- గద్వాల కోర్టు ఆవరణలో ఘటన
గద్వాల, వెలుగు: గద్వాల కోర్టు ఆవరణలో ఉంచిన ఓ టూ వీలర్లోకి పాము దూరింది. దీంతో వెహికల్ పార్టులు ఒక్కొక్కటిగా ఊడదీసి పామును బయటకు తీయాల్సి వచ్చింది. కోర్టులో పని చేసే మహేశ్ గురువారం బండిని బయట పార్క్ చేసి లోపలకు వెళ్లాడు. అప్పటికే కోర్టు ఆవరణలో కక్షిదారులు పేషీకి వచ్చి వెయిట్ చేస్తున్నారు. కొద్దిసేపటికే వారి మధ్య ఓ పాము కనిపించడంతో చంపేందుకు ప్రయత్నించారు.
వెంటాడగా భయపడిన పాము సరాసరి మహేశ్ టూ వీలర్లోకి దూరింది. వాహనాన్ని కర్రతో కొట్టినా బయటకు రాలేదు. దీంతో మహేశ్కు సమాచారమిచ్చారు. ఆయన వచ్చి ప్రయత్నించినా ఫలించలేదు. చివరకు పాములు పట్టే వ్యక్తిని పిలిపించగా అతడు వచ్చి సీటుతో పాటు లోపల పార్ట్స్ విప్పి చూశాడు. కనిపించకపోవడంతో చివరకు కాలు పెట్టుకునే చోట కొన్ని పార్టులు ఊడదీయగా తోక కనిపించింది. దీంతో పామును బయటకు లాగి తీసుకువెళ్లి అడవిలో వదిలిపెట్టాడు.
