రుతుపవనాలు మళ్లీ యాక్టివ్! తెలంగాణలో మోస్తరు నుంచి భారీ వర్షాలు

•     బంగాళాఖాతంలో అల్పపీడనం
•     రెండు రోజుల పాటు మోస్తరు నుంచి భారీ వర్షాలు
•     ఎల్లో అలర్ట్ జారీ చేసిన వాతావరణ శాఖ

హైదరాబాద్, వెలుగు: రాష్ట్రంలో కొన్ని రోజులపాటు బలహీనపడిన నైరుతి రుతుపవనాలు.. మళ్లీ యాక్టివ్ అయ్యాయి. ఒడిశా తీరం.. బంగాళాఖాతంలో అల్ప పీడనం ఏర్పడిందని వాతావరణ శాఖ తెలిపింది. ఉపరితల ఆవర్తన ప్రభావంతో ఏర్పడిన అల్పపీడనం కారణంగా రాష్ట్రంలో రుతుపవనాలు చురుగ్గా కదులుతున్నాయని శుక్రవారం బులెటిన్​లో వెల్లడించింది. 

అల్పపీడన ప్రభావంతో రెండ్రోజుల పాటు రాష్ట్రంలో మోస్తరు నుంచి భారీ వర్షాలు కురిసే అవకాశం ఉందని తెలిపింది. కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, వికారాబాద్, సంగారెడ్డి, మెదక్, కామారెడ్డి, మహబూబ్​నగర్, నాగర్​కర్నూల్, వనపర్తి, నారాయణపేట, జోగులాంబ గద్వాల, ఆదిలాబాద్, కుమ్రంభీం ఆసిఫాబాద్, మంచిర్యాల, నిర్మల్, నిజామాబాద్ జిల్లాలకు ఎల్లో అలర్ట్​ను జారీ చేసింది. హైదరాబాద్​లోనూ రెండ్రోజుల పాటు ఇదే పరిస్థితి ఉంటుందని వెల్లడించింది. 

శుక్రవారం నిర్మల్, జగిత్యాల, మంచిర్యాల, జయశంకర్ భూపాలపల్లి, పెద్దపల్లి, కరీంనగర్, ములుగు, హనుమకొండ, వరంగల్, వికారాబాద్, జనగామ, సిద్దిపేట, సిరిసిల్ల, గద్వాల, మహబూబ్​నగర్, నారాయణపేట జిల్లాల్లో పలుచోట్ల మోస్తరు వర్షం కురిసింది. అత్యధికంగా జగిత్యాల జిల్లా కోల్వాయిలో 6 సెంటీ మీటర్ల వర్షపాతం నమోదైంది. జయశంకర్ భూపాలపల్లి జిల్లా రేగొండలో 3.6, హనుమకొండ జిల్లా నడికుడలో 2.6 సెంటీ మీటర్ల వర్షపాతం రికార్డయింది. గత రెండు మూడు రోజుల నుంచి రుతుపవనాలు చురుగ్గా కదులుతున్నాయి. 3, 4 రాష్ట్రాల్లోని కొన్ని ప్రాంతాలు మినహా దేశమంతా విస్తరించినట్టు ఐఎండీ తెలిపింది. మరో రెండు మూడు రోజుల్లో ఆ మిగతా ప్రాంతాలకూ విస్తరిస్తాయని వెల్లడించింది.