- 4 అడుగుల లోతు మంచులో రెస్క్యూ చేపట్టిన ఆర్మీ దళాలు
న్యూఢిల్లీ: భారత్‌–చైనా బార్డర్లో గస్తీ నిర్వహిస్తుండగా అదృశ్యమైన సైనికుడు, అతడి పోర్టర్ మూడోరోజు సురక్షితంగా బయటపడ్డారు. బిహార్లోని బక్సర్కు చెందిన అనిల్ రామ్ ఇండో టిబెటన్ బార్డర్ ఫోర్స్లో పనిచేస్తున్నారు. డ్యూటీలో భాగంగా మంగళవారం బార్డర్లోని మున్సియారి నుంచి మిలామ్ వరకు గస్తీకోసం మోహరించిన బృందంలో అనిల్ ఉన్నారు. ఆయన వెంట వస్తు సామగ్రిని మోసేందుకు వెళ్లిన పోర్టర్ దేవేంద్ర సింగ్ ఉన్నారు. విపరీతంగా మంచు కురుస్తుండటంతో దారి కనిపించక ఈ ఇద్దరూ తప్పిపోయారు. దీంతో సైనిక దళాలు రెస్క్యూ చేపట్టాయి.
ప్రతికూల పరిస్థితిల్లోనూ అతడిని రక్షించడమే టార్గెట్గా అన్వేషించాయి. తప్పిపోయిన తర్వాత రెస్క్యూ ఆపరేషన్ చేపట్టిన ఆర్మీ బలగాలు 36 గంటల తర్వాత వారి జాడను గుర్తించాయి. అనిల్, పోర్టర్ దేవేంద్ర ఉత్తరాఖండ్లోని మున్సియారీ గ్రామానికి 84 కిలోమీటర్ల దూరంలో మంచులో చిక్కుకుపోయారని అధికారులు తెలిపారు. ఆ రోజు రాత్రంతా ఓ గుహలో తలదాచుకున్నారని.. అయితే, ఆ గుహను కూడా మంచు కప్పేసిందని తెలిపారు. నాలుగు అడుగుల లోతు మంచులో రెస్క్యూ ఆపరేషన్ కొనసాగించామన్నారు. ప్రస్తుతం ఇద్దరూ ఆర్మీ ఆస్పత్రిలో క్షేమంగా ఉన్నారని అధికారులు తెలిపారు.
