![బిడ్డకు భూమి ఇయ్యొద్దంటున్నడని.. కొడుకు హత్యకు తండ్రి సుపారి](https://static.v6velugu.com/uploads/2024/07/son-passed-away-dad-for-property-at-bhupalapalli-district_Kys4VftAh2.jpg)
- మర్డర్చేసిన మేనమామ, అతడి కొడుకు, తమ్ముడి కొడుకు
- నెల కింద పెట్రోల్ పోసి నిప్పంటించి అడవిలో పడేసిన్రు
- అస్తి పంజరాన్ని పట్టుకుని మిస్టరీ చేధించిన పోలీసులు
- భూపాలపల్లి జిల్లాలో ఘటన
భూపాలపల్లి అర్భన్, వెలుగు : గత నెలలో రాంపూర్ అడవిలో కాలిపోయిన స్థితిలో ఓ గుర్తు తెలియని మృతదేహం కనిపించగా ఆ కేసు మిస్టరీని పోలీసులు చేధించారు. బిడ్డకు జాగా ఇస్తా అంటే వేధిస్తున్నాడనే కోపంతో కన్న తండ్రే..తన బావమరిది, వారి కొడుకులతో ఈ హత్య చేయించినట్టు పోలీసులు తేల్చారు. భూపాలపల్లి డీఎస్పీ సంపత్రావు, సీఐ నరేశ్కుమార్ కథనం ప్రకారం...గురువారం సాయంత్రం ఎస్సై ప్రసాద్, సిబ్బంది 5వ ఇంక్లైన్ ఆర్చ్ వద్ద వాహనాలు తనిఖీ చేస్తుండగా ఓ ఆటోలో వస్తున్న ముగ్గురు వ్యక్తులు పోలీసులను చూసి పారిపోయే ప్రయత్నం చేశారు.
వారిని పట్టుకుని విచారించగా నెల రోజుల కింద చేసిన మర్డర్ విషయం బయటపెట్టారు. వర్ధన్నపేట మండలం రాంధాన్తండాకు చెందిన నరసింహ స్వామి దంపతులకు కొడుకు గూగులోత్ ప్రభాకర్(29)తో పాటు కూతురు ఉంది. గూగులోత్ నరసింహస్వామి తన బిడ్డకు 20 గుంటల భూమి పంచుతానని అనగా ప్రభాకర్ ఒప్పుకోలేదు. ఒకవేళ భూమి ఇస్తే తల్లిదండ్రులను చంపుతానని బెదిరిస్తున్నాడు.
ఈ విషయంలో చాలాసార్లు చేయి కూడా చేసుకున్నాడు. దీంతో తన కొడుకుతో తనకు ముప్పు ఉందని గ్రహించిన నరసింహ స్వామి..ప్రభాకర్ను చంపితే రూ.50వేలు ఇస్తానని పర్వతగిరి మండలం తురకల సోమవారం గ్రామానికి చెందిన తన బావమరిది బానోత్ బాలాజీ(38)కి చెప్పాడు. దీనికి ఒప్పుకున్న అతడు తన కొడుకు సిద్దు(20), తమ్ముడి కొడుకు శీను(20)తో కలిసి పథకం పన్నాడు. ముగ్గురూ కలిసి ప్రభాకర్కు భూపాలపల్లి మండలం గొల్ల బుద్ధారం తండాలో పెండ్లి సంబంధం చూశామని చెప్పారు. ఏప్రిల్23న గొల్ల బుద్ధారం తండాకు బైక్లపై వెళ్లారు.
మార్గమధ్యలోని రాంపూర్ అటవీ ప్రాంతానికి తీసుకువెళ్లి మద్యం తాగించారు. తర్వాత తలపై బండరాయితో కొట్టి చంపారు. వెంట తెచ్చుకున్న పెట్రోల్పోసి నిప్పంటించి పారిపోయారు. ఏప్రిల్29న తల్లిదండ్రులు తమ కొడుకు కనిపించకుండాపోయారని మిస్సింగ్ కేసు పెట్టారు. కొద్ది రోజుల తర్వాత ఓ బర్ల కాపరి రాంపూర్ అడవిలోకి వెళ్లగా అస్తి పంజరం కనిపించింది. దీంతో వారు పోలీసులకు సమాచారమిచ్చారు.
ఒంటిపై ఉన్న బట్టల ఆధారంగా పోలీసులు వాట్సాప్ గ్రూపుల్లో ఇతర చోట్ల మృతదేహాన్ని గుర్తిస్తే సమాచారం ఇవ్వాలని ప్రచారం చేశారు. మృతుడు నివాసముండే ప్రాంతంలో కూడా మిస్సింగ్ కేసు నమోదు కావడంతో అన్ని ఆధారాలు పరిశీలించి అస్తి పంజరం ప్రభాకర్దిగా గుర్తించారు. గురువారం చేసిన తనిఖీల్లో నిందితులు తామే హత్య చేశామని ఒప్పుకోవడంతో ముగ్గురిని అరెస్ట్ చేసి రిమాండ్కు తరలించారు. కేసు నమోదు చేసుకుని దర్యాప్తు చేస్తున్నట్టు చెప్పారు.