ఒక్క పాముని చూస్తేనే గుండె ఝల్లుమంటుంది. అలాంటిది ఇక్కడ ఒకేచోట ఏకంగా.. 102 పాములను పట్టుకున్నారు స్నేక్ క్యాచర్స్. ఆస్ట్రేలియాలోని సిడ్నీ సిటీ శివారులో ఉన్న ఒక గార్డెన్లో చెట్లకు వేయడానికి రెడీ చేసిన మల్చ్(ఆకులు, గడ్డితో తయారుచేసే ఒక రకమైన ఆర్గానిక్ మెటీరియల్)లో విషపూరిత పాము తిరుగుతున్నట్టు అక్కడివాళ్లు గమనించారు. దాంతో పాములు పట్టే డైలన్ కూపర్‌‌ను పిలిపించారు.
అతను ఒక్క పాము కోసమని వెతికితే ఏకంగా అక్కడ 102 పాములు దొరికాయి. వాటిలో 5 పెద్ద పాములు 97 చిన్న పాములు ఉన్నాయి. ఈ విషపూరిత పాములను అక్కడివాళ్లు రెడ్ బెల్లీ బ్లాక్‌ స్నేక్స్ అని పిలుస్తుంటారు. వీటి అడుగు భాగంలో ఎర్రగా మిగతా శరీరమంతా నల్లగా ఉంటుంది. సాధారణంగా చాలా పాములు గుడ్డు నుండి పొదిగి బయటకి వస్తాయి. ఈ రెడ్ బెల్లీ పాములు మాత్రం గుడ్లు పెట్టకుండా గర్భాశయం నుంచి పాములకు జన్మనిస్తాయి. మనుషులు తిరగని అనువైన ఆవాసాలు ఎక్కడా దొరక్కపోవడంతో ఇలా గుంపుగా ఇక్కడికి వచ్చి మల్చ్లో పిల్లలకు జన్మనిచ్చి ఉండొచ్చని ఎక్స్పర్ట్స్ అంటున్నారు.
