టెస్ట్ క్రికెట్ లో టీమిండియా తరపున బెస్ట్ ఓపెనర్ ఎవరనగానే సునీల్ గవాస్కర్ అని ఠక్కున గుర్తుకొస్తాడు. ఇండియాలోనే కాదు తన అత్యుత్తమ బ్యాటింగ్ తో ప్రపంచ క్రికెట్ లోనే బెస్ట్ టెస్ట్ క్రికెట్ ఓపెనర్ గా చెరగని ముద్ర వేశాడు. 70, 80 దశకాల్లో భయంకరమైన విండీస్ బౌలర్లకు ఎదురొడ్డి నిలిచాడు. గవాస్కర్ తర్వాత టీమిండియాలో ఆ లోటు స్పష్టంగా కనిపించింది. ఇదిలా ఉంటే.. భారత మాజీ కెప్టెన్ సౌరవ్ గంగూలీ టీమిండియాలో బెస్ట్ టెస్ట్ ఓపెనర్ ఎవరనే విషయంలో ఆసక్తికర వ్యాఖ్యలు చేశాడు.
తాజాగా ఇచ్చిన ఇంటర్వ్యూలో మాట్లాడుతూ..భారత టెస్ట్ క్రికెట్ లో సునీల్ గవాస్కర్ తర్వాత వీరేంద్ర సెహ్వాగ్ బెస్ట్ ఓపెనర్ గా కితాబులిచ్చాడు. సెహ్వాగ్ టెస్ట్ క్రికెట్ లో విధ్వంసకర ఓపెనర్ అని.. అతని ప్రభావం టెస్ట్ క్రికెట్ లో ఎంతగానో ఉందని టీమిండియా మాజీ కెప్టెన్ చెప్పుకొచ్చాడు. గతంలోనూ సెహ్వాగ్ ను బెస్ట్ టెస్ట్ ఓపెనర్ అని కొనియాడిన గంగూలీ మరోసారి ఈ ఢిల్లీ ఓపెనర్ ప్రతిభను గుర్తు చేశాడు. వన్డేల్లో ఆల్ టైం గ్రేటెస్ట్ ఓపెనర్ గా ఆడిన సచిన్.. టెస్టుల్లో నాలుగో స్థానంలో బ్యాటింగ్ చేశాడు. రోహిత్ శర్మ, గంభీర్ ఓపెనర్లుగా పర్వాలేదనిపించినప్పటికీ సెహ్వాగ్ లా మ్యాచ్ విన్నర్లు అనిపించుకోలేకపోయారు.
Also Read :- నేను మిస్టరీ స్పిన్నర్ కాదు.. నన్ను హైలెట్ చేయకండి
సెహ్వాగ్ విషయానికి వస్తే ఫార్మాట్ ఏదైనా.. ప్రత్యర్థి ఎవరైనా.. చివరికి మ్యాచ్ ఎలాంటి స్థితిలో ఉన్నా దూకుడుగా ఆడడం అతని నైజం. టెస్టుల్లో 8 వేలకు పైగా పరుగులు సాధించిన సెహ్వాగ్..సుదీర్ఘ ఫార్మాట్ లో 100 టెస్ట్ మ్యాచ్ లు ఆడిన అతికొద్ది క్రికెటర్లలో ఒకడు. టెస్టుల్లో ట్రిఫుల్ సెంచరీ బాదిన తొలి భారత క్రికెటర్‌గా రికార్డు నెలకొల్పిన వీరేంద్ర సెహ్వాగ్.. రెండు సార్లు 300+ మైలురాయిని అందుకున్నాడు. ఇప్పటికీ టెస్టుల్లో భారత్ తరఫున అత్యధిక వ్యక్తిగత స్కోరు (319) సెహ్వాగ్ పేరిటే ఉంది. ఈ ఫార్మాట్ లో మొత్తం ఆరు డబుల్ సెంచరీలు సెహ్వాగ్ ఖాతాలో ఉన్నాయి.
Sourav Ganguly talking about the impact of Virender Sehwag in Test cricket. 🙇♂️ pic.twitter.com/2S6vcoK6L8
— Mufaddal Vohra (@mufaddal_vohra) January 29, 2025
