జగిత్యాల రూరల్ మండలం జాబితాపూర్లో సంచలనం సృష్టించిన ఎమ్మెల్సీ జీవన్ రెడ్డి అనుచరుడు, కాంగ్రెస్ నేత గంగారెడ్డి హత్య కేసులో నిందితుడు సంతోష్ను పోలీసులు అరెస్ట్ చేశారు. జగిత్యాల పాలిటిక్స్లో కాకరేపిన ఈ మర్డర్ కేసులో నిందితుడిని అరెస్ట్ చేసి కోర్టులో హాజరు పర్చినట్లు ఎస్పీ అశోక్ కుమార్ వెల్లడించారు. ఈ మేరకు శుక్రవారం (అక్టోబర్ 25) ఎస్పీ పేరిట పోలీసులు మీడియాకు ప్రెస్ నోట్ విడుదల చేశారు. ఈ ప్రెస్ నోట్లో కీలక విషయాలు వెల్లడించారు. పాత కక్షలు, భూతగాదాల నేపథ్యంలోనే ఈ హత్య జరిగినట్లు ఎస్పీ స్పష్టం చేశారు.
ఈనెల (అక్టోబర్) 22న ఉదయం అద్దెకు తెచ్చిన కారుతో బండిమీద వెళుతున్న గంగారెడ్డిని ఢీ కొట్టి, ఆ తర్వాత కత్తితో విచక్షణ రహితంగా పొడిచి సంతోష్ చంపేశాడని పేర్కొన్నారు. నిందితుని ఆనవాళ్లు సీసీ కెమెరాల్లో గుర్తించడంతో పాటు స్థానికుల సాక్ష్యం ఆధారంగా ఇవాళ సంతోష్ను అరెస్ట్ చేసి కోర్టులో హాజరు పరిచినట్లు తెలిపారు. సంతోష్ కుటుంబానికి, వారి బంధువుతో కొద్దిరోజులుగా భూ వివాదాలు ఉన్నాయని.. ఈ వివాదంలో సంతోష్కు వ్యతిరేకంగా బంధువులకు మద్దతుగా గంగారెడ్డి ఉన్నాడని.. దీనితో గంగారెడ్డిపై సంతోష్ కక్ష పెంచుకున్నాడన్నారు.
ALSO READ | పాత కక్షలా.. రాజకీయ హత్యనా ? : గంగారెడ్డి హత్యపై పోలీసుల ఫుల్ ఎంక్వైరీ
గతంలో సంతోష్ పై ఎస్సీ ఎస్టీ అట్రాసిటీ కేసు నమోదు కాగా ఈనెల 25 నుంచి అది కోర్టులో హియరింగ్కు రానుందని.. ఈ కేసు వెనక కూడా గంగారెడ్డి ఉన్నాడని భావించి అతనితో కాంప్రమైజ్ కోసం కొద్ది రోజుల క్రితం సంతోష్ చర్చలు జరిపారని వివరించారు. ఈ విషయంలో సంతోష్ విజ్ఞప్తిని గంగారెడ్డి తిరస్కరించడంతో పాటు తిట్టాడని.. దీంతో గంగారెడ్డిని ఎలాగైనా చంపాలని నిర్ణయించుకుని సంతోష్ మర్డర్ ప్లాన్ చేసినట్లు తెలిపారు. హత్యకు అనువైన సమయం కోసం ఎదురుచూస్తూ వచ్చిన సంతోష్.. ఈనెల 22న ఉదయం హత్య చేశాడని వెల్లడించారు.
