర్కొన్నారు కదా అని ప్రశ్నించగా.. అది సంబంధిత ఈఎన్సీ, చీఫ్ ఇంజనీర్ల ప్రపోజల్స్ మేరకే ఆ జీవోను ఇచ్చామని ఆయన చెప్పారు.

ALSO READ : రేవంత్..ఏం చేస్కుంటవో చేస్కో..ఫార్ములా ఈ రేస్లో అవినీతే లేదు..ఏసీబీ కేసు ఎలా పెడ్తది? : కేటీఆర్

బ్యారేజీలకు సంబంధించి మీరేమైనా వ్యతిరేకాభిప్రాయం వెల్లడించారా? అని కమిషన్ ప్రశ్నించగా.. లేదని బదులిచ్చారు. కేబినెట్ అనుమతితోనే మూడు బ్యారేజీలను నిర్మించారా? అని కమిషన్ ప్రశ్నించగా.. కేబినెట్ అనుమతితోనే బ్యారేజీలను నిర్మించాల్సి ఉంటుందని, కానీ, వాటిపై నిర్ణయం జరిగినప్పుడు తనకు వాటితో ఎలాంటి సంబంధం లేదని సోమేశ్ చెప్పారు. ప్రాణహిత –చేవెళ్ల 6, 7, 8, 10, 11, 12 ప్యాకేజీలకు మార్పులు చేసి రెండేండ్లలో పనులు పూర్తి చేయాలని నాటి ప్రభుత్వం ఆదేశించిన అంశం కేబినెట్లో చర్చించారా? అని ప్రశ్నించగా.. తాను అప్పుడు లేనని, దానిపై ఏమీ చెప్పలేనని ఆయన పేర్కొన్నారు. తాను అప్పుడు కమర్షియల్ ట్యాక్స్ సెక్రటరీగా పనిచేశానన్నారు. కేబినెట్ ముందు బ్యారేజీల విషయాలపై చర్చించారా? అని ప్రశ్నించగా.. తనకు తెలియదన్నారు. అయితే, ఏ ఫైల్ అయినా సరే సీఎస్ నుంచే కేబినెట్కు వెళ్తుందని, మేడిగడ్డ విషయంలో ఏం జరిగిందో తనకు తెలియదని ఆయన పేర్కొన్నారు.

డైరెక్ట్గా సీఎం అప్రూవల్స్ ఇచ్చారా?

‘‘ప్రాణహిత –చేవెళ్ల ప్రాజెక్టు ద్వారా ఆదిలాబాద్లో అదనంగా ఆయకట్టు సృష్టించేందుకు వ్యాప్కోస్తో స్టడీ చేయించేందుకుగానూ రూ.6.67 కోట్లు ఇష్యూ చేస్తూ అప్పటి సీఎం ఆమోదం తెలిపారు.. ఆ తర్వాత వెంటనే ఆర్థికాంశాలపై కేబినెట్లో చర్చించారు.. ఆ ఫైల్ కూడా ఉంది కదా?’’ అని జ్యుడీషియల్ కమిషన్ స్మిత సబర్వాల్ను ప్రశ్నించింది. కొన్నిసార్లు అంశం అర్జెన్సీ, ప్రాధాన్యత ఆధారంగా బిజినెస్ రూల్స్కు లోబడి ఆ ప్రాజెక్టు ఆర్థికాంశాలపై చర్చించి ఉండొచ్చని ఆమె చెప్పారు.

అయితే, తనకు దానికి సంబంధించిన పూర్తి వివరాలు మాత్రం తెలియవన్నారు. మామూలుగా అయితే ఇతర ప్రాజెక్టులకు సంబంధించి ఫైల్స్ అన్నీ కూడా కేబినెట్ నుంచే సీఎంకు వెళ్తాయి..కానీ ఈ ప్రాజెక్ట్ విషయంలో మాత్రం డైరెక్ట్గా సీఎం అప్రూవల్ ఇచ్చారా? అని ప్రశ్నించగా.. ఆ విషయం తనకు తెలియదని స్మిత చెప్పారు.