న్యూఢిల్లీ: గర్భిణులకు ప్రసూతి ప్రయోజనాలను అందించే ప్రధానమంత్రి మాతృ వందన యోజన (పీఎంఎంవీవై) పథకాన్ని కేంద్ర ప్రభుత్వం నిర్లక్ష్యం చేస్తోందని కాంగ్రెస్ పార్లమెంటరీ పార్టీ చైర్‌ పర్సన్ సోనియా గాంధీ ఆరోపించారు. ఈ స్కీమ్కు నిధుల కొరత తీవ్రంగా ఉందని.. దీంతో లబ్ధిదారుల సంఖ్య తగ్గిపోతోందని ఆమె అన్నారు. బుధవారం రాజ్యసభలో జీరో అవర్ లో ఆమె పీఎంఎంవీవై, జాతీయ ఆహార భద్రతా చట్టం (ఎన్ఎఫ్ఎస్ఏ)పై మాట్లాడారు.
2013 సెప్టెంబర్‌‌లో అప్పటి ప్రధాన మంత్రి మన్మోహన్ సింగ్ నాయకత్వంలో పార్లమెంటు ఆమోదించిన జాతీయ ఆహార భద్రతా చట్టం (ఎన్ఎఫ్ఎస్ఏ).. కరోనా సమయంలో పేద కుటుంబాలకు ఆహార ధాన్యాలు అందించడానికి ప్రారంభించిన పీఎం గరీబ్ కల్యాణ్ యోజన (పీఎంజీకేవై) పథకానికి పునాది అని సోనియా గాంధీ అన్నారు. ఎన్ఎఫ్ఎస్ఏ ఆధారంగా 2017లో పీఎంఎంవీవై ప్రారంభమైంది. ఈ పథకం ద్వారా ఎన్ఎఫ్ఎస్ఏ కింద గర్భిణులకు ఆడ బిడ్డ పుడితే విడతల వారీగా రూ.6 వేలు అందిస్తారు.
రెండో కాన్పులో మళ్లీ ఆడ బిడ్డ పుట్టినా ఈ స్కీమ్వర్తిస్తుంది. అయితే, 2022-–23 సంవత్సరానికి సంబంధించిన సమాచారం ప్రకారం, దాదాపు 68% మంది గర్భిణులు తమ మొదటి ప్రసవానికి కేవలం ఒకసారి మాత్రమే నిధులు పొందారని, మరుసటి సంవత్సరంలో వారి సంఖ్య 12 శాతానికి పడిపోయిందని సోనియా గాంధీ తెలిపారు. అలాగే, పీఎంఎంవీవైని కేంద్ర బడ్జెట్ పత్రాలలో విడిగా ప్రస్తావించకపోవడంపై కూడా ఆమె ప్రశ్నించారు. ఈ స్కీమ్ అమలుకు ఏటాసుమారు రూ.12 వేల కోట్లు అవసరమని.. కానీ, బడ్జెట్లో కేవలం రూ. 2,521 కోట్లు మాత్రమే కేటాయించారని విమర్శించారు.
