- ఫలానా వాళ్లు పార్టీ మారుతున్నారంటూ పోస్టులు
- వైరల్ అవుతుండడంతో లీడర్ల పరేషాన్
- వివరణ ఇచ్చుకుంటున్న నేతలు
- యాదాద్రి జిల్లాలో రెండు కేసులు నమోదు
యాదాద్రి, వెలుగు : సోషల్ మీడియా పొలిటికల్ లీడర్లకు నిద్రలేకుండా చేస్తోంది. లీడర్లు పార్టీలు మారుతున్నారంటూ అందులో జరుగుతున్న ప్రచారం వారిని ఆందోళనకు గురి చేస్తోంది. పోస్టులు వైరల్అవుతుండడంతో సమాధానం ఇచ్చుకోవడానికి తంటాలు పడుతున్నారు. భువనగిరి ఎంపీ బూర నర్సయ్య గౌడ్ ఇటీవల టీఆర్ఎస్ నుంచి బీజేపీలో చేరారు. ఇదే సమయంలో యాదాద్రి జిల్లా భువనగిరి ఎమ్మెల్యే పైళ్ల శేఖర్రెడ్డి కూడా పార్టీ మారుతున్నారంటూ సోషల్ మీడియాలో పోస్టులు వచ్చాయి. ఈ విషయం పై దాకా వెళ్లడంతో ప్రచారాన్ని ఖండించాలంటూ ఎమ్మెల్యే పైళ్లపై ఒత్తిడి వచ్చింది. దీంతో ఏనాడు మీడియా ముందుకు రాని పైళ్ల ఆ పని చేయాల్సి వచ్చింది. టీఆర్ఎస్లోకల్లీడర్లు భువనగిరి పోలీస్ స్టేషన్లో కంప్లయింట్ కూడా ఇవ్వడంతో పోస్టులు పెట్టిన ఓ రిపోర్టర్ను పోలీసులు అదుపులోకి తీసుకున్నారు. ఇదే విధంగా కాంగ్రెస్ ఆలేరు నియోజకవర్గ ఇన్చార్జి బీర్ల అయిలయ్య కూడా బీజేపీలో చేరుతున్నారంటూ పోస్టులు వచ్చాయి. దీంతో ఆయన కూడా సోషల్ మీడియాతో పాటు మెయిన్ మీడియాలో వివరణ ఇచ్చుకోవాల్సి వచ్చింది. పైగా పోలీసులకు ఫిర్యాదు కూడా చేశారు.
రాష్ట్ర వ్యాప్తంగా ఇదే పరిస్థితి
ఆలేరు ఎమ్మెల్యే బూడిద భిక్షయ్య గౌడ్, శాసనమండలి మాజీ చైర్మన్ స్వామి గౌడ్, దాసోజు శ్రవణ్ కొద్ది రోజుల కింద బీజేపీ నుంచి టీఆర్ఎస్లో చేరడంతో.. ఇంకా ఎవరెవరు పార్టీ మారుతున్నారో చెబుతూ సోషల్ మీడియాలో కొన్ని పోస్టులు ప్రత్యక్షమయ్యాయి. ఇందులో టీఆర్ఎస్కు చెందిన మాజీ మంత్రి పద్మారావు, బీజేపీకి చెందిన మాజీ ఎంపీ జితేందర్రెడ్డి, ఏపీ విఠల్, మాజీ ఎమ్మెల్యే ఏనుగు రవీందర్రెడ్డితో పాటు దుబ్బాక ఎమ్మెల్యే రుఘునందన్రావు ఉన్నారు. దీంతో వారంతా మేము పార్టీ మారబోవట్లేదని వివరణ ఇచ్చుకోవాల్సిన పరిస్థితి ఏర్పడింది.
