- భద్రాద్రికొత్తగూడెం జిల్లాలో సిబ్బంది సమస్యలను ప్రతి గురువారం తెలుసుకునేలా ఎస్పీ ప్లాన్
- ఇటీవల జిల్లాలో ముగ్గురి పోలీసుల సూసైడ్ నేపథ్యంలో నిర్ణయం
భద్రాద్రికొత్తగూడెం, వెలుగు : భద్రాద్రికొత్తగూడెం జిల్లాలో పోలీసుల కోసం ప్రతి గురువారం ప్రత్యేకంగా గ్రీవెన్స్నిర్వహించేందుకు ఎస్పీ బి.రోహిత్ రాజు వినూత్న ప్రయోగం చేస్తున్నారు. వంద రోజుల్లో ఎస్సైతో పాటు ఇద్దరు కానిస్టేబుల్స్ సూసైడ్ చేసుకున్న నేపథ్యంలో ఈ నిర్ణయం తీసుకున్నారు. పోలీస్ అధికారులు, సిబ్బందిలో ఆత్మస్థైర్యాన్ని పెంపొందించడంతో పాటు వారి సమస్యలను నేరుగా తెలుసుకొని పరిష్కరించడమే లక్ష్యంగా ఈ ప్రోగ్రామ్ ఏర్పాటు చేస్తున్నట్టు ఎస్పీ తెలిపారు.
వారంలో రెండు రోజులు గ్రీవెన్స్..
రాష్ట్రంలో ఎక్కడా లేని విధంగా భద్రాద్రికొత్తగూడెం జిల్లాలో రెండు రోజుల పాటు గ్రీవెన్స్ నిర్వహించనున్నారు. ప్రతి సోమవారం కొత్తగూడెంలోని ఎస్పీ ఆఫీస్లో ప్రజల కోసం ఇప్పటికే గ్రీవెన్స్ నిర్వహిస్తే, ఇప్పుడు జిల్లా పోలీస్ ఆఫీసర్లు, సిబ్బంది కోసం ప్రత్యేకంగా ప్రతి గురువారం గ్రీవెన్స్ నిర్వహించనున్నారు. పోలీస్ అధికారులు, సిబ్బంది ఎవరైనా గ్రీవెన్స్రోజు తనను నేరుగా కలిసి సమస్యలను విన్నవించుకోవచ్చని ఎస్పీ స్పష్టం చేశారు. చిన్న సమస్యలకే కొందరు క్షణికావేశంలో ఆత్మహత్యలకు పాల్పడుతున్నారని, అలాంటి వారికి ఈ గ్రీవెన్స్ ఎంతగానో ఉపయోగపడుతుందని ఆయన చెప్పారు.
ఎస్పీ టెలీ కాన్ఫరెన్స్
కొత్తగూడెంలోని ఎస్పీ ఆఫీస్ నుంచి మంగళవారం జిల్లాలో పోలీస్ ఆఫీసర్లు, సిబ్బందితో ఎస్పీ టెలీ కాన్ఫరెన్స్ నిర్వహించారు. జిల్లాలో ఇటీవల జరిగిన ఘటనలు తనను ఎంతగానో బాధించాయన్నారు. కుటుంబాల కోసం ఆలోచించకుండా క్షణికావేశంలో ప్రాణాలు తీసుకోవడం బాధకరమని చెప్పారు. పోలీస్ శాఖలో పని చేసే ప్రతి ఒక్కరూ శారీరకంగా, మానసికంగా ధృడంగా ఉండాలన్నారు. నిజాయితీతో విధులు నిర్వర్తిస్తూ జిల్లా పోలీస్శాఖకు మంచి పేరు తీసుకురావాలని సూచించారు. మావోయిస్టు కార్యక్రమాలను అడ్డుకోవడం, గంజాయి అక్రమ రవాణాను అరికట్టడంలో రాష్ట్రంలోనే జిల్లా పోలీస్లకు మంచి పేరుందన్నారు. ఈ క్రమంలో పలు సమస్యలను సిబ్బంది ఎస్పీ దృష్టికి తీసుకువచ్చారు.
