నీళ్లు, ప్లాస్టిక్ తో పెట్రోల్ తయారు చేసిన కొరియా సైంటిస్టులు

• రుథీనియం కేటలిస్ట్​ను వాడిన పరిశోధకులు
• ప్లాస్టిక్ పొల్యూషన్​కు సరికొత్త సొల్యూషన్​

హైదరాబాద్, వెలుగు :  ప్రపంచ వ్యాప్తంగా అందరి జీవితాల్లో ప్లాస్టిక్ వినియోగం అనేది కామన్ అయిపోయింది. ప్లాస్టిక్ వాడకంతో పర్యావరణానికి ఎంతో నష్టం వాటిల్లుతున్నది. ఆ ప్లాస్టిక్ పొల్యూషన్​కు చెక్ పెట్టేందుకు పరిశోధనలు కొనసాగుతున్నాయి. ప్లాస్టిక్​ను కరిగించి వాటితో రోడ్లేసే దానిపై ప్రయోగాలు జరుగుతున్నాయి. రీ సైక్లింగ్ వ్యవస్థలూ ఉన్నాయి. తాజాగా దక్షిణ కొరియాకు చెందిన సైంటిస్టులు.. ఆ ప్లాస్టిక్ నుంచే పెట్రోల్, డీజిల్ వంటి ఇంధనాలు తయారు చేస్తున్నారు. 

దానికి కావాల్సిందల్లా కేవలం నీళ్లే. సౌత్ కొరియాకు చెందిన సియోల్ నేషనల్ యూనివర్సిటీ ఆఫ్ సైన్స్ పరిశోధకులు ఈ దిశగా ప్రయోగాలు చేసి సక్సెస్ అయ్యారు. దాదాపు 97శాతం వరకు ప్లాస్టిక్ వేస్టేజ్​ను ఫ్యూయెల్​గా మార్చారు. ప్లాస్టిక్, నీళ్లను కలిసి ఇంధనం తయారు చేస్తున్నారు.

ఎలా సాధ్యమైంది?

ప్రస్తుతం ప్రపంచవ్యాప్తంగా ఏటా 40 కోట్ల టన్నుల ప్లాస్టిక్ ఉత్పత్తి అవుతున్నది. అందులో ఎక్కువగా పాలీఓలిఫిన్ అనే రకం ప్లాస్టిక్ వాడకమే ఎక్కువగా ఉంటున్నది. ఆ ప్లాస్టిక్ వేస్ట్​ను నీళ్లతో కలిపి రుథీనియం జియోలైట్ వై అనే కేటలిస్టులతో రియాక్ట్ అయ్యేలా చేశారు. కేటలిస్ట్​ రియాక్షన్​తో ఆ మిశ్రమంలోని నీళ్లు ప్లాస్టిక్​ను పెట్రోల్, గ్యాసోలిన్, డీజిల్​గా మార్చేలా చేశారు. ప్లాస్టిక్, రుథీనియం మిశ్రమంలో నీటిని కలపడంతో కార్బన్ ఎఫిషియెన్సీ పెరిగిందని గుర్తించారు. నీటితో ఆ మిశ్రమంలో చైన్ రియాక్షన్ మెకానిజమ్స్​ మారిపోయాయని కనుగొన్నారు. 

Also Read :- హుస్సేన్ సాగర్​లో బోట్లకు మంటలు

అంతేగాకుండా, నీటిని యాడ్ చేయడంతో బొగ్గు ఎక్కువగా రాకుండా.. కేటలిస్టుల పనితీరు మరింత మెరుగుపడిందని తేల్చారు. ఆర్థికపరంగా కూడా ఇది చాలా తక్కువ ఖర్చుతో కూడుకున్నదని అంటున్నారు. మామూలుగా అయితే ప్లాస్టిక్​ను నియంత్రిత వాతావరణాల్లో కాల్చి రీసైకిల్​ చేస్తుంటారని, అలా రీసైకిల్​ చేయడం వల్ల పర్యావరణానికీ హాని కలుగుతుందని చెప్తున్నారు.