నాంపల్లిలో నుమాయిష్​ అడ్డాగా పార్కింగ్​ ఫీజు దందా

•     బైకుకు రూ.60, కారుకు రూ.150 వసూలు
•     దగ్గరుండి పెయిడ్​ పార్కింగ్​ వైపు పంపిస్తున్న పోలీసులు 

బషీర్ బాగ్, వెలుగు: నాంపల్లిలో కొనసాగుతున్న నుమాయిష్​అడ్డాగా కొందరు పార్కింగ్ ఫీజు దందా చేస్తున్నారు. ఫ్రీ పార్కింగ్​అనుకుని వెళ్తున్న సందర్శకుల నుంచి అధిక మొత్తంలో వసూలు చేస్తున్నారు. నుమాయిష్​కు వచ్చే సందర్శకులకు ఫ్రీ పార్కింగ్​ సౌకర్యం కల్పిస్తున్నామని ఎగ్జిబిషన్​సొసైటీ, పోలీసులు చెబుతున్నప్పటికీ, తాము టెండర్లు దక్కించుకున్నామంటూ ఇంటర్ బోర్డు ఆఫీస్​ పక్కనున్న ఇందిరా ప్రియదర్శిని కాలేజీలో ప్రైవేట్ పార్కింగ్ దందాను కొనసాగిస్తున్నారు.

బైకుకు రూ.60, కారుకు రూ.150 వసూలు చేస్తున్నారు. ఎగ్జిబిషన్ ఎంట్రీ ఫీజు రూ.50 అయితే.. బైక్​పార్కింగ్ కు రూ.60 వసూలు చేస్తున్నారని జనం మండిపడుతున్నారు. ట్రాఫిక్ పోలీసులే ఫ్రీ పార్కింగ్ అంటూ తమను పెయిడ్​పార్కింగ్​ వైపు పంపిస్తున్నారని ఆవేదన వ్యక్తం చేస్తున్నారు. అయితే తాము 46 రోజుల ఎగ్జిబిషన్ కోసం 16 లక్షలు చెల్లించి టెండర్ తీసుకున్నామని, అందుకే ఈ రేట్స్ నిర్ణయించామని నిర్వాహకులు దురుసుగా సమాధానం ఇస్తున్నారు. ఎగ్జిబిషన్ సొసైటీ ప్రతినిధులను వివరణ కోరగా, అది ప్రైవేట్​పార్కింగ్ ప్లేస్ అని, సొసైటీకి, ఆ పార్కింగ్ టెండర్ తో ఎలాంటి సంబంధించి లేదని తెలిపారు. ఎగ్జిబిషన్​ సొసైటీ, ట్రాఫిక్ పోలీసుల సమన్వయంతో గ్రౌండ్​కు సమీపంలోని గృహకల్ప, గగన్ విహార్, చంద్ర విహార్, భీంరామ్ బాడా స్థలం, ఫుట్ పాత్ లతో పాటు గాంధీ భవన్ మెట్రో స్టేషన్ కింద ఉచితంగా పార్కింగ్ కల్పిస్తున్నామన్నారు.

అయితే సాయంత్రం 6 గంటల్లోపు ఈ స్థలాలు వెహికల్స్​తో నిండిపోతున్నాయి. పోలీసులు పెయిడ్​పార్కింగ్​వైపు వెహికల్స్​ను పంపిస్తున్నారు. ఫ్రీ అనుకుని అక్కడికి వెళ్తున్న సందర్శకులు అక్కడికి వెళ్లాక అడిగినంత చెల్లించాల్సి వస్తోంది. పైగా ఎగ్జిబిషన్​గ్రౌండ్ కు ఇందిరా ప్రియదర్శిని కాలేజీ దాదాపు కిలోమీటర్ ​దూరంలో ఉంది. నుమాయిష్ కారణంగా నాంపల్లి పరిసరాల్లో తీవ్ర ట్రాఫిక్ జామ్ అవుతుందని, సిటీ శివారుకు తరలించాలని గోషామహల్ ఎమ్మెల్యే రాజా సింగ్ కోరారు. ప్రభుత్వ ల్యాండ్ ​అయిన ఇందిరా ప్రియదర్శని కాలేజీ గ్రౌండ్​లో పార్కింగ్ ​టెండర్​ఎలా ఇస్తారని ప్రశ్నించారు.